2017-09-19

കറന്റ് അക്കൗണ്ട് കമ്മി (മോദി ബ്രാന്‍ഡ്)


2004ലെ ലോക്‌സഭാ തിരഞ്ഞെടുപ്പിനെ, 1998 മുതല്‍ അധികാരത്തിലിരുന്ന, ബി ജെ പി നയിച്ച ദേശീയ ജനാധിപത്യ സഖ്യം (നാഷനല്‍ ഡെമോക്രാറ്റിക് അലയന്‍സ് - എന്‍ ഡി എ) നേരിട്ടത് 'ഇന്ത്യ തിളങ്ങുന്നു'വെന്ന മുദ്രാവാക്യമുയര്‍ത്തിയാണ്. സ്വാതന്ത്ര്യാനന്തരം രാജ്യം കണ്ട തിരഞ്ഞെടുപ്പുകളിലൊക്കെ ഉയര്‍ന്ന മുദ്രാവാക്യങ്ങളില്‍ നിന്ന് ഭിന്നമായൊരു മുദ്രാവാക്യം അവതരിപ്പിക്കാന്‍ ബി ജെ പി ശ്രമിച്ചത്, യുവാക്കളെയും ഇടത്തരക്കാരെയും ലക്ഷ്യമിട്ടായിരുന്നു. സാമ്പത്തിക വളര്‍ച്ചയുടെ തോത് ഉയര്‍ത്തുകയും അതുവഴി കൂടുതല്‍ തൊഴിലവസരങ്ങള്‍ ഉറപ്പാക്കുകയും ചെയ്യാന്‍ എ ബി വാജ്പയിയുടെ നേതൃത്വത്തിലിരുന്ന സര്‍ക്കാറിന് സാധിച്ചുവെന്നും അതിലൂടെയുണ്ടായ 'തിളക്കം' വോട്ടിംഗിനെ സ്വാധീനിക്കുമെന്നുമായിരുന്നു കണക്ക് കൂട്ടല്‍. വ്യക്തികളില്‍ കൂടുതല്‍ കേന്ദ്രീകരിക്കാതെ, രാജ്യത്തെ മുന്നില്‍ വെച്ച് നടത്തിയ പ്രചാരണത്തെ വിശ്വാസത്തിലെടുക്കാന്‍ രാജ്യത്തെ വോട്ടര്‍മാര്‍ തയ്യാറായില്ല, കോണ്‍ഗ്രസിന്റെ നേതൃത്വത്തില്‍ രൂപമെടുത്ത യൂനൈറ്റഡ് പ്രോഗ്രസീവ് അലയന്‍സ് (യു പി എ) ഇടത് പാര്‍ട്ടികളുടെ പിന്തുണയോടെ അധികാരത്തിലെത്തുകയും ചെയ്തു.


പത്ത് വര്‍ഷത്തിന് ശേഷം രാജ്യം, പാര്‍ട്ടി, പാര്‍ട്ടിയുടെ നയങ്ങള്‍ എന്നിവയെയൊക്കെ അപ്രസക്തമാക്കിക്കൊണ്ട്, നരേന്ദ്ര മോദിയെന്ന ബ്രാന്‍ഡ് തിരഞ്ഞെടുപ്പു വിപണിയില്‍ അവതരിപ്പിച്ച് വിജയം വരിക്കാന്‍ ബി ജെ പിക്കായി. പാര്‍ട്ടി മുന്‍കൈ എടുത്ത് രൂപവത്കരിച്ചതായിരുന്നില്ല ആ ബ്രാന്‍ഡ്. മറിച്ച് മോദി തന്നെ മുന്‍കൈ എടുത്ത് ആരംഭിച്ച ബ്രാന്‍ഡ് ബില്‍ഡിംഗ് പിന്നീട് ബി ജെ പിക്കും സംഘ്പരിവാരത്തിലെ ഇതര ഘടകങ്ങള്‍ക്കും ഏറ്റെടുക്കേണ്ടി വരികയായിരുന്നു. ഇന്ത്യ തിളങ്ങുന്നുവെന്ന പ്രചാരണത്തിലൂടെ ലക്ഷ്യമിട്ട യുവാക്കളെയും ഇടത്തരക്കാരെയും നഗരവാസികളെയുമാണ് മോദി എന്ന ബ്രാന്‍ഡും ലക്ഷ്യമിട്ടത്.


വ്യാഴവട്ടത്തിലേറെ നീണ്ട ഭരണത്തിലൂടെ, ഗുജറാത്തില്‍ വലിയ വികസനമുണ്ടാക്കിയെന്ന, ഏറെക്കുറെ പൊള്ളയായ, അവകാശവാദത്തെ സ്ഥാപിച്ചെടുക്കുകയായിരുന്നു ആദ്യത്തെ പടി. ജനങ്ങളുടെ പ്രക്ഷോഭത്തെത്തുടര്‍ന്ന് പശ്ചിമ ബംഗാളില്‍ നിന്ന് കുടിയൊഴിയേണ്ടിവന്ന ടാറ്റയെ ഗുജറാത്തിലേക്ക് ക്ഷണിച്ച്, നാനോ നിര്‍മാണ  പ്ലാന്റ് സ്ഥാപിക്കാന്‍ അവസരമൊരുക്കിയത് 'വികസന നായകന്‍' എന്ന പ്രതിച്ഛായ സൃഷ്ടിക്കുന്നതില്‍ വലിയ പങ്കാണ് വഹിച്ചത്. ഗുജറാത്തിലെ നേതാവ് എന്നതില്‍ നിന്ന് ദേശീയ നേതാവ് എന്നതിലേക്ക് വളരുന്നതിലും ഇത് നല്‍കിയ സഹായം ചെറുതായിരുന്നില്ല. ഗുജറാത്ത് വംശഹത്യാ ശ്രമവും വ്യാജ ഏറ്റുമുട്ടലുകളും നല്‍കിയ പ്രതികൂല പ്രതിച്ഛായയെ മറികടക്കുന്നതിന് വേണ്ടി കൂടിയാണ് വികസന മുദ്രാവാക്യം നരേന്ദ്ര മോദിയും അദ്ദേഹം വാടകക്കെടുത്ത പ്രചാരകരും മുന്നോട്ടുവെച്ചത്.


2008ല്‍ ആരംഭിച്ച ആഗോളമാന്ദ്യത്തെത്തുടര്‍ന്ന് രാജ്യത്തിന്റെ സാമ്പത്തിക വളര്‍ച്ച മുരടിച്ചത്, 2013 - 14 കാലത്തെ ബ്രാന്‍ഡ് ബില്‍ഡിംഗ്  പരിശ്രമത്തില്‍ നരേന്ദ്ര മോദി വലിയ തോതില്‍ ഉപയോഗിച്ചിരുന്നു. 2009ല്‍ അധികാരത്തില്‍ തിരിച്ചെത്തിയ യു പി എ സര്‍ക്കാറിന്റെ പരാജയത്തിന് തെളിവായി വളര്‍ച്ചാ മുരടപ്പിനെ ചിത്രീകരിച്ചു. പണപ്പെരുപ്പ നിരക്ക് ഉയര്‍ന്നു നില്‍ക്കുന്നതും പുതിയ തൊഴിലവസരങ്ങള്‍ സൃഷ്ടിക്കാന്‍ സാധിക്കാത്തതും അന്ന് നരേന്ദ്ര മോദി നടത്തിയ പ്രസംഗങ്ങളിലെ മുഖ്യ ഇനങ്ങളായിരുന്നു. 2014ലെ ലോക്‌സഭാ തിരഞ്ഞെടുപ്പിന്റെ പ്രചാരണത്തിന് വേഗം കൂടിയപ്പോള്‍ 'ഞാന്‍' അധികാരത്തിലെത്തിയാല്‍ സാമ്പത്തിക വളര്‍ച്ചയുടെ വേഗം കൂട്ടുമെന്നും കൂടുതല്‍ തൊഴിലവസരങ്ങള്‍ സൃഷ്ടിക്കുമെന്നുമൊക്കെ അദ്ദേഹം ആവര്‍ത്തിക്കുകയും ചെയ്തു.


അധികാരത്തിലേറി മൂന്നര വര്‍ഷം പിന്നിടുമ്പോള്‍, യുവാക്കളെയും ഇടത്തരക്കാരെയും ആകര്‍ഷിക്കാന്‍ പാകത്തില്‍ നരേന്ദ്ര മോദി നല്‍കിയ വാഗ്ദാനങ്ങളൊക്കെ വെള്ളത്തില്‍ വരച്ചവര പോലെയായിരിക്കുന്നു. സമ്പദ് ഘടനയുടെ വിവിധ സൂചികകള്‍ സംസാരിക്കുന്ന തെളിവായി നമ്മുടെ മുന്നില്‍ നില്‍ക്കുകയാണ്. അതിലേറ്റവും പുതിയയാണ് കറന്റ് അക്കൗണ്ട് കമ്മിയുടെ ക്രമാതീതമായ വര്‍ധന. കഴിഞ്ഞ സാമ്പത്തിക വര്‍ഷത്തിന്റെ (2016-17) ആദ്യത്തില്‍ മൊത്തം ആഭ്യന്തര ഉത്പാദനത്തിന്റെ ദശാംശം ഒരു ശതമാനമായിരുന്ന കമ്മി, 2017 - 18 സാമ്പത്തിക വര്‍ഷത്തിന്റെ ആദ്യ പാദത്തില്‍ 2.4 ശതമാനമായി ഉയര്‍ന്നു.


രാജ്യത്തിന് കയറ്റുമതിയിലൂടെ ലഭിക്കുന്ന വരുമാനത്തെ ഇറക്കുമതിക്കു വേണ്ടിവരുന്ന ചെലവുമായി താരതമ്യം ചെയ്താണ് കറന്റ് അക്കൗണ്ട് കമ്മി കണക്കാക്കുന്നത്. മൊത്തം ആഭ്യന്തര ഉത്പാദനത്തിന്റെ 2.4 ശതമാനം കമ്മിയെന്ന് പറഞ്ഞാല്‍ കയറ്റുമതിയിലൂടെ ലഭിച്ച വരുമാനത്തേക്കാള്‍ 1430 കോടി ഡോളര്‍ (ഏകദേശം 91,500 കോടി രൂപ) അധികമായി ഇറക്കുമതിക്ക് ചെലവിട്ടു എന്നാണ് അര്‍ഥം. അതായത് രാജ്യത്തു നിന്നുള്ള കയറ്റുമതിയില്‍ വലിയ ഇടിവുണ്ടായിരിക്കുന്നുവെന്ന് ചുരുക്കം. സ്വര്‍ണത്തിന്റെ ഇറക്കുമതി കൂടിയതും ഡോളറുമായുള്ള വിനിമയത്തില്‍ രൂപ ദുര്‍ബലമായി തുടരുന്നതും കമ്മി കൂടാന്‍ കാരണമായി റിസര്‍വ് ബാങ്ക് ഓഫ് ഇന്ത്യ ചൂണ്ടിക്കാട്ടുന്നുണ്ട്. സാങ്കേതികമായി ഇത് ശരിയായിരിക്കാമെങ്കിലും ഉത്പാദനം വര്‍ധിപ്പിക്കാനും ആഗോള വിപണിയില്‍ മത്സരിക്കാനും പാകത്തില്‍ ആഭ്യന്തര നിര്‍മാണ മേഖല കരുത്താര്‍ജിച്ചില്ലെന്നതാണ് വസ്തുത. കരുത്താര്‍ജിച്ചില്ലെന്ന് മാത്രമല്ല, ദുര്‍ബലമാകുകയും ചെയ്തു. അതിന് തെളിവാണ് ആഭ്യന്തര വളര്‍ച്ചാ നിരക്ക് കഴിഞ്ഞ പാദത്തില്‍ 5.7 ശതമാനത്തിലേക്ക് ഇടിഞ്ഞത്.


നരേന്ദ്ര മോദി സര്‍ക്കാര്‍ അധികാരമേറ്റയുടന്‍ വളര്‍ച്ചാ നിരക്ക് കണക്കാക്കുന്ന രീതിയില്‍ മാറ്റം വരുത്തിയിരുന്നു. (നിരക്ക് ഉയരുന്നുവെന്ന് വരുത്തിത്തീര്‍ക്കാനുള്ള നടപടിയായിരുന്നു ഇതെന്ന വിമര്‍ശം അന്ന് തന്നെ ഉയര്‍ന്നിരുന്നു) ഇതേത്തുടര്‍ന്ന് അധികാരമേറ്റതിന് ശേഷമുള്ള ഏതാനും പാദങ്ങളില്‍ വളര്‍ച്ചാ നിരക്ക് ഉയര്‍ന്നുനിന്നു. 2016 ജനുവരി മുതല്‍ മാര്‍ച്ച് വരെയുള്ള പാദത്തില്‍ 9.2 ശതമാനമായിരുന്നു നിരക്ക്. അതിന് ശേഷം തുടര്‍ച്ചയായി നിരക്ക് താഴ്ന്നു. 2016 നവംബര്‍ എട്ടിനാണ് (കു)പ്രസിദ്ധമായ നോട്ട് പിന്‍വലിക്കല്‍ നരേന്ദ്ര മോദി പ്രഖ്യാപിക്കുന്നത്. ചരക്ക് സേവന നികുതി പ്രാബല്യത്തിലാകുന്നത് ജൂലൈ ഒന്നിനും. ഇത് രണ്ടും വളര്‍ച്ചാ നിരക്കിനെ പ്രതികൂലമായി ബാധിച്ചിട്ടുണ്ട്. പക്ഷേ, ഇതിനൊക്കെ മുമ്പേ തന്നെ വളര്‍ച്ചാ നിരക്ക് ഇടിഞ്ഞുതുടങ്ങിയിരുന്നു.


സാമ്പത്തിക വളര്‍ച്ചക്ക് ഉതകും വിധത്തില്‍ നിക്ഷേപം ആകര്‍ഷിക്കാനോ ഉത്പാദന വര്‍ധനക്ക് സഹായകമാകും വിധത്തില്‍ നയങ്ങള്‍ ആവിഷ്‌കരിക്കാനോ മോദി സര്‍ക്കാറിന് സാധിച്ചില്ലെന്ന് ചുരുക്കം. അതിന്റെ കൂടെയാണ് നോട്ട് പിന്‍വലിച്ചതോടെ സൃഷ്ടിക്കപ്പെട്ട സ്തംഭനാവസ്ഥ. സാമ്പത്തിക വളര്‍ച്ചയിലേക്ക് നിര്‍ണായക സംഭാവനകള്‍ ചെയ്യുന്ന കൃഷി, ചെറുകിട - ഇടത്തരം വ്യവസായങ്ങള്‍, റിയല്‍ എസ്റ്റേറ്റ് എന്നിവയെയൊക്കെ നോട്ട് പിന്‍വലിക്കല്‍ ബാധിച്ചു. ഇതില്‍ കൃഷി, ചെറുകിട - ഇടത്തരം വ്യവസായങ്ങള്‍ എന്നിവയിലുണ്ടായ പ്രതിസന്ധി പരിഹരിക്കുന്നതിന് ഇനിയും കാലമെടുക്കും. അതായത് ഈ മേഖലയില്‍ നിന്ന് വളര്‍ച്ചാ നിരക്കിലേക്കുള്ള സംഭാവന കുറഞ്ഞുതന്നെ നില്‍ക്കും. ഇവിടങ്ങളില്‍ പുതുതായി തൊഴിലവസരങ്ങള്‍ സൃഷ്ടിക്കപ്പെടുകയുമില്ല.


ഉത്പാദനത്തിലുണ്ടാകുന്ന ഈ ഇടിവാണ് കയറ്റുമതിയെ പ്രതികൂലമായി ബാധിക്കുന്നത്. അതുകൊണ്ടാണ് കറന്റ് അക്കൗണ്ട് കമ്മി, സമീപകാലത്തെ ഉയര്‍ന്ന നിലയിലേക്ക് എത്തിയതും. ഈ അവസ്ഥ തത്കാലത്തേക്കൊന്നും പരിഹരിക്കപ്പെടില്ലെന്നാണ് വളര്‍ച്ചാ നിരക്കിലുണ്ടായ ഇടിവ് കാണിക്കുന്നത്. ചെറുതല്ലാത്ത സാമ്പത്തിക പ്രതിസന്ധിയിലേക്കാണ് രാജ്യം നീങ്ങുന്നത് എന്ന് ചുരുക്കം. അടിസ്ഥാന സൗകര്യ വികസന മേഖലയിലെ വലിയ പദ്ധതികളെ പ്രയോജനപ്പെടുത്തി വളര്‍ച്ചാ വേഗം കൂട്ടുക എന്നത് മാത്രമാണ് തത്കാലം സര്‍ക്കാറിന് മുന്നിലുള്ള മാര്‍ഗം. എന്നാല്‍ അതിലും കാര്യമായൊന്നും മുന്നേറാനായിട്ടില്ലെന്നാണ് സര്‍ക്കാറിന്റെ കണക്കുകള്‍ തന്നെ സൂചിപ്പിക്കുന്നത്.

പ്രധാനമന്ത്രി പദം ഏറ്റെടുത്തതിന് ശേഷം പ്രഖ്യാപിച്ച പല പദ്ധതികളും പ്രയോഗത്തിലേക്ക് എത്തിയിട്ടില്ല. മുന്‍ സര്‍ക്കാറുകളുടെ കാലത്ത് ആരംഭിക്കുകയും തുടരുകയും ചെയ്യുന്ന പദ്ധതികളുടെ വേഗം കൂട്ടാനും സാധിച്ചിട്ടില്ല. 16.9 ലക്ഷം കോടി മുതല്‍ മുടക്ക് പ്രതീക്ഷിക്കുന്ന 1201 പദ്ധതികളില്‍ 25 ശതമാനവും ലക്ഷ്യമിട്ട വേഗത്തില്‍ മുന്നോട്ടുപോകുന്നില്ല. ഇതില്‍ പലതിന്റെയും ചെലവ് ആദ്യം കണക്കാക്കിയതിലും വര്‍ധിക്കുകയും ചെയ്തിരിക്കുന്നു. മുന്‍ സര്‍ക്കാറുകളുടെ കാലത്ത് ഏത് വിധത്തിലാണോ പദ്ധതികള്‍ നടന്നിരുന്നത്, ആ പാതയില്‍ നിന്ന് വലിയ മാറ്റമുണ്ടായിട്ടില്ല. കല്‍ക്കരി, ഊര്‍ജം, റെയില്‍വേ, പെട്രോളിയം തുടങ്ങിയ മേഖലകളിലെ പദ്ധതികളാണ് ഇവ്വിധം ഇഴയുന്നത്. പദ്ധതി നടത്തിപ്പിന് പണം കണ്ടെത്താനാകാത്തതും ഭൂമി യഥാസമയം ഏറ്റെടുക്കാനാകാത്തതും പരിസ്ഥിതി അനുമതി ലഭിക്കാത്തതുമൊക്കെയാണ് പ്രധാന തടസ്സങ്ങള്‍. ഈ മേഖലകളില്‍ തന്നെയാണ് പുതിയ പദ്ധതികള്‍ സര്‍ക്കാര്‍ ആവിഷ്‌കരിക്കുന്നതും. കൊട്ടിഘോഷിക്കപ്പെട്ട സ്വച്ഛ് ഭാരത്, സ്മാര്‍ട്ട് സിറ്റികള്‍ തുടങ്ങിയവയും വലിയതോതില്‍ മുന്നേറിയിട്ടില്ല.


പെട്രാളിയം ഉത്പന്നങ്ങളുടെ സബ്‌സിഡി ഏതാണ്ട് ഇല്ലാതാക്കുകയും കസ്റ്റംസ് നികുതി പലകുറി ഉയര്‍ത്തുകയും ചെയ്യുക വഴി പ്രതിവര്‍ഷം സര്‍ക്കാറിനുള്ള അധിക വരുമാനം രണ്ടര ലക്ഷം കോടിയാണ്. മറ്റു സബ്‌സിഡികള്‍ പരിമിതപ്പെടുത്തിയതിലൂടെ കേന്ദ്ര ഖജനാവിലേക്ക് മുതല്‍ക്കൂട്ടിയ കോടികള്‍ വേറെ. ഇതൊക്കെയായിട്ടും നിര്‍മാണത്തിന്റെ വിവിധ ഘട്ടങ്ങളിലുള്ള പദ്ധതികള്‍ വേഗത്തില്‍ പൂര്‍ത്തായാക്കാന്‍ പാകത്തിലുള്ള പണം കണ്ടെത്താന്‍ സര്‍ക്കാറിന് സാധിക്കുന്നില്ല. നോട്ട് പിന്‍വലിച്ചതോടെ, കള്ളപ്പണത്തിന്റെ സമാന്തര സമ്പദ് വ്യവസ്ഥ ഇല്ലാതായെന്നും ബേങ്കുകളുടെ സാമ്പത്തിക നില മെച്ചപ്പെട്ടുവെന്നുമാണ് അവകാശവാദം. വന്‍കിട പദ്ധതികള്‍ക്ക് വായ്പ ലഭ്യമാക്കാനുള്ള ശേഷി ബേങ്കുകള്‍ക്ക് ഉണ്ടായെന്നും. എന്നാല്‍ ഇതും പണമൊഴുകാന്‍ സഹായിക്കുന്നില്ലെന്നാണ്, കേന്ദ്ര സര്‍ക്കാറിന്റെ തന്നെ അവലോകന റിപ്പോര്‍ട്ടില്‍ നിന്ന് മനസ്സിലാകുന്നത്.


'ഇന്ത്യ തിളങ്ങുന്നു' എന്ന മുദ്രാവാക്യം പരാജയപ്പെട്ട അവസ്ഥയിലേക്ക് നീങ്ങുകയാണ് നരേന്ദ്ര മോദി ബ്രാന്‍ഡും. അത് കൂടുതല്‍ വ്യക്തമാകും വരും നാളുകളില്‍. ഈ സാമ്പത്തിക പ്രതിസന്ധിയുടെ മറുപുറം, തീവ്ര അജന്‍ഡകള്‍ കൂടുതല്‍ ശക്തമായി മുന്നോട്ടുവെക്കപ്പെടുമെന്നതാണ്. വികസനനായകന്‍ എന്ന നിലക്കല്ല, വംശഹത്യാ ശ്രമത്തിലൂടെയും വ്യാജ ഏറ്റുമുട്ടലുകളിലൂടെയും സൃഷ്ടിച്ച ഭീതിയുടെ അന്തരീക്ഷം മുതലെടുത്താണ് നരേന്ദ്ര മോദി വ്യാഴവട്ടത്തിലേറെക്കാലം ഗുജറാത്ത് ഭരിച്ചത്. അതേ മാതൃക രാജ്യത്തേക്ക് വ്യാപിപ്പിക്കാന്‍, ഇതിനകം ആരംഭിച്ച നീക്കങ്ങള്‍ കൂടുതല്‍ ഊര്‍ജിതമാകാനാണ് ഇട. ജനങ്ങളെ കൂടുതല്‍ ഭിന്നിപ്പിച്ച്, സാമ്പത്തിക പ്രതിസന്ധി അഭിമുഖീകരിക്കുന്നതിനൊപ്പം സാമൂഹിക സംഘര്‍ഷങ്ങളുടെ ആധിക്യത്തിന് കൂടി രാജ്യം വേദിയായേക്കും. കറന്റ് അക്കൗണ്ടിലെ കമ്മി നികത്താന്‍ സംഘ്പരിവാരം എക്കാലവും ഉപയോഗപ്പെടുത്തുന്നത്, വര്‍ഗീയവിഷത്തെയാണ്.

2017-09-11

അടവ്, അങ്കത്തട്ടറിഞ്ഞാകുമോ?


''ശക്തമായ സി പി ഐ (എം) കെട്ടിപ്പടുക്കണം. ഇടത് ഐക്യം വ്യാപിപ്പിക്കണം. ഇടത്, ജനാധിപത്യ ശക്തികളെ ഒന്നിച്ചു നിര്‍ത്താന്‍ സാധിക്കണം. അതുവഴി ഇടത് ജനാധിപത്യ മുന്നണി രൂപവത്കരിക്കാനാകണം'' - ഇരുപത്തിയൊന്നാം പാര്‍ട്ടി കോണ്‍ഗ്രസ് വിശാഖപട്ടണത്ത് സമാപിച്ചപ്പോള്‍ ആവിഷ്‌കരിച്ച അടവ് നയമാണ് വിവരിച്ചത്. ഈ അടവ് നയത്തിന്റെ ആവിഷ്‌കരണത്തിന് അടിസ്ഥാനമാക്കിയ, പാര്‍ട്ടി കൊണ്‍ഗ്രസ് അംഗീകരിച്ച രാഷ്ട്രീയ സമീപന രേഖയില്‍ ഇവ്വിധം പറയുന്നു - ''ബി ജെ പി, കോണ്‍ഗ്രസ്, മറ്റ് ബൂര്‍ഷ്വ - ഭൂവുടമ ശക്തികള്‍ എന്നിവകക്കുള്ള യഥാര്‍ത്ഥ ബദല്‍ ഇടത് ജനാധിപത്യ മുന്നണിയാണ്. ഇത് ജനകീയ ജനാധിപത്യ മുന്നണിയായിരിക്കണം. തെരഞ്ഞെടുപ്പോ സര്‍ക്കാര്‍ രൂപവത്കരണമോ മാത്രം ലക്ഷ്യമിട്ടുള്ളതാകരുത് ഈ മുന്നണി. തൊഴിലാളികള്‍, കര്‍ഷകര്‍, കര്‍ഷകത്തൊഴിലാളികള്‍, ഇടത്തരക്കാര്‍, ചെറുകിട കച്ചവടക്കാര്‍ എന്ന് തുടങ്ങി വിവിധ വിഭാഗങ്ങളെയൊക്കെ പ്രതിനിധാനം ചെയ്യുന്ന ഒന്നായിരിക്കണം''. (എന്നുവെച്ചാല്‍ ജനകീയ ജനാധിപത്യ വിപ്ലവമെന്ന സി പി എം പരിപാടി നടപ്പാക്കാന്‍ പാകത്തിലുള്ള മുന്നണി).


2015ല്‍ സി പി എമ്മിന്റെ 21-ാം പാര്‍ട്ടി കോണ്‍ഗ്രസ് നടക്കുമ്പോള്‍, ലോക്‌സഭയില്‍ ബി ജെ പി കേവല ഭൂരിപക്ഷം നേടി, നരേന്ദ്ര മോദിയുടെ ഏകാധിപത്യച്ഛായയുള്ള ഭരണം ഒരു വര്‍ഷം പിന്നിട്ടിരുന്നു. തീവ്ര ഹിന്ദുത്വ അജന്‍ഡകളുടെ നടപ്പാക്കലിനുള്ള അരങ്ങൊരുക്കല്‍ സംഘ്പരിവാരം തുടങ്ങുകയും ചെയ്തിരുന്നു. അതുകൊണ്ടുതന്നെ ബി ജെ പി - ആര്‍ എസ് എസ് സംയുക്തത്തിനെതിരെ രാഷ്ട്രീയ - പ്രത്യയശാസ്ത്ര സമരത്തിനാണ് മുന്‍തൂക്കം നല്‍കേണ്ടത് എന്ന് വിശാഖപട്ടണം കോണ്‍ഗ്രസ് വിലയിരുത്തി. വര്‍ഗീയതക്കെതിരായ പോരാട്ടം ഒറ്റക്ക് നടത്തിയാല്‍ പോരെന്നും നവ ഉദാരവത്കരണ നയങ്ങള്‍ക്കെതിരായ പോരാട്ടവുമായി യോജിപ്പിക്കേണ്ടതാണെന്നും സി പി എം തീരുമാനിച്ചു. നവ ഉദാരവത്കരണ നയങ്ങള്‍ പിന്തുടര്‍ന്ന കോണ്‍ഗ്രസ് നേതൃത്വം നല്‍കിയ യു പി എ സര്‍ക്കാറിന്റെ ജനവിരുദ്ധ നയങ്ങളും കൊടിയ അഴിമതിയുമാണ് ബി ജെ പിക്ക് ജനപിന്തുണയുണ്ടാക്കിക്കൊടുത്തതെന്നും പാര്‍ട്ടി വിലയിരുത്തി. കോണ്‍ഗ്രസിനെ തുടര്‍ന്നും എതിര്‍ക്കുമെന്ന് തീരുമാനിച്ചു. ആ തീരുമാനത്തെ പാര്‍ട്ടി പ്രവര്‍ത്തകര്‍ക്കും അനുഭാവികള്‍ക്കും വ്യക്തമാകും വിധത്തില്‍, രാഷ്ട്രീയ നയരേഖയില്‍ ഇങ്ങനെ രേഖപ്പെടുത്തി - ''കോണ്‍ഗ്രസുമായി ധാരണയോ തെരഞ്ഞെടുപ്പ് സഖ്യമോ പാര്‍ട്ടിക്ക് ഉണ്ടാകില്ല'.


സി പി എമ്മിന്റെ കൂടി പിന്തുണയോടെ അധികാരത്തിലിരുന്ന ഒന്നാം യു പി എ സര്‍ക്കാറിന്റെ കാലത്തെ നടപടികളുടെ പേരില്‍ ഉയര്‍ന്ന അഴിമതി ആരോപണങ്ങളാണ് രണ്ടാം യു പി എ സര്‍ക്കാറിന്റെ (അതിന് സി പി എം പിന്തുണയുണ്ടായിരുന്നില്ല) കാലത്ത് പുറത്തേക്കുവന്നത്. നിറംപിടിപ്പിച്ച നുണകളുടെ അകമ്പടിയോടെ നരേന്ദ്ര മോദി നടത്തിയ പ്രചാരണത്തിന് സാധുത നല്‍കുന്നതില്‍ ഈ ആരോപണങ്ങള്‍ വലിയ പങ്കുവഹിച്ചു. ആ നിലക്ക്, കോണ്‍ഗ്രസ് നേതൃത്വത്തിലുണ്ടായിരുന്ന യു പി എ സര്‍ക്കാറാണ്, ബി ജെ പിക്ക് അധികാരത്തിലേക്ക് വഴിതുറന്നത് എന്ന് പറയാം. സ്വാതന്ത്ര്യ സമരകാലത്തും സ്വാതന്ത്ര്യാനന്തരമുള്ള കാലത്തും കോണ്‍ഗ്രസ് പിന്തുടര്‍ന്നിരുന്ന മൃദുഹിന്ദുത്വ നയങ്ങള്‍ ആര്‍ എസ് എസ്സിനും അവരുടെ രാഷ്ട്രീയ രൂപങ്ങള്‍ക്കും ജനമനസ്സില്‍ വേരോട്ടമുണ്ടാക്കിക്കൊടുത്തിട്ടുണ്ട് എന്ന് വിശാലമായ അര്‍ഥത്തില്‍ പറയാം. ഭൂരിപക്ഷ വര്‍ഗീയതയെ പ്രീണിപ്പിക്കുക എന്ന ഉദ്ദേശ്യത്തില്‍ കോണ്‍ഗ്രസ് സര്‍ക്കാറുകളെടുത്ത പല തീരുമാനങ്ങളും തീവ്ര വര്‍ഗീയ അജന്‍ഡകളെ മുന്നോട്ടുവെക്കാന്‍ ആര്‍ എസ് എസ്സിന് വഴിതുറന്നുകൊടുത്തിട്ടുണ്ടെന്നും പറയാം. അതിന്റെ ശരിതെറ്റുകള്‍ വിലയിരുത്തി, നേരിടേണ്ട ഭീഷണിയാണോ ഇന്ത്യന്‍ യൂനിയന്‍ ഇപ്പോള്‍ അഭിമുഖീകരിക്കുന്നത് എന്നതാണ് പ്രധാനം.


യു പി എ സര്‍ക്കാറിന്റെ കൊടിയ അഴിമതിയും ജനവിരുദ്ധ നയങ്ങളും ബി ജെ പിക്ക് വഴിയൊരുക്കിയെന്ന് പറയുമ്പോള്‍, ഒന്നാം യു പി എ സര്‍ക്കാറിന്റെ കാലത്ത് അഴിമതിക്ക് കളമൊരുങ്ങിയപ്പോള്‍ അതുമനസ്സിലാക്കി ചെറുക്കാന്‍ തങ്ങള്‍ക്ക് സാധിച്ചില്ലെന്ന കുറ്റസമ്മതം കൂടിയാണ് സി പി എം നടത്തുന്നത്. അഴിമതി സാധ്യത മനസ്സിലാക്കി ചെറുക്കാന്‍ ശ്രമിച്ചപ്പോള്‍, അതിനെ ജനപിന്തുണയായി വളര്‍ത്തി, പാര്‍ലിമെന്ററി രാഷ്ട്രീയത്തില്‍ മുന്നോട്ടുപോകാന്‍ സാധിച്ചില്ലെന്ന് കൂടിയാണ്. ജനപിന്തുണ വര്‍ധിച്ചില്ലെന്ന് മാത്രമല്ല, വലിയ സ്വാധീനമുണ്ടായിരുന്ന പശ്ചിമ ബംഗാളില്‍ അത് തകരുക കൂടിയാണ് സംഭവിച്ചത് (ആ തകര്‍ച്ചക്ക് മറ്റു കാരണങ്ങള്‍ ഉണ്ടെങ്കിലും).


കോണ്‍ഗ്രസ് തുടക്കമിടുകയയും 1991മുതല്‍ അമിത വേഗത്തില്‍ നടപ്പാക്കാന്‍ ആരംഭിക്കുകയും ചെയ്ത സാമ്പത്തിക പരിഷ്‌കരണ - ഉദാരവത്കരണ നയങ്ങളെ കൂടുതല്‍ വേഗത്തില്‍ നടപ്പാക്കുകയാണ് ബി ജെ പി ചെയ്യുന്നത്. 1998 മുതല്‍ 2004 വരെ ബി ജെ പിയുടെ നേതൃത്വത്തില്‍ എന്‍ ഡി എ അധികാരത്തിലിരുന്ന കാലത്ത് നടപ്പാക്കിയതിനേക്കാള്‍ ഊര്‍ജിതമായാണ് ഇപ്പോള്‍ നടപ്പാക്കുന്നത് എന്ന വ്യത്യാസമേയുള്ളൂ. 1998 മുതല്‍ 2004 വരെ വാജ്പയി സര്‍ക്കാറിന്റെ കാലത്ത് അടിത്തറയിട്ട അഴിമതികളാണ് (ടെലികോമും കല്‍ക്കരിയും) ഒന്നാം യു പി എ സര്‍ക്കാറിന്റെ കാലത്ത് ഭീമാകാരം ആര്‍ജിച്ചത്. അഴിമതിയുടെ കാര്യത്തിലും ഇവര്‍ക്കുതമ്മില്‍ വലിയ ഭിന്നതയില്ലെന്ന് അര്‍ഥം. അക്കാര്യങ്ങള്‍ ജനങ്ങളിലെത്തിക്കുന്നതില്‍ സി പി എമ്മിനും ഇടതുപക്ഷത്തിനും സംഭവിച്ച വലിയ വീഴ്ച കൂടിയാണ് കോണ്‍ഗ്രസിന് ബദലായി ബി ജെ പിയെ വളര്‍ത്തിയത്. അത്തരത്തിലൊരു ബദലായി വളരാനോ ബദല്‍ സഖ്യത്തെ ശക്തിപ്പെടുത്തി നിര്‍ത്താനോ സി പി എമ്മിനോ ഇടതു പാര്‍ട്ടികള്‍ക്കോ സാധിച്ചില്ല. വര്‍ഗ വൈരുധ്യത്തില്‍ അധിഷ്ഠിതമായി മാത്രം, ഭിന്ന സ്വത്വങ്ങളില്‍ അധിഷ്ഠിതമായ ജനതയെ രാഷ്ട്രീയമായി ഏകോപിപ്പിക്കാനാകില്ല എന്ന തിരിച്ചറിവ് അവര്‍ക്കുണ്ടായില്ല, ഇപ്പോഴുമുണ്ടാകുന്നില്ല. അതുകൊണ്ട് തന്നെ കോണ്‍ഗ്രസിനും ബി ജെ പിക്കും ബദലായ രാഷ്ട്രീയ ധാരയുണ്ടാകണമെന്ന ആഗ്രഹം ആഗ്രഹമായി തന്നെ തുടര്‍ന്നു.


1978ലെ പത്താം പാര്‍ട്ടി കോണ്‍ഗ്രസാണ് ഇടത് ജനാധിപത്യ സഖ്യമെന്ന ആശയം ആദ്യമായി മുന്നോട്ടുവെക്കുന്നത്. നാല് ദശകം പിന്നിടുമ്പോള്‍ പ്രാവര്‍ത്തികമായ ഇടങ്ങളില്‍ പോലും ആ സഖ്യം ദുര്‍ബലമായ കാഴ്ചയാണ് കാണുന്നത്. എന്നിട്ടും വിശാഖപട്ടണം കോണ്‍ഗ്രസ് ഈ സഖ്യമാണ് രാജ്യത്തിന് ഉചിതമായ ബദലെന്ന കാഴ്ചപ്പാട് ആവര്‍ത്തിച്ചു. സി പി എമ്മിനെ കൂടുതല്‍ ശക്തമാക്കണമെന്നും നിശ്ചയിച്ചു. മൂന്ന് വര്‍ഷം പിന്നിടുമ്പോള്‍ പാര്‍ട്ടിയെ ശക്തിപ്പെടുത്തുക എന്ന തീരുമാനം സ്വപ്‌നമായി ശേഷിക്കുന്നു. കേരളം, ബംഗാള്‍, ത്രിപുര എന്നിവക്കപ്പുറത്ത് ഇടതു ജനാധിപത്യ സഖ്യമെന്നത് മരീചികയുമാണ്. ഈ സാഹചര്യത്തിലാണ്, നിലനില്‍ക്കുന്ന രാഷ്ട്രീയ സാഹചര്യങ്ങള്‍ വിലയിരുത്തി അടവു നയത്തില്‍ മാറ്റം വരുത്തുന്ന കാര്യം 22-ാം പാര്‍ട്ടി കോണ്‍ഗ്രസ് പരിശോധിക്കുമെന്ന് സി പി എം ജനറല്‍ സെക്രട്ടറി സീതാറാം യെച്ചൂരി പറയുന്നത്.


ബി ജെ പി - ആര്‍ എസ് എസ് സംയുക്തത്തെ മുഖ്യമായി എതിര്‍ക്കുമ്പോള്‍ തന്നെ കോണ്‍ഗ്രസിനെയും എതിര്‍ക്കുക എന്ന നയം മാറുകയെന്നതാണ് അടവുനയത്തില്‍ വരാനുള്ള ഏകമാറ്റം. അതിലേക്ക് വലിയ ആലോചനകള്‍ ഇനിയും വേണ്ടതുണ്ടെന്ന് സി പി എമ്മിന് ഇപ്പോഴും തോന്നുന്നുവെങ്കില്‍ ആ പാര്‍ട്ടി, സമകാലിക രാഷ്ട്രീയ യാഥാര്‍ഥ്യങ്ങളെ എത്രത്തോളം ഗൗരവത്തിലാണ് കാണുന്നത് എന്ന് സംശയിക്കേണ്ടിവരും.


കോണ്‍ഗ്രസിന് ഒറ്റക്ക് ഇന്ത്യന്‍ യൂനിയനില്‍ അധികാരത്തില്‍ വരാനാകില്ലെന്ന് 1990കളുടെ ആദ്യത്തോടെ തെളിഞ്ഞതാണ്. ആ പാര്‍ട്ടിക്ക് സ്വാധീനമുള്ള സംസ്ഥാനങ്ങളുടെ എണ്ണം ക്രമേണ കുറഞ്ഞുവരികയും ചെയ്യുന്നു. പ്രാദേശിക പാര്‍ട്ടികള്‍, ജനതാപാര്‍ട്ടി ചിതറിത്തെറിച്ചുണ്ടാകുകയും മണ്ഡല്‍ രാഷ്ട്രീയത്തോടെ കരുത്താര്‍ജിക്കുകയും ഏറിയും കുറഞ്ഞും അത് നിലനിര്‍ത്തുകയും ചെയ്യുന്ന ദളങ്ങള്‍, ഇടതു പാര്‍ട്ടികള്‍ ഒക്കെ ചേര്‍ന്നാലേ ഏകാധിപതിയെയും അദ്ദേഹത്തിന്റെ കീഴിലുള്ള പാര്‍ട്ടിയെയും എതിരിട്ടുനോക്കാനെങ്കിലും സാധിക്കൂ എന്നതാണ് സ്ഥിതി. അതുണ്ടായാല്‍പ്പോലും സംഘ്പരിവാരം ഉയര്‍ത്തിവിടുന്ന വിദ്വേഷ - വര്‍ഗീയ രാഷ്ട്രീയത്തെ ഏതളവില്‍ പ്രതിരോധിക്കാനാകുമെന്ന് സംശയം. അപ്പോഴാണ് കോണ്‍ഗ്രസിനോടുള്ള ബന്ധം എങ്ങനെ വേണമെന്നതില്‍ കൂലംകഷമായ ആലോചനക്ക് സി പി എം തയ്യാറാകുന്നത്, ആ നിലപാട് അംഗീകരിക്കാനാകില്ലെന്ന് കോണ്‍ഗ്രസ് മുഖ്യ എതിരാളിയാകയാല്‍ കേരളത്തിലെ സി പി എം നേതാക്കള്‍ പരോക്ഷമായി പറയുന്നത്.


2004ലെ ലോക്‌സഭാ തിരഞ്ഞെടുപ്പില്‍ കോണ്‍ഗ്രസുമായി ധാരണയുണ്ടാക്കി മത്സരിച്ചിരുന്നുവെന്നതും അത്, കേരളത്തിലെ തിരഞ്ഞെടുപ്പുഫലത്തെ ഒരു വിധത്തിലും ബാധിച്ചിരുന്നില്ലെന്നതും ഇവരുടെ ഓര്‍മയിലേ ഇല്ലെന്ന് തോന്നുന്നു. തിരുവനന്തപുരത്ത് കോണ്‍ഗ്രസ് നേതൃത്വത്തിലുള്ള യു ഡി എഫും ഇടതുപക്ഷവും നേര്‍ക്കുനേര്‍ മത്സരിച്ചപ്പോള്‍, തൊട്ടയല്‍പക്കത്ത് കോണ്‍ഗ്രസ് അധ്യക്ഷ സോണിയാ ഗാന്ധിയും സി പി എം നേതാവ് ഹര്‍കിഷന്‍ സിംഗ് സുര്‍ജിതും  വേദി പങ്കിട്ട്, ഒരു മുന്നണിക്കായി വോട്ടുചോദിച്ചിരുന്നു.
നവ ഉദാരവത്കരണ നയങ്ങളാണോ അക്രമോത്സുകവും അധിനിവേശോദ്യുക്തവുമായ തീവ്ര ഹിന്ദുത്വ നയങ്ങളാണോ കൂടുതല്‍ അപകടകരമെന്ന് ഇപ്പോള്‍ ചിന്തിക്കുമ്പോള്‍, നവ ഉദാരവത്കരണ നയങ്ങള്‍ വര്‍ഗീയതക്ക് വളമായിട്ടുണ്ടെന്ന വാദമുയര്‍ത്തി, രണ്ടിനെയും ഒരുപോലെ എതിര്‍ക്കണമെന്ന് ന്യായം പറയുന്നത് മരണം ചോദിച്ചുവാങ്ങുന്നതിന് തുല്യമാണ്.


നവ ഉദാരവത്കരണ നയങ്ങളില്‍ നിന്ന് മാറിക്കൊണ്ട്, സോഷ്യലിസ്റ്റ് സമ്പദ് വ്യവസ്ഥയിലേക്ക് മാറുക എന്നത് സി പി എം ഒറ്റക്ക് അധികാരത്തില്‍ വന്നാല്‍പ്പോലും അസാധ്യമാണെന്ന് അറിയാത്തവരല്ല ഈ വാദമുയര്‍ത്തുന്നത്. വന്‍കിടക്കാര്‍ക്ക് വലിയ അവസരങ്ങള്‍ തുറന്നിടുകയും പാവപ്പെട്ടവരെ കൂടുതല്‍ ദുരിതത്തിലേക്ക് തള്ളിവിടുകയും ചെയ്യുന്ന വിധത്തിലാണ് പുതിയ സാമ്പത്തിക പരിഷ്‌കാരങ്ങള്‍ പലതും നടപ്പാക്കുന്നത്. അതിലൊരു മാറ്റമുണ്ടാക്കുക എന്നത് മാത്രമേ കരണീയമായുള്ളൂ. ഉദാരവത്കരണം രാജ്യത്തെ ജനങ്ങളെ എങ്ങനെ സ്വാധീനിച്ചിരിക്കുന്നുവെന്ന് പഠിക്കാനും അതിനനുസരിച്ച് രാഷ്ട്രീയ നിലപാടുകളില്‍ മാറ്റം വരുത്താനും ശ്രമിക്കുമെന്ന് നേരത്തെ സി പി എം പ്രഖ്യാപിച്ചിരുന്നു. അതിലേക്ക് മാറുകയും കമ്മ്യൂണിസ്റ്റ് സ്വഭാവം നിലനിര്‍ത്തുക എന്നതിനപ്പുറത്ത് സ്വാതന്ത്ര്യവും ജനാധിപത്യവും മതനിരപേക്ഷതയും നിലനില്‍ക്കുകയും പൗരാവകാശങ്ങള്‍ സംരക്ഷിക്കപ്പെടുന്നുവെന്ന് ഉറപ്പാക്കുകയുമാണ് ഇപ്പോഴത്തെ ആവശ്യമെന്ന് മനസ്സിലാക്കുകയാണ് വേണ്ടത്. അതുണ്ടാകുന്നില്ലെങ്കില്‍ വര്‍ഗീയ ഫാസിസത്തിനെതിരായ ഉറച്ച നിലപാടുകാരാണ് 'ഞങ്ങളെ'ന്ന അവകാശവാദം കവലപ്രസംഗങ്ങളില്‍ മാത്രമേ ഉണ്ടാകൂ. വൈകാതെ, ആ അവകാശവാദം കവല പ്രസംഗങ്ങളില്‍ പോലും ഉന്നയിക്കാന്‍ സാധിക്കാത്ത അവസ്ഥയുണ്ടാകുകയും ചെയ്യും.


നിലനില്‍പ്പ് ഒരു വലിയ ചോദ്യമായി മുന്നിലുണ്ടെന്നും ആ ചോദ്യം പാര്‍ട്ടി മാത്രമല്ല, ഭരണഘടന വിഭാവനം ചെയ്യുന്ന മതനിരപേക്ഷ ജനാധിപത്യ സംവിധാനവും നേരിടുന്നതാണെന്നും നേതാക്കള്‍ സ്വയം മനസ്സിലാക്കുകയാണ് ആദ്യം വേണ്ടത്. പാര്‍ട്ടിയുടെ സാധാരണ പ്രവര്‍ത്തകരും അനുഭാവികളുമൊക്കെ ഇത് വളരെ നേരത്തെ മനസ്സിലാക്കിയിട്ടുണ്ട്. അതിനനുസരിച്ച് നയം നിശ്ചയിച്ച് നടപ്പാക്കുന്നതിന് പാര്‍ട്ടി കോണ്‍ഗ്രസ് വരെ പോലും കാത്തിരിക്കേണ്ട ആവശ്യം ഇപ്പോഴില്ല. മുഖ്യ ശത്രുവിനെ മാത്രമല്ല, അവര്‍ക്ക് വളരാന്‍ പാകത്തിലുള്ള നയങ്ങള്‍ പിന്തുടര്‍ന്നവരെ/പിന്തുടരുന്നവരെ കൂടി എതിര്‍ക്കണമെന്ന വാദം തത്വത്തില്‍ ശരിയായിരിക്കാം. പക്ഷേ, രാജ്യമെത്തിനില്‍ക്കുന്ന  വലിയ അപകടം പരിഗണിക്കുമ്പോള്‍ അത് പ്രായോഗികമല്ല.

2017-09-09

കശാപ്പ് (നിറയൊഴിച്ചും അല്ലാതെയും)


വര്‍ധിച്ചുവരുന്ന അസഹിഷ്ണുതയെക്കുറിച്ചാണ് നമ്മള്‍ സംസാരിക്കുന്നത്. ഭരണകൂടത്തിന്റെ, അതിന് നേതൃത്വം നല്‍കുന്നവരുടെ, അവരുള്‍ക്കൊള്ളുന്ന പാര്‍ട്ടിയുടെ, അതിനെ നിയന്ത്രിക്കുന്ന 'സാംസ്‌കാരിക സംഘടന'യുടെ, അതിന് കീഴിലുള്ള പരിവാരത്തിന്റെ ഒക്കെ അജന്‍ഡകളോടും പ്രവൃത്തികളോടുമുള്ള എതിര്‍പ്പുകളെ അടിച്ചൊതുക്കുന്നതിനെയാണ് പൊതുവില്‍ അസഹിഷ്ണുത എന്ന വാക്കുകൊണ്ട് അര്‍ഥമാക്കുന്നത്. ആ അളവില്‍ മാത്രമാണോ നരേന്ദ്ര മോദിയാല്‍ ഭരിക്കപ്പെടുന്ന ഇന്ത്യന്‍ യൂനിയനില്‍ അരങ്ങേറുന്ന അതിക്രമങ്ങളെ കാണേണ്ടത്? ഭരണഘടന ഉറപ്പുനല്‍ക്കുന്ന സ്വാതന്ത്ര്യങ്ങളിലുള്ള അധിനിവേശമാണ് യഥാര്‍ഥത്തില്‍ നടക്കുന്നത്. അതിനെ അസഹിഷ്ണുത എന്ന വൃത്തത്തിലേക്ക് ചുരുക്കുന്നത്, അപകടത്തെ അതിന്റെ ആഴത്തില്‍ മനസ്സിലാക്കാതെയാണെന്ന് കരുതേണ്ടിയിരിക്കുന്നു. ആ അധിനിവേശത്തിന്റെ പുതിയ ഇരയാണ് ഗൗരി ലങ്കേഷ്.


തീവ്ര ഹിന്ദുത്വത്തെ, അധികാരസ്ഥാപനത്തിന് അതുപയോഗിക്കുന്ന വര്‍ഗീയ ധ്രുവീകരണത്തെ ഒക്കെ നിശിതമായി വിമര്‍ശിച്ചിരുന്നു ഗൗരി ലങ്കേഷ്. തീവ്ര ഹിന്ദുത്വം രാജ്യത്തിന്റെ ജനാധിപത്യത്തെ, മതനിരപേക്ഷ സ്വഭാവത്തെ ഇല്ലാതാക്കുകയും സ്വതന്ത്ര വായു നിഷേധിക്കുകയും ചെയ്യുമെന്ന് ഏറെ നേരത്തെ തിരിച്ചറിഞ്ഞിരുന്നു അവര്‍. രാമക്ഷേത്ര നിര്‍മാണം ലക്ഷ്യമിട്ട് എല്‍ കെ അഡ്വാനി രഥയാത്ര നടത്തിയപ്പോള്‍, അതിന്റെ ചുവടുപിടിച്ച് വര്‍ഗീയ സംഘര്‍ഷങ്ങള്‍ സൃഷ്ടിക്കപ്പെട്ടപ്പോള്‍, ബാബരി മസ്ജിദ് തകര്‍ത്ത് ന്യൂനപക്ഷത്തെ അരക്ഷിതാവസ്ഥയിലേക്ക് തള്ളിവിട്ടപ്പോള്‍, ഗുജറാത്തില്‍ വംശഹത്യാ ശ്രമം അരങ്ങേറിയപ്പോള്‍ ഒക്കെ ഗൗരി തന്റെ ഉറച്ച അഭിപ്രായം ഉറക്കെ പ്രഖ്യാപിച്ചിരുന്നു. ലങ്കേഷ് പത്രികയിലും പിന്നീട് സ്വന്തമായി ആരംഭിച്ച ഗൗരി ലങ്കേഷ് പത്രിക എന്ന ടാബ്ലോയിഡിലും മറ്റ് പത്രങ്ങളിലും എഴുതിയ ലേഖനങ്ങളിലൂടെ മാത്രമല്ല, തെരുവില്‍ ഉയര്‍ന്ന പ്രതിഷേധ സ്വരങ്ങളിലും അവരുടെ ശബ്ദമുയര്‍ന്നിരുന്നു. അത്തരത്തിലൊരാളെ വെടിവെച്ചിടുമ്പോള്‍ സമാന ആശയക്കാരായ മറ്റു നിരവധി പേര്‍ക്കുള്ള മുന്നറിയിപ്പാണത്. നരേന്ദ്ര ധാബോല്‍ക്കറെയും ഗോവിന്ദ് പന്‍സാരെയെയും എം എം കല്‍ബര്‍ഗിയെയും വധിച്ചതിലൂടെ സൃഷ്ടിച്ച ഭീതിയുടെ ആവരണം കുറേക്കൂടി കനത്തതാക്കുകയാണ്.


2014ലെ ലോക്‌സഭാ തിരഞ്ഞെടുപ്പിന്റെ പ്രചാരണവേളയില്‍, അടുത്തത് നരേന്ദ്ര മോദിയുടെ ഭരണമാണെന്ന് വിവിധ അഭിപ്രായ സര്‍വേകള്‍ പ്രവചിച്ചപ്പോള്‍ മുതല്‍ സംഘ്പരിവാരം ഈ പ്രവൃത്തി തുടങ്ങിയിരുന്നു. എതിര്‍പ്പുന്നയിക്കുന്നവരെ നിശ്ശബ്ദരാക്കുക എന്നത് ഏകാധിപത്യത്തിന്റെ, വര്‍ഗീയ ഫാസിസത്തിന്റെ വിജയത്തില്‍ നിര്‍ണായകമാണ്. അതുകൊണ്ടാണ് അടിയന്തരാവസ്ഥ പ്രഖ്യാപിച്ചപ്പോള്‍ ഇന്ദിരാ ഗാന്ധി, പൗരാവകാശങ്ങള്‍ റദ്ദാക്കുകയും മാധ്യമങ്ങള്‍ക്ക് സെന്‍സര്‍ഷിപ്പ് ഏര്‍പ്പെടുത്തുകയും ചെയ്തത്. ഇപ്പോള്‍ നിയമത്തിന്റെ വിവിധ ഉപാധികളെ ഉപയോഗപ്പെടുത്തിയും അക്രമിക്കൂട്ടങ്ങളെ സൃഷ്ടിച്ചും പൗരന്‍മാരെ നിശ്ശബ്ദ വിധേയരാക്കി നിര്‍ത്താന്‍ ശ്രമിക്കുകയാണ് സംഘ്പരിവാരം.


ലോക്‌സഭാ തിരഞ്ഞെടുപ്പുകാലത്ത് നരേന്ദ്ര മോദി അധികാരത്തിലെത്തിയാല്‍ രാജ്യം വിട്ടുപോകുമെന്ന് പ്രഖ്യാപിച്ച യു ആര്‍ അനന്തമൂര്‍ത്തിയെ പാക്കിസ്ഥാനിലേക്ക് നാടുകടത്തണമെന്ന് ആഹ്വാനം നല്‍കിയിരുന്നു സംഘ്പരിവാര നേതാക്കള്‍. അനന്തമൂര്‍ത്തി മരിച്ചപ്പോള്‍ പടക്കം പൊട്ടിച്ചും മധുരം വിതരണം ചെയ്തും 'രാജ്യദ്രോഹി' ഇല്ലാതായതിനെ ആഘോഷിക്കുകയും ചെയ്തു അവര്‍. ഗോമാംസത്തിന്റെ പേരില്‍ നടന്ന കൊലകള്‍, മര്‍ദനങ്ങള്‍ ഒക്കെ നിശ്ശബ്ദരാക്കുക എന്ന ലക്ഷ്യത്തോടെയായിരുന്നു. ഗുജറാത്തില്‍ വംശഹത്യാ ശ്രമത്തോടെ സ്ഥാപിച്ചെടുത്ത ഭീതിയുടെ അന്തരീക്ഷം, തുടര്‍ച്ചയായ ഭരണം നല്‍കിയെന്ന തിരിച്ചറിവില്‍ നിന്ന് രൂപപ്പെട്ടതാണ് ഈ തന്ത്രമെന്ന് കരുതണം. ഗുജറാത്തിലെ വര്‍ഗീയ - വംശഹത്യാ അജന്‍ഡക്ക് കാര്‍മികത്വം വഹിച്ചവര്‍ അധികാരവും പാര്‍ട്ടിയും ഭരിക്കുമ്പോള്‍ അത് സ്വാഭാവികമാണ്.


സംഘ്പരിവാരത്തിന്റെ അജന്‍ഡകളുമായി ഒരു കാലത്തും യോജിച്ചുപോകാന്‍ സാധിക്കാത്തവരാണ് മുസ്‌ലിംകളും ദളിതുകളും.  ഗോമാംസത്തിന്റെ പേരില്‍ തല്ലലും കൊല്ലലും പതിവാക്കിയവര്‍, ഭരണത്തെ ഉപയോഗിച്ച് കശാപ്പിന് വേണ്ടിയുള്ള കന്നുകാലിക്കച്ചവടം നിരോധിച്ചത്, ഉപജീവനത്തിന് വഴിയില്ലാതാക്കുമെന്ന മുന്നറിയിപ്പ് ദളിതുകള്‍ക്കും മുസ്‌ലിംകള്‍ക്കും നല്‍കാനായിരുന്നു. അക്രമത്തിലൂടെയും ഭരണനടപടികളിലൂടെയും ഈ വിഭാഗങ്ങളെ നിസ്സഹായരും നിശ്ശബ്ദരുമാക്കുകയും രാഷ്ട്രീയമായി നിഷ്‌ക്രിയരാക്കുകയും ചെയ്താല്‍ ഹിന്ദുത്വ അജന്‍ഡകളുമായുള്ള മുന്നോട്ടുപോക്ക് എളുപ്പത്തിലാകുമെന്ന കണക്കുകൂട്ടല്‍. ഭരണകൂടത്തെ അനുസരിച്ച്, അതിന്റെ കല്‍പ്പനകളെ ശിരസ്സാവഹിച്ച് ജീവിക്കാന്‍ തയ്യാറുള്ളവര്‍ക്കു മാത്രമേ ഭാവി ഹിന്ദു രാഷ്ട്രത്തില്‍ സ്ഥാനമുള്ളൂവെന്ന സന്ദേശവും.


2014ലെ തിരഞ്ഞെടുപ്പ് പ്രചാരണകാലത്തു തന്നെ ഇന്ത്യയിലെ മാധ്യമങ്ങളില്‍ വലിയൊരുവിഭാഗം നരേന്ദ്ര മോദി പക്ഷം ചേര്‍ന്നിരുന്നു. മോദിയുടെ ആധിപത്യത്തിലേക്ക് ഇന്ത്യന്‍ യൂനിയന്‍ മാറിയതോടെ ബാക്കിയുള്ളവയും. ഒരു ടെലിവിഷന്‍ ശൃംഖലയുടെ ഭൂരിപക്ഷ ഓഹരികള്‍ മുകേഷ് അംബാനിയുടെ റിലയന്‍സ് സ്വന്തമാക്കിയപ്പോള്‍ തീവ്ര ഹിന്ദുത്വത്തെ എതിര്‍ത്തു നിന്ന രാജ്ദീപ് സര്‍ദേശായിക്കും സാഗരിക ഘോഷിനും പുറത്തേക്കുള്ള വഴിതുറക്കുക മാത്രമല്ല സംഭവിച്ചത്, രാജ്യത്താകെ വേരുകളുള്ള വലിയൊരു ശൃംഖലയൊന്നാകെ സ്തുതിപാഠക സ്ഥാനത്തേക്ക് എത്തുക കൂടിയായിരുന്നു. വഴങ്ങാതെ നിന്ന എന്‍ ഡി ടി വി അനധികൃത സമ്പാദ്യത്തിന്റെ പേരില്‍, മുന്‍കാലത്തെടുത്ത വായ്പ തിരിച്ചടക്കാത്തതിന്റെ പേരില്‍ (തിരിച്ചടച്ചുവെന്ന രേഖ പോലും സ്വീകരിക്കപ്പെടുന്നില്ല) ഒക്കെ കേസുകള്‍ നേരിടുന്നു. പലവിധത്തില്‍ സമ്മര്‍ദത്തിലാക്കി, ഭരണകൂടത്തിന്റെ സ്തുതിപാഠകരാക്കാന്‍ ശ്രമം നടക്കുകയാണ്. ഇതിനെ നിയമവഴിയില്‍ നേരിടാന്‍ ശ്രമിക്കുന്നുണ്ട് ആ സ്ഥാപനം. പല കോണുകളില്‍ നിന്നുള്ള ഞെരിക്കലിനെ നേരിട്ട് എത്രകാലം നില്‍ക്കാന്‍ സാധിക്കുമെന്നത് കണ്ടറിയണം.


രാഷ്ട്രീയത്തിലും സമാനമായ നടപടികള്‍ കാണാം. കോണ്‍ഗ്രസ് അധികാരത്തിലിരുന്ന സംസ്ഥാനങ്ങളില്‍ എം എല്‍ എമാരെ കൂറുമാറ്റി ആ പാര്‍ട്ടിയെ കൂടുതല്‍ ദുര്‍ബലമാക്കി. ബീഹാറില്‍ മഹാസഖ്യമുണ്ടാക്കി ബി ജെ പിയെ വെല്ലുവിളിച്ച ലാലു പ്രസാദ് യാദവിനെ കേസുകളിലൂടെ വേട്ടയാടുന്നു. അഴിമതി ആരോപണങ്ങള്‍ ലാലുവിനെതിരെ മുമ്പുമുണ്ടായിട്ടുണ്ട് എന്നത് വസ്തുതയാണ്. പുതിയ ആരോപണങ്ങളുണ്ടായാല്‍ അതേക്കുറിച്ച് അന്വേഷണം നടത്തുന്നതിനും ആരും എതിരല്ല. പക്ഷേ, ലാലുവിനെയും കുടുംബത്തെയുമൊന്നാകെ കേസില്‍പ്പെടുത്താന്‍ ശ്രമിക്കുമ്പോള്‍ അതിന് പിന്നില്‍, എതിര്‍പ്പുന്നയിക്കുന്നവരെ ഇല്ലാതാക്കുക എന്ന ഉദ്ദേശ്യം കാണാതിരിക്കാനാകില്ല. സി ബി ഐ, എന്‍ഫോഴ്‌സ്‌മെന്റ് ഡയറക്ടറേറ്റ്, ആദായ നികുതി വകുപ്പ് തുടങ്ങി വിവിധ ഏജന്‍സികളെ അതിനായി ഉപയോഗിക്കുകയും ചെയ്യുന്നു.


ശ്വാസം മുട്ടിക്കുന്ന നിയന്ത്രണങ്ങള്‍ക്കെതിരെ രോഷമുയരാന്‍ സാധ്യതയുള്ള മറ്റൊരിടം ഉന്നത വിദ്യാഭ്യാസ സ്ഥാപനങ്ങളും സര്‍വകലാശാലകളുമാണ്. അവിടെയും ഭരണകൂടത്തിന്റെയും സംഘ്പരിവാരത്തിന്റെയും പ്രഹരമുണ്ടായി. ജവഹര്‍ലാല്‍ നെഹ്‌റു, ഹൈദരാബാദ് സര്‍വകലാശാലകളില്‍, മദ്രാസ് ഐ ഐ ടിയില്‍, പുനെയിലെ ഫിലിം ഇന്‍സ്റ്റിറ്റിയൂട്ടില്‍ ഒക്കെ കണ്ടത് അതാണ്. ഭീകരവാദത്തിന്റെയും വിഘടനവാദത്തിന്റെയും കേന്ദ്രങ്ങളായി ഇവിടങ്ങള്‍ മുദ്രകുത്തപ്പെട്ടു. എതിരഭിപ്രായം പറയുന്നവര്‍ രാജ്യദ്രോഹികളായി. സ്വയം ജീവനെടുത്ത് പ്രതിഷേധിച്ചവരെപ്പോലും അവഹേളിച്ചു. പ്രതിഷേധത്തിന്റെ സ്വാഭാവികയിടങ്ങളായിരുന്ന ക്യാമ്പസുകള്‍ ഏറെക്കുറെ നിശ്ചലമായതാണ് രാജ്യം പിന്നീട് കണ്ടത്.


ഗുജറാത്ത് വംശഹത്യാ ശ്രമത്തിന്റെ ഇരകള്‍ക്ക് നീതി ലഭ്യമാക്കാനും വംശഹത്യാശ്രമത്തിന്റെ നടത്തിപ്പില്‍ നരേന്ദ്ര മോദിക്ക് പങ്കുണ്ടെന്ന പരാതിക്ക് നിയമവഴിയിലൂടെ സാധൂകരണമുണ്ടാക്കാനും ശ്രമിച്ച ടീസ്റ്റ സെറ്റല്‍വാദ്, വിദേശത്തു നിന്ന് അനധികൃതമായി പണം സ്വീകരിച്ച കേസില്‍ പ്രതിയാണ് ഇപ്പോള്‍. അവരുടെ സന്നദ്ധ സംഘടനയുടെ സാമ്പത്തിക സ്രോതസ്സ് തടഞ്ഞ് അതിനെ നിര്‍വീര്യമാക്കി. സര്‍ക്കാറിനെ വിമര്‍ശിക്കുന്ന മറ്റു നിരവധി സന്നദ്ധ സംഘടനകളുടെയും ഫണ്ടും തടയപ്പെട്ടു.


ഇതിന്റെയൊക്കെ തുടര്‍ച്ചയാണ് നരേന്ദ്ര ധാബോല്‍ക്കര്‍ മുതല്‍ ഗൗരി ലങ്കേഷ് വരെയുള്ളവരുടെ ജീവനുകള്‍. സ്വതന്ത്രമായി അഭിപ്രായം പറയുന്നവരെ നിശ്ശബ്ദരാക്കാനുള്ള തിരഞ്ഞെടുത്ത കൊലകള്‍. ധാബോല്‍ക്കര്‍, ഗോവിന്ദ് പന്‍സാരെ, എം എം കല്‍ബുര്‍ഗി, ഗൗരി ലങ്കേഷ് എന്നീ നാലുപേര്‍ക്കിടയില്‍ ആശയഐക്യം ഏറെയുണ്ടായിരുന്നു. അന്ധവിശ്വാസങ്ങളെയും അനാചാരങ്ങളെയും എതിര്‍ത്ത, തീവ്ര ഹിന്ദുത്വ അജന്‍ഡകളെ ശക്തമായി വിമര്‍ശിച്ച, സമൂഹത്തിലെ അസമത്വത്തെ ഇല്ലാതാക്കണമെന്ന് ആഗ്രഹിച്ചവരായിരുന്നു എല്ലാവരും. വ്യക്തി എന്ന നിലയില്‍ ആര്‍ക്കെങ്കിലും ഇവരോട് വിരോധമുണ്ടാകാന്‍ കാരണമുണ്ടായിരുന്നില്ല, ആര്‍ക്കെങ്കിലും അങ്ങനെ വിരോധമുണ്ടായിരുന്നുവെന്നതിന് ഇതുവരെ തെളിവുമില്ല. ഇവര്‍ ഉറച്ചുവിശ്വസിക്കുകയും പ്രചരിപ്പിക്കുകയും ചെയ്ത ആശയങ്ങളല്ലാതെ മറ്റൊരു കാരണം ഈ കൊലക്ക് കാണുന്നുമില്ല. ധാബോല്‍ക്കറുടെയും പന്‍സാരെയുടെയും കല്‍ബുര്‍ഗിയുടെയും ജീവനെടുത്ത അതേ ശക്തികള്‍ തന്നെയാണ് ഗൗരി ലങ്കേഷിന്റെ കൊലക്കു പിന്നിലുമെന്ന നിഗമനം അതുകൊണ്ടാണ്. കൊലക്കു ശേഷം സംഘ്പരിവാര പ്രവര്‍ത്തകര്‍ സാമൂഹിക മാധ്യമങ്ങളിലൂടെ പ്രകടിപ്പിച്ച നികൃഷ്ടമായ അഭിപ്രായങ്ങള്‍ ഈ നിഗമനത്തെ ശരിവെക്കുന്നു.


ധാബോല്‍ക്കറില്‍ തുടങ്ങി ഗൗരിയിലെത്തിനില്‍ക്കുന്ന കൊലകള്‍ക്ക് ഭയാനകമായ സാമ്യങ്ങളുണ്ട്. എല്ലാവരുടെ നേര്‍ക്കും വെടിയുതിര്‍ത്തത് തൊട്ടടുത്തു നിന്ന്, ഒരേയിനം പിസ്റ്റള്‍ ഉപയോഗിച്ച്. മോട്ടോര്‍ സൈക്കിളിലെത്തി, കൃത്യം നടത്തി അപ്രത്യക്ഷരായ അക്രമികള്‍.  ധാബോല്‍ക്കറിനെയും ഗോവിന്ദ് പന്‍സാരെയെയും കൊലപ്പെടുത്തിയത് സംഘ്പരിവാറുമായി ബന്ധമുള്ള സനാതന്‍ സന്‍സ്ഥയുടെ പ്രവര്‍ത്തകരാണ് എന്നാണ് അന്വേഷണ ഏജന്‍സികള്‍ക്ക് ലഭിച്ച വിവരം. ഒരാളെ അറസ്റ്റ് ചെയ്യുകയും ചെയ്തു. ഇവര്‍ക്ക് കല്‍ബുര്‍ഗിയുടെ കൊലയില്‍ പങ്കുണ്ടോ എന്ന സംശയം സജീവമായി നില്‍ക്കുകയും ചെയ്യുന്നു. സനാതന്‍ സന്‍സ്ഥയെ നിരോധിക്കണമെന്ന നിര്‍ദേശം 2011ല്‍ സുശീല്‍ കുമാര്‍ ഷിന്‍ഡെ ആഭ്യന്തര മന്ത്രിയായിരിക്കെ യു പി എ സര്‍ക്കാര്‍ തള്ളിക്കളഞ്ഞിരുന്നുവെന്നതിന് ഇപ്പോള്‍ വലിയ പ്രാധാന്യം കൈവരുന്നു. മക്ക മസ്ജിദിലും മലേഗാവിലും അജ്മീര്‍ ദര്‍ഗയിലുമൊക്കെ സ്‌ഫോടനങ്ങള്‍ നടത്തിയ ഹിന്ദുത്വ ഭീകരവാദ ശൃംഖലയെക്കുറിച്ച് ഗൗരവത്തില്‍ അന്വേഷിക്കാനുള്ള ഇച്ഛാശക്തിയും അന്നത്തെ യു പി എ സര്‍ക്കാറിനുണ്ടായില്ല, അതിന് നേതൃത്വം നല്‍കിയ കോണ്‍ഗ്രസിനുമുണ്ടായില്ല. അതിന്റെ പ്രതിഫലം കൂടിയാണ് ഏകാധിപത്യത്തിന്റെയും തീവ്ര ഹിന്ദുത്വത്തിന്റെയും കൈകളില്‍ നിന്ന് രാജ്യം ഇപ്പോള്‍ സ്വീകരിക്കുന്നത്.


പല ഇടങ്ങളില്‍, പല രൂപങ്ങളില്‍ വേട്ട നടക്കുകയാണ്. അതുകൊണ്ടു തന്നെ അതിനെ അസഹിഷ്ണുതയുടെ പ്രകടനമായോ അപ്രഖ്യാപിത അടിയന്തരാവസ്ഥയായോ അല്ല, ഏകാധിപത്യത്തിന്റെ, തീവ്ര ഹിന്ദുത്വത്തിന്റെ അധിനിവേശമായി വേണം കാണാന്‍. രാജ്യത്തിന്റെ എഴുപതാണ്ടോളം നിലനിന്ന സ്വഭാവ സവിശേഷതകളെയൊക്കെ ഇല്ലായ്മ ചെയ്യാനുള്ള അധിനിവേശം.

2017-08-07

വെള്ളം ചേര്‍ക്കാത്ത കള്ളം അഥവാ ക്രമസമാധാനം


അരച ശിരോമണി, ആപല്‍ ബാന്ധവന്‍, അന്നദാന പ്രഭു എന്നിത്യാദി വിശേഷണങ്ങള്‍ മതിയാകാത്ത നേതാവ്. മരണം പോലും ആധാറില്‍ ചേര്‍ത്ത്, ജനത്തിന്റെ ക്ഷുത്പിപാസാദികള്‍ ഇല്ലായ്മ ചെയ്യുന്നതിന് അഹോരാത്രം വിയര്‍പ്പൊഴുക്കുന്ന പുണ്യദേഹം. ഇന്ധന സബ്‌സിഡി പാടെ ഇല്ലാതാക്കി, സമത്വസുന്ദരരാജ്യ സൃഷ്ടി വേഗത്തിലാക്കുന്ന ബൃഹദാശയന്‍. ആ ദേഹത്തില്‍ ദേഹിയായി ഭാരത ജനങ്ങളുടെ പാര്‍ട്ടിയും ആ പാര്‍ട്ടിക്ക് സംസ്‌കാരിക ദേശീയതുടെ അടിത്തറ വന്ദേമാതരമീണത്തില്‍ ചൊല്ലിപ്പടുക്കുന്ന സ്വയം സേവകരുടെ സംഘടനയും. സാംസ്‌കാരിക ദേശീയത വന്യമോ അക്രമോത്സുകമോ ആകേണ്ടപ്പോള്‍ ആയതിലേക്ക് അവതാരമെടുക്കുന്ന പരദശം പരിവാര സംഘങ്ങള്‍ വേറെയും. അതിന്റെ അപഹാരം രാജ്യത്താകെ അരങ്ങേറുമ്പോള്‍ ഇങ്ങ് തെക്ക്, നാല് കോടിയില്‍ താഴെ വരുന്ന ജനങ്ങളില്‍ ഇളക്കമുണ്ടാക്കാന്‍ സാധിക്കാതിരുന്നാല്‍ മാനക്കേട് തന്നെ. അരച ശിരോമണിക്ക്, അരച വിശ്വസ്തനും കുതന്ത്ര വിദഗ്ധനുമായ സചിവോത്തമന്, സാംസ്‌കാരിക ദേശീയതയുടെ അവതാരമായ ഭഗവാന് ഒക്കെ.


പരിഹാരം ഉടനുണ്ടാകണം. അതിനുപായം പലതാലോചിച്ചു, തച്ചുശാസ്ത്ര വിധിപ്രകാരം തന്ത്രങ്ങള്‍ പണിതൊരുക്കി, കൈക്കാരന്മാരെ മാറ്റി നോക്കി, ശേവുകക്കാരായി ചേകവന്‍മാരെ ഇറക്കി - ചക്ക വീണു മുയലു ചത്തത് പോലൊരു നേമം മാത്രം. അതിന്‍മേലുന്നി ചുറ്റോടുചുറ്റ് വേരുന്നാമെന്ന് കരുതിയപ്പോഴാണ്, ഇല്ലാത്ത അധികാരമുപയോഗിച്ച് നേതാക്കള്‍ പണക്കൊയ്ത്ത് നടത്തിയതിന്റെ കഥ പുറത്തുവന്നത്. ഒന്നാണെങ്കില്‍ ഒന്നെന്ന് കരുതി തള്ളാമായിരുന്നു. ഒന്നിന് പുറകെ ഒന്നായി, പല ദേശങ്ങളില്‍ നിന്ന്. ആരൊക്കെ എന്തിനൊക്കെ പണം വാങ്ങിയെന്ന് ആര്‍ക്കും തിട്ടമില്ലാത്ത സ്ഥിതി. അഴിമതിയുടെ മത്തുപിടിപ്പിക്കുന്ന വാസന. ഒരു കുറിക്ക് നറുക്കു ചേര്‍ക്കാത്തതില്‍ മനം നൊന്ത് ശേവുകക്കാരായ ചേകവരുടെ മുതലാളി വെള്ളം ചേര്‍ക്കാതെ അതൃപ്തി അറിയിച്ചു. നിവൃത്തികേടില്‍, കുമ്മനക്കോനാതിരി നാലുകെട്ടിന്റെ പടിയടച്ച് മൗനദീക്ഷ സ്വീകരിച്ചു. പതിനാറുകെട്ടില്‍ പണിതൊരുക്കുന്ന രാജകാര്യാലയം വൃഥാവിലാകുമല്ലോ എന്ന് ഖിന്നനായി.


അങ്ങനെയിരിക്കുമ്പോഴാണ് കേരള ഭരണ നേതൃത്വത്താല്‍ അഹംകൊണ്ട കമ്മ്യൂണിസ്റ്റ് മാര്‍ക്‌സിസ്റ്റുകള്‍ വഴിയൊരുക്കിയത്. അടിക്ക് തിരിച്ചടി അവരുടെ ശീലമാണ്. അതിലെ പ്രയോഗം തെറ്റിയില്ല, പരിവാരത്തിന്. ശ്രീകാര്യത്ത് ചോരകണ്ടപ്പോള്‍, അഴിമതിയുടെ വാസനക്ക് കുറവുണ്ടായി. ശ്രീകാര്യവും തലസ്ഥാനത്തെ ക്രമസമാധാനനിലയും കൊഴുപ്പിച്ചാല്‍, സ്വയം സേവകരായ നരേന്ദ്രനും കോവിന്ദനും ബാക്കി നോക്കുമെന്ന പ്രതീക്ഷയായി. ശേഷം കാഴ്ചയുടെ ആട്ടക്കഥ തയ്യാറാകുകയാണ്. 2016 മെയ് അവസാനത്തോടെ പ്രഖ്യാപിച്ച തെരുവിലെ പ്രതിപക്ഷം ആട്ടക്കഥ. രൗദ്രമാണ് മുഖ്യ വേഷം.


കേരളമെന്ന ചെറുദേശത്ത് സ്വയം സേവകര്‍ക്ക് പുറത്തിറങ്ങി നടക്കാന്‍ പറ്റുന്നില്ല, ജനങ്ങളുടെ പാര്‍ട്ടിക്ക് പ്രവര്‍ത്തിക്കാന്‍ സാധിക്കുന്നില്ല, അഥവാ പ്രവര്‍ത്തിച്ചാല്‍ ജീവന് ഭീഷണി, ഭീഷണിയില്‍ പൊലിഞ്ഞ ജീവനുകള്‍ നിരവധി. സ്വയം സേവകര്‍ക്കും പാര്‍ട്ടി പ്രവര്‍ത്തകര്‍ക്കും മാത്രമല്ല, പിന്നാക്ക വിഭാഗക്കാര്‍, പട്ടിക വിഭാഗങ്ങള്‍ എന്നിവര്‍ക്കൊന്നും ഭയം കൂടാതെ ജീവിക്കാനാകുന്നില്ല. കേന്ദ്ര ഭരണം കൈയാളുന്ന പാര്‍ട്ടിയുടെ സംസ്ഥാന കുടീരത്തിനും അശ്വവേഗത്തിനപ്പുറം ചരിക്കുന്ന വാഹനത്തിനും നേര്‍ക്ക് കല്ലുകൊണ്ട് ആക്രമണം. ക്രമസമാധാനമില്ലെന്നതിന് തെളിവെന്തിന് വേറെ. ആകയാല്‍ മുന്നറിയിപ്പ് നല്‍കുന്നു, സ്വയം സേവകരുടെ സംഘത്തിന്റെ ദേശാന്തര പ്രാന്ത കാര്യവാഹ്.



കമ്മ്യൂണിസ്റ്റ് മാര്‍ക്‌സിസ്റ്റ് ഭരണം, ഉത്തരവാദിത്തം നിറവേറ്റണം. ഇല്ലെങ്കില്‍ കേന്ദ്രം ഇടപെടണം. ഗവര്‍ണറും രാഷ്ട്രപതിയും ഉചിതമായ തീരുമാനമെടുക്കണം. വിളിച്ചുവരുത്തി താക്കീത് ചെയ്തതുകൊണ്ടൊന്നും കാര്യമായില്ല, ക്രമസമാധാനത്തകര്‍ച്ച രേഖയിലാകണം. ആയത്, അരചശിരോമണിക്ക് മുന്നിലേക്ക് എള്ളും പൂവും ചന്ദനവും തൊട്ട്, തളികയില്‍ നല്‍കണം, സദാശിവ പ്രഭു. സംഹാരത്തിന്റെ ദേവന്‍, കര്‍മം മറക്കരുത്. അതിലൊരു തുള്ളി വെള്ളം ചേര്‍ക്കാതെ ഉദകക്രിയ, അതിലവസാനിക്കണം കഥ, അതിനനുസരിച്ചാണ് ആട്ടത്തിന്റെ ചിട്ട.


ഡല്‍ഹിയില്‍, ദേശാന്തര പ്രാന്ത കാര്യവാഹിന്റെ വാര്‍ത്താ സമ്മേളനം. പിറകെ അരുണ്‍ ജെയ്റ്റ്‌ലിയുടെ തിരുവനന്തപുര പ്രവേശം. വിവേകം കൊണ്ട് വികാരം മറയാതിരിക്കാന്‍ ശ്രദ്ധിച്ച്, പ്രതികരണം. അതിനെച്ചൊല്ലി തര്‍ക്കം, പത്രത്താളുകളിലും ടെലിവിഷന്‍ ചതുരങ്ങളിലും. പിറകെ അഖിലേന്ത്യാധ്യക്ഷന്റെ അശ്വമേധം. അതിക്രമങ്ങളെ ഇല്ലാതാക്കി, സംഘ രഥം വേണ്ടവിധം ഉരുളുന്നുവെന്ന് ഉറപ്പാക്കാനുള്ള മേധം. അതിന്റെ പാര്‍ശ്വങ്ങളില്‍ സൃഷ്ടിക്കപ്പെടുന്ന ചെറു കുരുക്ഷേത്രങ്ങളില്‍ ഉതിരുന്ന നിണത്തുള്ളികള്‍ രാഷ്ട്രപതി ഭരണത്തിന്റെ ശോണ രേഖയാകും.  ബ്രിട്ടീഷ് ആധ്യപത്യത്തില്‍ നിന്ന് വിടര്‍ന്ന്, ഇന്ത്യന്‍ യൂനിയന്‍ രൂപപ്പെട്ടതിന് ശേഷം ഇത്രയും വലിയ അതിക്രമം മുമ്പെപ്പോഴെങ്കിലും ഏതെങ്കിലും ദേശത്ത് ഉണ്ടായിട്ടുണ്ടോ? ഇല്ലെന്ന് നിസ്സംശയം പറയാം, ആകയില്‍ ആട്ടക്കഥ പൂര്‍ത്തിയാകട്ടെ, രാഷ്ട്രപതി ഭരണം പൂക്കട്ടെ, അതിലേക്ക് നയിക്കാന്‍ പാകത്തില്‍ അക്രമങ്ങള്‍ക്ക് വിത്തിടട്ടെ, അധികാരം വിളയട്ടെ.


അരചശിരോമണി ഒന്നരദശാബ്ദം മുമ്പുള്ള പുര്‍വാശ്രമത്തില്‍, വംശഹത്യാ ശ്രമത്തിന് അധ്യക്ഷതവഹിച്ചയാളാണ്. പൊലീസിനെ ശാസിച്ച്, നിഷ്‌ക്രിയമാക്കി നിര്‍ത്തി, ഭൂരിപക്ഷ സമുദായത്തിന്റെ രോഷമൊഴുകി, മുസ്‌ലിംകളുടെ നിണം സബര്‍മതിയില്‍ ചേരാന്‍ അവസരമുണ്ടാക്കിയയാളും. ഇതിന് ഭംഗമുണ്ടാകുന്നില്ലെന്ന് ഉറപ്പാക്കാന്‍ സചിവരില്‍ പ്രധാനികളായ രണ്ടുപേരെ പൊലീസ് കേന്ദ്രത്തിലേക്ക് നിയോഗിച്ചയാളാണ്. നിണമൊഴുക്ക് തടയണമെന്ന് രാജ്യത്ത് ആക്രന്ദനമുണ്ടായപ്പോള്‍ പട്ടാളത്തെ ഇറക്കുന്നത് വൈകിപ്പിക്കാന്‍ കരുനീക്കിയവനാണ്. ആ കരുനീക്കത്തില്‍ അന്നത്തെ അരചന്‍ (ശിരോമണിയല്ല) സര്‍വാംഗം വിറച്ച്, സ്വന്തം ഗാത്രത്തിലേക്ക് ചുരുങ്ങിയതുമാണ്. എല്ലാം ആരോപണങ്ങളാണ്. രേഖകളുണ്ടെങ്കിലും തെളിയിക്കപ്പെടാത്തവ.



ക്രമസമാധാന പാലനത്തിന്റെ ഈ മാതൃക കണ്ടു പഠിക്കാന്‍, പലതിനും മാതൃകയുണ്ടാക്കിയെന്ന് അവകാശപ്പെടുന്ന കേരള ദേശത്തിനും ആ മാതൃകകളുടെയൊക്കെ പിതൃത്വം അവകാശപ്പെടുന്ന കമ്മ്യൂണിസ്റ്റ് മാര്‍ക്‌സിസ്റ്റുകള്‍ക്കും  കഴിയുന്നതേയില്ല. ശാന്തം പാപം.
ആരെയും പിടികൂടി തടങ്കലില്‍ വെക്കുകയും അവസരം വരുമ്പോള്‍ വെടിവെച്ചുകൊന്ന് ഏറ്റുമുട്ടലായി ചിത്രീകരിക്കുകയും ചെയ്യുക എന്നത് കലയായി വികസിപ്പിച്ച്, തന്ത്രമായി വളര്‍ത്തി, ദേശദ്രോഹികളുടെ ലക്ഷ്യസ്ഥാനമാണ് ഈ ശരീരമെന്ന തോന്നലുളവാക്കി, ഈ ശരീരമില്ലെങ്കില്‍ രാജ്യം സുരക്ഷിതമല്ലെന്ന നുണ പ്രചരിപ്പിച്ച് സത്യമാക്കിയതും അരച ശിരോമണിയുടെ പൂര്‍വാശ്രമത്തിലാണ്. ഈ കഥകളില്‍ നരച്ച താടിയും കറുത്ത താടിയും ആടിത്തിമര്‍ത്തത്, രുധിരചരിതത്തിലെ അപൂര്‍വ അങ്കം തന്നെ.


മൂന്ന് വര്‍ഷത്തിനിടെ മുപ്പത് തവണ, തെരുവുകളില്‍ രക്തമൊഴുകി. പൊലിഞ്ഞ ജീവനുകളുടെ എണ്ണം എത്രയെന്നതില്‍ തിട്ടമില്ല, ഇങ്ങനെ പൊലിഞ്ഞവര്‍ ആരൊക്കെ എന്നതില്‍ ഇപ്പോഴും തീര്‍പ്പായിട്ടില്ല. എന്തായാലും ചെറുകാലത്തിനിടെ, ഇത്രയധികം പേര്‍ ഭീകരരായി ചമഞ്ഞെത്തിയ നാട് വേറെയുണ്ടായിരുന്നില്ല. കേരളത്തില്‍ നിന്ന് ദുരൂഹ സാഹചര്യത്തില്‍ കാണാതാകുകയും ഇസ്‌ലാമിക് സ്റ്റേറ്റില്‍ ചേര്‍ന്നുവെന്ന് സംശയിക്കുകയും ചെയ്യുന്നവരിലേക്കാളും ഏറെയധികം. എന്നിട്ടും സബര്‍മതിയുടെ തീരം ഭീകരതയുടെ കരിമണ്ണായി എന്നാരും പറഞ്ഞില്ല. വെടിവെച്ചുകൊന്ന് ഏറ്റുമുട്ടലായി ചിത്രീകരിക്കുന്നതില്‍, അത് ക്രമസമാധാനപാലനത്തിലെ ഒഴിവാക്കാനാകാത്ത തന്ത്രമാണെന്ന് രാജ്യ വാസികളെ ബോധ്യപ്പെടുത്തുന്നതില്‍ പൂര്‍വാശ്രമത്തില്‍ അരച ശിരോമണി വിജയിച്ചു. അതിന് തെളിവാണ് പില്‍ക്കാലത്ത് ശിരോമണിപ്പട്ടത്തിലേക്ക് മത്സരിക്കുമ്പോള്‍ ഈ കഥകള്‍ പാടി ഇകഴ്ത്താന്‍ നടത്തിയ ശ്രമങ്ങളൊക്കെ പുകഴ്ത്തലായി സ്വയം സ്വീകരിച്ചത്. ബിഹാറിലെ നിതീഷ് കുമാര്‍ മുതല്‍ യുണൈറ്റഡ് സ്റ്റേറ്റ്‌സ് ഓഫ് അമേരിക്കയിലെ ട്രംപ് വരെ, അതൊക്കെ പുകഴ്ത്തലാണെന്ന് പിന്നീട് ശരിവെച്ചത്.


ഇത്രക്കൊന്നും സാധിച്ചില്ലെങ്കിലും അരച ശിരോമണിയുടെ അനുചരന്‍മാരായ നാട്ടുരാജാക്കന്‍മാര്‍ പലരും സമാനമായ രീതിയില്‍ ക്രമസമാധാനം പാലിച്ചതിന്റെ കഥകളുണ്ട്, അതൊക്കെ മൈനര്‍ സെറ്റ് (കഥ)കളിയാണെന്ന് മാത്രം. ഭോപ്പാലിലെ ജയിലില്‍ നിന്ന് നാലഞ്ചു പേരെ കിലോമീറ്ററുകള്‍ അകലെയുള്ള കുന്നിന്‍മുകളിലേക്ക് രക്ഷപ്പെടാന്‍ സഹായിക്കുകയും പിന്നീട് വെടിവെച്ച് കൊന്ന്, തടവുചാടിയ കൊടുംഭീകരരെ വെടിവെച്ചുകൊന്നെന്ന് ഊറ്റം കൊള്ളുകയും ചെയ്തത് അതിലൊന്ന്. പട്ടിണിക്ക് പരിഹാരം തേടിയ കര്‍ഷകര്‍ക്ക് വെടിയുണ്ട കൊണ്ട് അന്ത്യത്താഴമൊരുക്കിയത് മറ്റൊന്നാണ്. മാവോയിസ്റ്റുകളെന്നും അവരുടെ അറിവാളികളെന്നും ആരോപിച്ച് ആളുകളെ വെടിവെച്ച് കൊല്ലുകയോ ബലാത്സംഗത്തിന് ഇരയാക്കി ശിക്ഷിക്കുകയോ ചെയ്ത് ക്രമസമാധാനം പാലിക്കുന്ന നാട്ടുരാജാവ് വേറെയുണ്ട്.


ഇവ്വിധമായ ക്രമസമാധാനപാലനത്തില്‍ വേണ്ടത്ര ശ്രദ്ധിക്കാതിരിക്കെ, കേരളത്തില്‍ സംഘത്തിന്റെ പ്രവര്‍ത്തനം ഊര്‍ജിതമാക്കുക പ്രയാസം തന്നെ. ഭാരതീയ ജനതാ പാര്‍ട്ടിയുടെ പ്രവര്‍ത്തനം വേണ്ട വിധം മുന്നോട്ടുകൊണ്ടുപോകുക അതിലും പ്രയസം, അധികാര ലബ്ദി, എത്രകാലം സ്വപ്‌നമായി ശേഷിക്കുമെന്നതില്‍ തിട്ടവുമില്ല. ഭാരതീയ ജനതാ പാര്‍ട്ടിക്ക് കേരളത്തില്‍ പ്രവര്‍ത്തന സ്വാതന്ത്ര്യമില്ലെന്നത് അത്രത്തോളം വിശ്വാസയോഗ്യമല്ലെന്നത് ഇവിടെ പറയാതെ തരമില്ല. കൈക്കൂലി വാങ്ങി പെട്രോള്‍ പമ്പ് അനുവദിക്കുന്ന പ്രവൃത്തി വിഘ്‌നം കൂടാതെ നടന്നിരുന്നു, ദേശീയ കൗണ്‍സിലിന്റെ നടത്തിപ്പിന് പണം പിരിച്ചപ്പോള്‍ വ്യാജനടിച്ച് പണപ്പിരിവ് നടത്താനായി, വ്യാജനുണ്ടായെന്ന് പുറത്തുപറഞ്ഞയാളെ സമൂലം മര്‍ദിക്കാനുമായി, അഞ്ച് ലക്ഷം മുതല്‍ അയ്യായിരം വരെ നിശ്ചയിച്ച് വ്യാപാരികള്‍ നിന്ന് പണം പിരിക്കാനായി, നിശ്ചയിച്ച പണം നല്‍കാതിരുന്നവരെ ഫോണിലൂടെ അസഭ്യം പറയാനും എന്നിട്ടും അടങ്ങാത്ത ഇടങ്ങളില്‍ ദണ്ഡ പ്രയോഗിക്കാനുമായി. ഈ പട്ടിക ഇനിയും നീളും. അതിനാല്‍ പ്രവര്‍ത്തന സ്വാതന്ത്ര്യമില്ലെന്ന പരാതി പൂര്‍ണമായും ശരിയല്ലെന്ന് കാണുന്നുണ്ട്. എങ്കിലും സാമുദായിക സ്പര്‍ധ വേണ്ട വിധം വളര്‍ത്താന്‍, വര്‍ഗീയ കലഹങ്ങളായി അതു വളര്‍ത്തിയെടുക്കുന്നതില്‍ ഒക്കെ വലിയ പ്രയാസം നേരിടുന്നുണ്ട്. ആകയാല്‍ പ്രവര്‍ത്തന സ്വാതന്ത്ര്യം വേണ്ടത്രയില്ലെന്ന് കട്ടായം പറയാം.


മാനക്കേട് മാറ്റിയേ മതിയാകൂ. അതിന്, ഭരണം രാഷ്ട്രപതി വകയെങ്കില്‍ അങ്ങനെ, സബര്‍മതീ തീരത്തെ രുധിര മാര്‍ഗമെങ്കില്‍ അങ്ങനെ.  അഴിമതിയുടെ വാസനയില്‍ മയങ്ങി, അതില്‍ നിന്ന് മുക്തിയാകാത്ത ഇവിടുത്തെ നേതാക്കള്‍ക്ക് ഇതിനൊന്നും സമയം തികയാത്തതില്‍ കേന്ദ്രത്തില്‍ നിന്ന് ആളെയിറക്കും. അവര്‍ക്ക് അവസരമൊരുക്കുന്നതില്‍ പ്രദേശ നേതാക്കള്‍ പരാജയമായാലും ഉണ്ണാവ്രതവും പ്രാര്‍ഥനാ സംഗമവുമായി കോണ്‍ഗ്രസുകാര്‍ സഹായത്തിനുണ്ടാകും. കാലിനടിയിലെ മണ്ണ് ചോരുന്നത് അറിഞ്ഞാലും അറിഞ്ഞ മട്ട് കാണിക്കാത്ത കോണ്‍ഗ്രസുകാര്‍. എല്ലാം തനിയെ ശരിയാകുമെന്ന് പ്രതീക്ഷിക്കുന്ന കോണ്‍ഗ്രസുകാര്‍. അവര്‍ക്ക് നന്ദി പറയാം. പ്രകോപനങ്ങളോട് യഥാവിധി പ്രതികരിച്ച് സകല അവസരവും തുറന്നിടുന്ന കമ്മ്യൂണിസ്റ്റ് മാര്‍ക്‌സിസ്റ്റുകള്‍ക്കും.

2017-07-30

പശു, കൂടാരം, ബിഹാറി


'ഒന്നിന് പിറകെ ഒന്നായി തുടച്ചുനീക്കൂ എന്നാണ് നിങ്ങള്‍ (നരേന്ദ്ര മോദി) ജനങ്ങളോട് പറയുന്നത്. നിങ്ങള്‍ വോട്ട് നേടി ജയിക്കണം, തുടച്ചുനീക്കിയല്ല. ഇത് ഏകാധിപത്യം മാത്രമല്ല, ഫാസിസം കൂടിയാണ്. ഫാസിസത്തില്‍ വിശ്വസിക്കുന്നവരുടെ ബിംബം ഹിറ്റ്‌ലറാണ്. ഹിറ്റ്‌ലര്‍ ചെയ്തത് അവരും ചെയ്യും... ഫാസിസത്തിന്റെ ഭാഷ ജനാധിപത്യത്തില്‍ ഫലം കാണില്ല'- ജെ ഡി (യു) നേതാവ് നിതീഷ് കുമാര്‍ 2013ല്‍ പറഞ്ഞതാണിത്. ഗുജറാത്തിലെ വംശഹത്യാ ശ്രമത്തിന് അധ്യക്ഷതവഹിച്ചയാളെന്ന ആരോപണം നേരിടുന്ന നരേന്ദ്ര മോദിയെ പ്രധാനമന്ത്രി സ്ഥാനാര്‍ഥിയാക്കാന്‍ നിശ്ചയിച്ചതില്‍ പ്രതിഷേധിച്ച് ബി ജെ പിയുമായുള്ള 17 വര്‍ഷത്തെ ബന്ധം ഉപേക്ഷിച്ചതിന് പിറകെയായിരുന്നു ഈ വാക്കുകള്‍.


മതനിരപേക്ഷ പാര്‍ട്ടികളുടെ പിന്തുണയോടെ ബീഹാറില്‍ ഭരണം തുടര്‍ന്ന നിതീഷ്, 2015ല്‍ ലാലു പ്രസാദ് യാദവിന്റെ രാഷ്ട്രീയ ജനതാദളും (ആര്‍ ജെ ഡി) കോണ്‍ഗ്രസുമായി ചേര്‍ന്ന് മഹാസഖ്യമുണ്ടാക്കി തിരഞ്ഞെടുപ്പിനെ നേരിട്ട്, വലിയ വിജയം നേടി. ആ ഫലത്തില്‍  കൂടുതല്‍ ശ്രദ്ധേയമായത് ലാലു പ്രസാദ് യാദവിന്റെ ശക്തമായ തിരിച്ചുവരവായിരുന്നു. 80 സീറ്റ് നേടി ഏറ്റവും വലിയ ഒറ്റക്കക്ഷിയാകാന്‍ ആര്‍ ജെ ഡിക്ക് സാധിച്ചു. മഹാസഖ്യത്തിന്റെ യഥാര്‍ഥ നേതാവ് ലാലുവാണെന്ന, പ്രചാരണഘട്ടത്തില്‍ തന്നെ സൃഷ്ടിക്കപ്പെട്ട പ്രതീതിക്ക് ബലമേകുന്നതായിരുന്നു തിരഞ്ഞെടുപ്പ് ഫലം. മഹാസഖ്യത്തിന്റെ ആയുസ്സിനെക്കുറിച്ചുള്ള ചോദ്യങ്ങള്‍ അന്ന് തന്നെ ഉയരാന്‍ കാരണങ്ങളിലൊന്ന് ഇതായിരുന്നു. കഴിഞ്ഞ ദിവസം സഖ്യം ഇല്ലാതായപ്പോള്‍ അതിന് പെട്ടെന്നുള്ള കാരണമായി ലാലു യാദവിന്റെ മകന്‍ തേജസ്വി യാദവിനെതിരായ അഴിമതി ആരോപണം മാറിയെന്ന് മാത്രം.


അടിയന്തരാവസ്ഥയില്‍ ഇന്ദിരാ ഗാന്ധിയുടെ ഏകാധിപത്യത്തിനെതിരെ സമരം ചെയ്ത് ഒന്നര വര്‍ഷത്തോളം ജയിലില്‍ കഴിഞ്ഞ നിതീഷ്, എക്കാലവും ജനതാ പരിവാറിന്റെ ഭാഗമായിരുന്നു. ജനാധിപത്യത്തിനും മതനിരപേക്ഷതക്കും വേണ്ടി നിലകൊണ്ട നേതാവുമായിരുന്നു, അധികാരമോഹത്തിന്റെ കാറ്റേല്‍ക്കും വരെ. 1996ല്‍ ജോര്‍ജ് ഫെര്‍ണാണ്ടസും നിതീഷ് കുമാറും അടക്കമുള്ള നേതാക്കള്‍ ബി ജെ പിയുടെ സഖ്യകക്ഷിയാകുമ്പോള്‍ ബാബരി മസ്ജിദ് തകര്‍ക്കപ്പെട്ടിട്ട് നാല് വര്‍ഷമേ ആയിരുന്നുള്ളൂ. മസ്ജിദ് തകര്‍ക്കപ്പെട്ടതിന് പിറകെ, തീവ്ര ഹിന്ദുത്വ അജന്‍ഡകളുയര്‍ത്തി, വര്‍ഗീയധ്രുവീകരണത്തിനുള്ള ശ്രമങ്ങള്‍ ഊര്‍ജിതമാക്കുകയായിരുന്നു സംഘ്പരിവാരം. അയോധ്യയിലേക്കുള്ള രഥയാത്രയുടെ പാര്‍ശ്വങ്ങളില്‍ അരങ്ങേറിയ വലുതും ചെറുതുമായ കലാപങ്ങളുടെ ഒക്കെ പരോക്ഷ ഉത്തരവാദിത്തമുണ്ടായിരുന്ന, ഹിന്ദുത്വത്തിന്റെ തീവ്ര മുഖമായി എല്‍ കെ അഡ്വാനി നേതൃത്വത്തിലുണ്ടായിരുന്നു. ജനാധിപത്യ സങ്കല്‍പ്പമോ, സംഘ്പരിവാരം ഉയര്‍ത്തുന്ന ഫാസിസ്റ്റ് ഭീഷണിയോ ജോര്‍ജ് ഫെര്‍ണാണ്ടസ് അടക്കമുള്ളവര്‍ ബി ജെ പിയുമായി കൈകോര്‍ക്കുമ്പോള്‍ സംഘ്പരിവാരത്തിന് ഉണ്ടാകാന്‍ ഇടയുള്ള ജനകീയ മുഖംമൂടിയെക്കുറിച്ചോ നിതീഷ് അടക്കമുള്ളവര്‍ക്ക് ചിന്തയേ ഉണ്ടായിരുന്നില്ല.


2002 ഫെബ്രുവരി - മാര്‍ച്ച് മാസങ്ങളിലായി ഗുജറാത്ത് വംശഹത്യാ ശ്രമത്തിന്റെ അരങ്ങാകുകയും പോലീസിനെ നിര്‍വീര്യമാക്കി നരേന്ദ്ര മോദിയും പട്ടാളത്തെ അയക്കുന്നത് വൈകിപ്പിച്ച് എ ബി വാജ്പയിയും അക്രമികള്‍ക്ക് അവസരമൊരുക്കിക്കൊടുക്കുകയും ചെയ്തപ്പോഴും ചോരയില്‍ മുങ്ങിയ കൈകളിലാണ് തങ്ങള്‍ കൈ ചേര്‍ത്തുവെച്ചിരിക്കുന്നത് എന്ന  തോന്നല്‍ നിതീഷിനും സംഘത്തിനും ഉണ്ടായതുമില്ല.


ആ നിതീഷാണ് നരേന്ദ്ര മോദിയെ പ്രധാനമന്ത്രി സ്ഥാനാര്‍ഥിയാക്കുന്നതില്‍ പ്രതിഷേധിച്ച് ബി ജെ പി ബന്ധം ഉപേക്ഷിച്ചത്. ഒരു ദശകം നീണ്ട ഭരണത്തിനെതിരെ സ്വാഭാവികമായി ഉയരാനിടയുള്ള ജനരോഷത്തെ മറികടക്കാനൊരു തന്ത്രം മാത്രമായിരുന്നു അതെന്ന് മതനിരപേക്ഷ മനസ്സുള്ളവര്‍ തിരിച്ചറിയുന്നത് ഇപ്പോഴാണെന്നേയുള്ളൂ. നരേന്ദ്ര മോദിക്കെതിരായ നിലപാടും ഫാസിസത്തിന്റെ ഭാഷ ജനാധിപത്യത്തില്‍ ഫലം കാണില്ലെന്ന പ്രസ്താവനയുമൊക്കെ അന്ന് വിളവെടുപ്പ് നടത്താനുള്ള രാഷ്ട്രീയം മാത്രമായിരുന്നു നിതീഷിന്. ഇപ്പോള്‍ ബി ജെ പിയുമായി ചേരുന്നതിലൂടെ അടുത്ത ടേമിലും ബീഹാറിന്റെ മുഖ്യമന്ത്രി സ്ഥാനം ഉറപ്പാക്കാനാകുമെന്ന കണക്കുകൂട്ടല്‍ അദ്ദേഹത്തിനുണ്ടാകണം. തേജസ്വി യാദവ് മാത്രമല്ല, ലാലു പ്രസാദ് യാദവിന്റെ മറ്റു മക്കളും അഴിമതി ആരോപണം നേരിടുന്നുണ്ട്. അഴിമതിക്കും സഖ്യകക്ഷിയിലെ കുടുംബവാഴ്ചക്കുമെതിരെ നിലപാടെടുത്തത് തന്റെ പ്രതിച്ഛായ വര്‍ധിപ്പിക്കുമെന്നും അദ്ദേഹം പ്രതീക്ഷിക്കുന്നു.


ഈ അവസരം നിതീഷിന് സമ്മാനിക്കാനാണ് ലാലുവിനെയും കുടുംബാംഗങ്ങളെയും ലക്ഷ്യമിടാന്‍ അന്വേഷണ ഏജന്‍സികള്‍ക്ക് കേന്ദ്ര സര്‍ക്കാര്‍ നിര്‍ദേശം നല്‍കിയത്. യജമാനന്‍ കല്‍പ്പിച്ചത് അടിമകള്‍ വേണ്ടവിധം ചെയ്തുകൊടുത്തു. ലാലു യാദവും കുടുംബാംഗങ്ങളും അഴിമതിക്കാരാണോ എന്നത് വേറെ വിഷയമായി കാണേണ്ടിവരുന്നത്, അന്വേഷണ ഏജന്‍സികളുടെ ഇടപെടലുണ്ടായത്, ആയിരത്തിന്റെയും അഞ്ഞൂറിന്റെയും നോട്ടുകള്‍ പിന്‍വലിച്ച നരേന്ദ്ര മോദിയുടെ നടപടിയെ നിതീഷ് കുമാര്‍ സ്വാഗതം ചെയ്തതിന് ശേഷമായിരുന്നുവെന്നത് പ്രത്യേകം ഓര്‍ക്കണം.


വംശഹത്യാ ശ്രമത്തിന് അധ്യക്ഷത വഹിച്ചുവെന്ന ആരോപണം താന്‍ മറന്നുകഴിഞ്ഞുവെന്നും അധീശത്വം അംഗീകരിച്ച് സാമന്തനാകാന്‍ തയ്യാറാണെന്നുമാണ്, ജനത്തെയാകെ വലയ്ക്കുകയും സാമ്പത്തിക മേഖലയെ മാന്ദ്യത്തിലേക്ക് നയിക്കുകയും സ്വതേ പ്രതിസന്ധിയിലായ കാര്‍ഷിക മേഖലയെ ആഴത്തിലേക്ക് തള്ളിയിടുകയും ചെയ്ത നോട്ട് പിന്‍വലിക്കലിനെ പ്രകീര്‍ത്തിച്ചപ്പോള്‍, നിതീഷ് അറിയിച്ചത്. (ഗുജറാത്ത് വംശഹത്യയിലെ പങ്ക് സംബന്ധിച്ച ആരോപണങ്ങള്‍ 2014ലെ ലോക് സഭാ തിരഞ്ഞെടുപ്പില്‍ നെഗറ്റീവ് പബ്ലിസിറ്റിയായി നരേന്ദ്ര മോദി ഉപയോഗപ്പെടുത്തിയതോടെ ഈ വിഷയം ഇനിയുമുന്നയിക്കുന്നതില്‍ പ്രതിപക്ഷ രാഷ്ട്രീയ പാര്‍ട്ടികള്‍ ആശയക്കുഴപ്പത്തിലായിരുന്നു. വൈകാതെ അവയില്‍ പലതും ഇക്കാര്യം  ഓര്‍ത്തതേയില്ല. വംശഹത്യാകാലത്ത് ബി ജെ പി ബന്ധത്തിലായിരുന്ന നിതീഷിന് ഇത് മറക്കേണ്ട കാര്യം പോലും ഇല്ലായിരുന്നു)


പിന്നീടങ്ങോട്ട് കാര്യങ്ങള്‍ സുഗമമായിരുന്നു. നിതീഷിനെ പ്രശംസിക്കാനുള്ള അവസരങ്ങള്‍ മോദി പാഴാക്കിയില്ല. തിരിച്ചും. രാഷ്ട്രപതി തിരഞ്ഞെടുപ്പിലെ പൊതു സ്ഥാനാര്‍ഥിയെ തീരുമാനിക്കാന്‍ പ്രതിപക്ഷ പാര്‍ട്ടികള്‍ യോഗം ചേര്‍ന്നപ്പോള്‍ മുഖ്യമന്ത്രിപ്പണിയുടെ തിരക്കില്‍ അമര്‍ന്ന നിതീഷ്, പിറ്റേദിവസം വിദേശരാഷ്ട്ര പ്രതിനിധിക്ക് നരേന്ദ്ര മോദിയൊരുക്കിയ വിരുന്നില്‍ ഹാജര്‍ വെച്ചു. രാഷ്ട്രപതി തിരഞ്ഞെടുപ്പില്‍ മോദിയുടെ നോമിനിക്ക് പിന്തുണ പ്രഖ്യാപിച്ച് കൂറുമാറല്‍ വൈകില്ലെന്ന് ജനത്തെ അറിയിച്ചു. ഇതിനൊക്കെ സമാന്തരമായാണ് അനധികൃത സ്വത്ത് സമ്പാദനം, കള്ളപ്പണം വെളുപ്പിക്കല്‍ എന്നിത്യാദി ആരോപണങ്ങളുടെ പേരില്‍ ലാലുവിന്റെ മക്കള്‍ക്കെതിരെ അന്വേഷണവും കേസുകളുമുണ്ടായത്. നടപടികള്‍ക്ക് വേഗം കൂടിയത്. അനധികൃത സ്വത്ത് സമ്പാദനമെന്നത്, രാഷ്ട്രീയ നേതാക്കളെയും എതിര്‍ പാര്‍ട്ടികളെയും വരുതിയില്‍ നിര്‍ത്താനുള്ള ആയുധമായി പ്രയോഗിച്ച അനുഭവം രാജ്യത്ത് പലതുണ്ട്. കോണ്‍ഗ്രസ് നേതൃത്വത്തിലുണ്ടായിരുന്ന സര്‍ക്കാറുകളും എ ബി വാജ്പയിയുടെ എന്‍ ഡി എ സര്‍ക്കാറും ഇതുപയോഗിച്ചിട്ടുണ്ട്. ആ കളി ആവര്‍ത്തിക്കുകയാണ് ബീഹാറില്‍. ഇതിലൂടെ ആര്‍ ജെ ഡിയുടെ നേതൃത്വത്തെ
പ്രതിസന്ധിയിലാക്കാമെന്നും അധികാരമോഹികളായ എം എല്‍ എമാരെ മറുകണ്ടം ചാടിച്ച് ആ പാര്‍ട്ടിയെ കൂടുതല്‍ ദുര്‍ബലമാക്കാമെന്നും നിതീഷും ബി ജെ പിയും കരുതുന്നുണ്ട്.


രാഷ്ട്രീയ പ്രതിസന്ധി നിതീഷിനെയും കാത്തിരിക്കുന്നു. ജെ ഡി (യു) പ്രസിഡന്റ് ശരദ് യാദവ് അടക്കം ഒരുകൂട്ടം നേതാക്കള്‍ നിതീഷിന്റെ ബി ജെ പി ബാന്ധവത്തെ എതിര്‍ക്കുന്നുണ്ട്. മുസ്‌ലിംകളുടെ പിന്തുണയില്‍ ജയിച്ച് നിയമസഭയിലെത്തിയ ജെ ഡി (യു) നേതാക്കള്‍ക്കൊന്നും സ്വന്തം മണ്ഡലത്തില്‍ നിന്ന് ഇനിയൊരു ജയം പ്രതീക്ഷിക്കാനാകില്ല. 1989ലെ ഭഗല്‍പൂര്‍ കലാപത്തിന്റെ ഉത്തരവാദികളെ രണ്ട് ദശകത്തിന് ശേഷം നിയമത്തിന് മുന്നിലെത്തിച്ച് ഇരകളായ മുസ്‌ലിംകള്‍ക്ക് നീതിയുറപ്പാക്കിയ നേതാവെന്ന പ്രതിച്ഛായ ആ സമുദായത്തിലെ വലിയൊരു വിഭാഗത്തെ നിതീഷിന്റെ ഉറച്ച പിന്തുണക്കാരാക്കിയിരുന്നു. അതൊക്കെ പുതിയ തീരുമാനത്തോടെ ഇല്ലാതാകും. ആര്‍ ജെ ഡിക്കാകും ഇതിന്റെ നേട്ടം. 1996ലെ ബി ജെ പിയല്ല, 2014ന് ശേഷമുള്ളത് എന്നതും എ ബി വാജ്പയിയല്ല നരേന്ദ്ര മോദിയെന്നതും നിതീഷിന് വെല്ലുവിളിയാകും.


കേവല ഭൂരിപക്ഷത്തോടെ കേന്ദ്രാധികാരം കിട്ടിയതിന് ശേഷം നടന്ന മഹാരാഷ്ട്ര നിയമസഭയിലേക്കുള്ള തിരഞ്ഞെടുപ്പില്‍ അതുവരെ സഖ്യത്തിലെ മുഖ്യകക്ഷിയായിരുന്ന ശിവസേനയെ വീട്ടില്‍ നിന്ന് തൊഴുത്തിലേക്ക് മാറ്റിക്കെട്ടാന്‍ ബി ജെ പിക്ക് പ്രയാസമൊന്നുമുണ്ടായില്ലെന്നത് നിതീഷിന് ഇപ്പോഴേ പഠിച്ചുവെക്കാം. ബി ജെ പിയുടെ നേതൃത്വത്തിലുള്ള സര്‍ക്കാറില്‍ വലിയ അധികാരമൊന്നുമില്ലാത്ത രണ്ടാംകക്ഷിയായ ശിവസേനയെ, എങ്ങനെയാണ് ദുര്‍ബലപ്പെടുത്തിക്കൊണ്ടിരിക്കുന്നത് എന്നതും ഓര്‍ത്തുവെക്കാം. 2019ലെ ലോക്‌സഭാ തിരഞ്ഞെടുപ്പില്‍ നിതീഷിന്റെയും ജെ ഡി (യു) വിന്റെയും മേല്‍ക്കോയ്മ ഇല്ലാതാക്കാന്‍ ബി ജെ പി ശ്രമം തുടങ്ങും. 2020ലെ നിയമസഭാ തിരഞ്ഞെടുപ്പോടെ അവരത് പൂര്‍ത്തിയാക്കുകയും ചെയ്യും. പശുവിന് കൂടാരത്തില്‍ തല കടത്താന്‍ അനുവാദം നല്‍കിയ ബീഹാറി, പശു കൂടാരം കൈയടക്കിയതുകണ്ട്  'സന്തോഷം' പ്രകടിപ്പിച്ച് നിസ്സഹായനായി പുറത്തുനില്‍ക്കുന്ന കാഴ്ച അധികം ദൂരെയല്ല.


പ്രധാനമന്ത്രി സ്ഥാനത്തേക്ക് വരെ ഉയര്‍ത്തിക്കാട്ടാന്‍ പാകത്തില്‍ വലുപ്പമാര്‍ജിച്ച, പ്രധാനമന്ത്രി പദം മോഹിക്കുന്നതില്‍ എന്താണ് തെറ്റെന്ന് പരസ്യമായി ചോദിച്ച, നിതീഷ്‌കുമാര്‍, കുഴി കുഴിക്കുകയാണ്, സ്വയം വീഴാന്‍. നിതീഷിനൊപ്പം ജെ ഡി (യു) എന്ന പാര്‍ട്ടി കൂടി ഇല്ലാതാകും. ദീര്‍ഘനാളത്തെ ബി ജെ പി ബാന്ധവം, ആ പാര്‍ട്ടിയിലെ അണികളെ സംഘ് ശീലങ്ങള്‍ പരിചയിക്കാന്‍ സഹായിച്ചിട്ടുണ്ട്. അവര്‍ക്ക് ജെ ഡി (യു)വില്‍ നിന്ന് ബി ജെ പിയിലേക്കുള്ള മാറ്റം നിതീഷിന് ഇന്നലെ ഉറങ്ങി ഇന്ന് എഴുന്നേറ്റപ്പോഴുണ്ടായ മാറ്റത്തേക്കാള്‍ എളുപ്പമായിരിക്കും.


വര്‍ഗീയ ഫാസിസത്തിനെതിരായ പ്രതിപക്ഷ ഐക്യനിര എന്ന സങ്കല്‍പ്പത്തിന് ശേഷിച്ചിരുന്ന വിശ്വാസ്യത കൂടി ഇല്ലാതാക്കി എന്നതാണ് ഈ തീരുമാനത്തിലൂടെ നിതീഷ് ഇന്ത്യന്‍ യൂണിയനോട് ചെയ്യുന്ന ഏറ്റവും വലിയ ദ്രോഹം. ഇത്തരം സഖ്യങ്ങള്‍ ഈടില്ലാത്തവയാണെന്ന സന്ദേശം ജനങ്ങള്‍ക്ക് നല്‍കുമ്പോള്‍, ഭാവിയില്‍ ഇത്തരം സഖ്യങ്ങളുടെ സാധ്യത പോലും ഇല്ലാതാക്കുകയാണ്. അതിനെ നേരിടാനും വിശ്വാസമാര്‍ജിക്കാവുന്ന ഐക്യനിരയുണ്ടാക്കാനും തത്കാലം ആര്‍ക്കും ത്രാണിയില്ലെന്നതാണ് യാഥാര്‍ഥ്യം.


'ഒന്നിന് പിറകെ ഒന്നായി തുടച്ചു നീക്കൂ എന്നാണ് നിങ്ങള്‍ (നരേന്ദ്ര മോദി) ജനങ്ങളോട് പറയുന്നത്' എന്ന് 2013ല്‍ പറഞ്ഞ നിതീഷ് തുടച്ചുനീക്കപ്പെടാന്‍ കഴുത്ത് നീട്ടിക്കൊടുക്കുകയാണ് ഞാനും എന്റെ പാര്‍ട്ടിയും എന്നാണ് ഇപ്പോള്‍ പറയുന്നത്. മോദി കാലത്ത് ഫാസിസത്തിന്റെ ഭാഷയാണ് ജനാധിപത്യത്തില്‍ ഫലം കാണുക എന്ന് തിരിച്ചറിഞ്ഞുകൊണ്ട്.

2017-07-24

അഴിമതി വിചാര ധാര


മഹാത്മന്‍,
അഞ്ഞൂറിന്റെയും ആയിരത്തിന്റെയും നോട്ടുകള്‍ പിന്‍വലിച്ച്, ഇന്ത്യന്‍ യൂണിയനില്‍ നിന്ന് കള്ളപ്പണവും കള്ളനോട്ടും ഇല്ലാതാക്കുന്നതിന് അങ്ങ് ശ്രമിച്ചത്, രാജ്യം ഹര്‍ഷോന്മാദത്തോടെ സ്വീകരിക്കുകയും പുളകിതഗാത്രരായ ജനം ബാങ്കുകള്‍ക്കും എ ടി എമ്മുകള്‍ക്കും മുന്നില്‍ ശാന്തരായി വരിനില്‍ക്കുകയും ചെയ്തത് ലോക ചരിത്രത്തിലെ തന്നെ അപൂര്‍വതയായിരുന്നു. വധശിക്ഷ വിധിക്കാന്‍ പരമോന്നത കോടതി നിശ്ചയിച്ച മാനദണ്ഡപ്രകാരമാണെങ്കില്‍ അപുര്‍വങ്ങളില്‍ അപൂര്‍വം. അന്നാ ചെയ്ത മഹദ്കൃത്യത്തിന് ശേഷം ഇന്ത്യന്‍ യൂണിയനാകെ മാറിപ്പോയി. വിപണിയില്‍ നിന്ന് തിരിച്ചെത്തിയ നോട്ടുകള്‍ എണ്ണിത്തീര്‍ക്കാന്‍ റിസര്‍വ് ബാങ്ക് ഓഫ് ഇന്ത്യയിലെ യന്ത്രങ്ങള്‍ക്ക് കഴിയാത്തിടത്തോളം മാറി.


സ്വതേ ദുരിതത്തിലായിരുന്ന കര്‍ഷകര്‍, കൂടുതല്‍ ദുരിതത്തിലാകകൊണ്ട് കടമെഴുതിത്തള്ളണമെന്നാവശ്യപ്പെട്ട് തെരുവിലിറങ്ങി. അനുസരണമാണ് പ്രധാനമെന്നും അതിലാണ് ദേശീയതയും രാജ്യസ്‌നേഹവുമെന്ന് ഉറപ്പുള്ള അങ്ങയുടെ പ്രതിപുരുഷന്‍ മധ്യപ്രദേശിലിരുന്ന് കാഞ്ചി വലിച്ചു. തൃണസമാനരായ ആറേഴെണ്ണം ഉടനടി തീര്‍ന്നു. എന്നാലും പ്രഖ്യാപിച്ചു കടമെഴുതിത്തള്ളല്‍. അവിടെ മാത്രമല്ല മഹാരാഷ്ട്രയിലും ഉത്തര്‍ പ്രദേശിലും രാജസ്ഥാനിലുമൊക്കെ. വിപണിയിലുള്ള നോട്ടൊക്കെ പിന്‍വലിച്ചതോടെ ഖജാന നിറഞ്ഞുകവിയുമെന്നും ബാങ്കുകളാകെ കരുത്താര്‍ജിച്ച് ഇന്ത്യക്കാരല്ലാത്തവര്‍ക്കുവരെ കടം നല്‍കാന്‍
പാകത്തിലാകുമെന്നുമൊക്കെയാണ് നവംബര്‍ എട്ടിന് ശേഷമുള്ള ദിനങ്ങളില്‍ അങ്ങില്‍ തുടങ്ങി ഇങ്ങ് താഴെ തെക്കേയറ്റത്തുള്ള 'ഗോ'പാലകൃഷ്ണന്‍മാര്‍ വരെ പറഞ്ഞിരുന്നത്. ഇത്ര കരുത്താര്‍ജിച്ചിട്ടും കാര്‍ഷിക കടം എഴുത്തിത്തള്ളണമെങ്കില്‍ അതിനുള്ള വെള്ളം സംസ്ഥാനങ്ങള്‍ തന്നെ വെക്കണമെന്ന് മേലധികാരത്തിലെ കണക്കപ്പിള്ള വിധിച്ചു. ആയിരവും അഞ്ഞൂറും പിന്‍വലിച്ചതോടെ സാമ്പത്തികാരോഗ്യം മെച്ചപ്പെടുമെന്ന കണക്ക് പിഴച്ചതാണോ, ഇവ്വിധം കൈകഴുകാന്‍ പ്രേരിപ്പിച്ചതെന്ന സംശയം ബലത്തില്‍ തന്നെയുണ്ട്.


പ്രഥമവും പ്രധാനവുമായി പറഞ്ഞ രണ്ട് ലക്ഷ്യങ്ങള്‍, അത് നിറവേറ്റിയെന്നതില്‍ തര്‍ക്കം വേണ്ട. അതില്‍ പരസ്യമായി തിളങ്ങിയത്, അടുത്തകാലത്തൊന്നും അധികാരം കണികാണില്ലെന്ന് ദേശീയാധ്യക്ഷന്‍ അമിത് ഷാ നേരിട്ട് വിലയിരുത്തിയ കേരളത്തിലായിരുന്നുവെന്നത് അങ്ങേക്ക് സമ്മാനിക്കുന്ന പുളകം എത്രത്തോളമായിരിക്കും. തദ്ദേശഭരണ സ്ഥാപനങ്ങളിലെ  ഇരുപത്തിയേഴായിരത്തോളം സീറ്റില്‍ ആയിരത്തഞ്ഞൂറോളം മാത്രം ജയിച്ച, 140 അംഗ നിയമസഭയില്‍ ഒരിടത്ത് മാത്രം താമര വിരിയിച്ച, പാര്‍ലിമെന്റിലേക്ക് അങ്ങയുടെ ദയാദാക്ഷിണ്യമായ നാമനിര്‍ദേശം കൊണ്ട് മാത്രം അംഗത്വം ലഭിച്ച കേരളത്തില്‍ നിന്ന് ഇത്രയും സാധിച്ചുവെങ്കില്‍ വലിയ ഭൂരിപക്ഷത്തില്‍ അധികാരത്തിലിരിക്കുന്ന സംസ്ഥാനങ്ങളില്‍ നിന്ന് എന്തൊക്കെ സാധിച്ചിട്ടുണ്ടാകും! കേന്ദ്രാധികാരം കൈയാളുന്നവര്‍ എത്ര നേട്ടമുണ്ടാക്കിയിട്ടുണ്ടാകും!


കേരളത്തിലെ നേട്ടത്തെ, അറിഞ്ഞ വിവരമനുസരിച്ച്, ഇങ്ങനെ സംഗ്രഹിക്കാം. പിന്‍വലിച്ച നോട്ട് എണ്ണിത്തീര്‍ക്കാന്‍ പ്രയാസപ്പെടുന്ന റിസര്‍വ് ബാങ്ക് ഓഫ് ഇന്ത്യക്ക് പുതുതായി നോട്ട് അച്ചടിച്ചിറക്കുക ബുദ്ധിമിട്ടാണെന്ന് മനസ്സിലാക്കി തൃശൂരില്‍ (പാറമേക്കാവും തിരുവമ്പാടിയും വടക്കുംനാഥനെ സാക്ഷിയാക്കി പൂരം കൊള്ളുന്ന നാടാകയാല്‍ സ്ഥലം അങ്ങ് അറിയാതിരിക്കാന്‍ വഴിയില്ല) അങ്ങയുടെ പാര്‍ട്ടി പ്രവര്‍ത്തകര്‍ സ്വന്തം കമ്മട്ടത്തില്‍ നോട്ട് അച്ചടിച്ചതാണ് അതില്‍ പ്രഥമം. രാജ്യസ്‌നേഹത്താല്‍ പ്രചോദിതമായ ഒന്നായി മാത്രമേ ഇതിനെ കാണേണ്ടതുള്ളൂ. തെറ്റായ പ്രചാരണം നടത്തുന്നവരുടെ സംതൃപ്തിക്ക് വേണ്ടി വേണമെങ്കില്‍ ഇതിനെ വ്യക്തിയധിഷ്ഠിതമായ ക്രിമിനല്‍ കുറ്റമായി പാര്‍ട്ടി കണക്കാക്കും. നോട്ട് ക്ഷാമം പൂര്‍ണമായി പരിഹരിക്കാന്‍ പാകത്തില്‍ സ്വകാര്യ കമ്മട്ടം പ്രവര്‍ത്തിപ്പിക്കാതിരുന്നത് രാജ്യത്തോടുള്ള വഞ്ചനയായും കണക്കാക്കും.


മൂത്രമുള്‍പ്പെടെ ഗോക്കളുടെ അവശിഷ്ടങ്ങളുടെ ഔഷധമൂല്യം കണ്ടെത്താന്‍ കൊണ്ടുപിടിച്ച ശ്രമം അങ്ങയുടെ നേതൃത്വത്തിലുള്ള സര്‍ക്കാര്‍ ആരംഭിച്ചിട്ടുണ്ടല്ലോ. ഇതിനുള്ള പഠനം കഴിഞ്ഞുവേണം മയില്‍ മുതല്‍ എലി വരെയുള്ളവയിലെ ഔഷധഗുണങ്ങള്‍ കണ്ടെത്താന്‍. അത് സാധിക്കണമെങ്കില്‍ രാജ്യത്ത് കൂടുതല്‍ ഭിഷഗ്വരന്‍മാരുണ്ടാകണം, ഗവേഷകന്‍മാരുണ്ടാകണം. അതിനുള്ള എളിയ ശ്രമമാണ് കേരളത്തിലെ  രണ്ട് മെഡിക്കല്‍ കോളജുകള്‍ക്ക് കൂടി (മറ്റിടങ്ങളിലെ കണക്ക് വൈകാത വരുമെന്ന് കരുതാം) മെഡിക്കല്‍ കൗണ്‍സില്‍ ഓഫ് ഇന്ത്യയുടെ അംഗീകാരം നേടിക്കൊടുക്കാന്‍ മുന്‍കൈ എടുത്തപ്പോള്‍ സംസ്ഥാന ബി ജെ പി ഘടകം നടത്തിയത്. ഇവിടെയും പ്രേരകഘടകം രാജ്യസ്‌നേഹം തന്നെ, സംശയം വേണ്ട. അംഗീകാരം വേഗത്തിലാക്കുക എന്ന ഉദ്ദേശ്യത്തില്‍ ഏതാനും കോടികള്‍ ആവശ്യപ്പെട്ടു, ഉദ്ദേശ്യശുദ്ധിയോടെ ഉത്തമവിശ്വാസത്തില്‍. അതുകൊണ്ട് അതിനെ അഴിമതിയായി കാണാനേ കഴിയില്ല. അങ്ങനെ കാണുന്നതും അഴിമതിയില്‍ ബി ജെ പിയുടെ സംസ്ഥാന നേതാക്കളില്‍ പലര്‍ക്കും പങ്കുണ്ടെന്ന് പറയുന്നതും തെറ്റായ പ്രചാരണമാണ് (കുപ്രചാരണമെന്ന് പറഞ്ഞ് ആക്ഷേപിക്കുന്നില്ല).


പണം വാങ്ങിയാല്‍ കാര്യസാദ്ധ്യം ഉറപ്പാക്കുക എന്നത് സംഘചര്യയാണ്. അതില്‍ ഭംഗമുണ്ടായാല്‍ വഞ്ചന. വ്യക്തിയധിഷ്ഠിതമായ ക്രിമിനല്‍ കുറ്റം. പാര്‍ട്ടിയില്‍ നിന്ന് ഉടനടി പുറത്താക്കി. ഏതന്വേഷണവുമായും സഹകരിക്കാനും തീരുമാനിച്ചു. ഈ വഞ്ചനയന്വേഷിച്ച കമ്മീഷന്‍ ഒരു കാര്യം വ്യക്തമായി കണ്ടെത്തിയിട്ടുണ്ട്. ശേഖരിച്ച പണം ഡല്‍ഹിയിലെത്തിച്ചത് പെരുമ്പാവൂര്‍ സ്വദേശിയായ മുസ്‌ലിം ഹവാലക്കാരനിലൂടെയാണെന്ന്. നേരിട്ട് ഡല്‍ഹിയിലെത്തിക്കാന്‍ മാര്‍ഗമുണ്ടായിരിക്കെ, സംഗതി ഹവാലയാക്കാന്‍ ബി ജെ പി നേതാവിനെ/നേതാക്കളെ നിര്‍ബന്ധിച്ച, അവരെ വഴിതെറ്റിച്ച മുസ്‌ലിം ഹവാലക്കാരന്റെ പങ്ക് പ്രത്യേകം അന്വേഷിക്കേണ്ടതാണ്. അതുകൊണ്ടാണ് എന്‍ ഐ എ യെ തന്നെ രംഗത്തിറക്കണമെന്ന് ആവശ്യപ്പെട്ടത്. സംഗതി അഴിമതിയല്ലെന്ന് ഉറപ്പായിട്ടും അഴിമതിയാണെന്ന് തോന്നിപ്പിക്കും വിധത്തില്‍ അന്വേഷണ റിപ്പോര്‍ട്ട് തയ്യാറാക്കിയ കമ്മീഷന്‍ അംഗങ്ങള്‍ ദേശീയബോധത്തില്‍ നിന്ന് വ്യതിചലിച്ചോ എന്നതില്‍ സംശയമുണ്ട്. റിപ്പോര്‍ട്ട് ചോരുകയും ചെയ്തു. ഈ സാഹചര്യത്തില്‍ അവരിലൊരാളെയെങ്കിലും പുറത്താക്കേണ്ടത്, ഭാവിയില്‍ ഇത്തരം വ്യതിചലനമുണ്ടാകുന്നത് തടയാന്‍ പ്രധാനമാണ്.


അഴിമതിയുടെ കാര്യത്തില്‍ ബി ജെ പിയുടെ കേരള ഘടകം മുന്നോട്ടുവെക്കുന്ന, ദേശീയതയിലും രാജ്യസ്‌നേഹത്തിലും അധിഷ്ഠിതമായ ദര്‍ശനം അങ്ങ് അംഗീകരിക്കുമെന്നും തുടര്‍ നടപടി സ്വീകരിക്കുമെന്നും പ്രതീക്ഷിക്കുന്നു. ദേശീയ നേതൃത്വത്തിന്റെ പ്രതിനിധി കൂടി പങ്കെടുത്ത യോഗത്തിലാണ് ഈ ദര്‍ശനം ആവിഷ്‌കരിച്ചത് എന്നതിനാല്‍ ഇക്കാര്യം പാര്‍ട്ടിയുടെ ഔദ്യോഗിക നിലപാടായി അങ്ങയെ അറിയിക്കേണ്ട ഉത്തരവാദിത്തം അമിത് ഷായില്‍ നിക്ഷിപ്തവുമാണ്. ഈ ദര്‍ശനം അംഗീകരിക്കുന്നതോടെ ടെലികോം, കല്‍ക്കരി, കോമണ്‍വെല്‍ത്ത് എന്നിങ്ങനെ നിലവില്‍ നടത്തിക്കൊണ്ടിരിക്കുന്ന കേസുകള്‍ പിന്‍വലിക്കാം. പണം വാങ്ങുകയോ സര്‍ക്കാര്‍ ഖജാനക്ക് നഷ്ടം വരുത്തുകയോ ചെയ്ത ഈ ഇടപാടുകളിലൊക്കെ എല്ലാ കമ്പനികള്‍ക്കും കാര്യസാദ്ധ്യമുണ്ടായിട്ടുണ്ട്. കാര്യസാദ്ധ്യമുണ്ടായ സ്ഥിതിക്ക് വഞ്ചനാക്കുറ്റം പോലും നിലനില്‍ക്കില്ല. പുതിയ ദര്‍ശനത്തിന്റെ അടിസ്ഥാനത്തില്‍ അഴിമതി നിരോധന നിയമം ഭേദഗതി ചെയ്യുക എന്നത് അടിയന്തര ബാധ്യതയാണ്. അഴിമതി എന്നത് പണവുമായി ബന്ധപ്പെട്ട സംഗതിയായതിനാല്‍ ഭേദഗതി മണി ബില്ലായി അവതരിപ്പിച്ച്, തെറ്റായ പ്രചാരണം നടത്തുന്നവര്‍ക്ക് ഭൂരിപക്ഷം ഇപ്പോഴുമുള്ള രാജ്യസഭയെ മറികടക്കാനും സാധിക്കും.


കാര്യസാദ്ധ്യമുണ്ടായാല്‍ അഴിമതിയല്ലെന്ന ദര്‍ശനം അങ്ങ് പ്രഖ്യാപിച്ച കള്ളപ്പണത്തോടുള്ള യുദ്ധത്തോട് ചേര്‍ന്നുനില്‍ക്കുന്നതാണ് എന്നതും പ്രത്യേകം ശ്രദ്ധിക്കണം. വികാരം മുറ്റി നില്‍ക്കുന്ന ശബ്ദത്തില്‍ കാലാധന്‍ എന്ന് വിശേഷിപ്പിക്കുന്ന പണത്തില്‍ വലിയൊരു ഭാഗം സൃഷ്ടിക്കപ്പെടുന്നത് അഴിമതിയിലൂടെയാണ്. കാര്യസാദ്ധ്യം ലാക്കാക്കി പണം കൊടുക്കുകയോ വാങ്ങുകയോ ചെയ്യുന്നത് അഴിമതിയല്ലെന്ന ദര്‍ശനം അംഗീകരിക്കപ്പെടുന്നതോടെ കള്ളപ്പണത്തിന്റെ വലിയൊരു ഭാഗം ഉടനില്ലാതാകും. നോട്ട് പിന്‍വലിക്കുക, ആദായ നികുതി നിയമം ഭേദഗതി ചെയ്യുക, ആദായ നികുതി ഉദ്യോഗസ്ഥര്‍ക്ക് നോട്ടീസ് കൂടാതെ പരിശോധനക്ക് അനുമതി നല്‍കുക തുടങ്ങിയ വിഷമകരമായ നടപടികളിലൂടെ അങ്ങ് ഇല്ലാതാക്കാന്‍ ശ്രമിച്ച കള്ളപ്പണത്തില്‍ വലിയൊരു ഭാഗത്തെ നിമിഷനേരം കൊണ്ട് അസാധുവാക്കാന്‍ പാകത്തില്‍ ദര്‍ശനമവതരിപ്പിച്ച ബി ജെ പിയുടെ കേരള ഘടകത്തെ എത്ര അഭിനന്ദിച്ചാലും മതിയാകില്ല.  പ്രത്യേക ദേശീയ കൗണ്‍സില്‍ വിളിച്ച് അഭിനന്ദനം ഔപചാരികമായി അറിയിക്കണം.


ദേശീയ കൗണ്‍സില്‍ വിജയിക്കുന്നതിനൊപ്പം അതിന്റെ സംഘാടകരായ പാര്‍ട്ടി നേതാക്കളും വിജയിക്കണമെന്നത് മര്യാദ. ഔദ്യോഗിക പിരിവിനൊപ്പം അനൗദ്യോഗിക പിരിവ് നടത്തിയത് അതുകൊണ്ടാണ്. അനുകരണീയമായ മാതൃകയല്ലെന്ന് ആരെങ്കിലും പറഞ്ഞാല്‍ അത് ദേശീയബോധമില്ലാത്തതുകൊണ്ടും രാജ്യസ്‌നേഹത്തിന്റെ കുറവുമൊണ്ടുമാകണം. തെറ്റായ പ്രചാരണത്തിന്റെ മറ്റൊരു മുഖം. കാര്യസാദ്ധ്യമുണ്ടായിട്ടുണ്ട് എന്നതിനാല്‍ ഇവിടെ അഴിമതിയോ വഞ്ചനയോ നടന്നിട്ടില്ലെന്നത് പ്രത്യേകം സ്മരണീയമാണ്.


പിന്നെയുള്ളതൊക്കെ പഴങ്കഥകളാണ്. എ ബി വാജ്പയിയുടെ നേതൃത്വത്തില്‍ എന്‍ ഡി എ അധികാരത്തിലിരുന്ന കാലത്ത് പെട്രോള്‍ പമ്പുകളും ഗ്യാസ് ഏജന്‍സികളും അനുവദിക്കാന്‍ പണം വാങ്ങിയെന്നതാണ് അതിലൊന്ന്. പണം നല്‍കിയവര്‍ക്കൊക്കെ പമ്പോ എജന്‍സിയോ ലഭിച്ചതിനാല്‍ അഴിമതിയോ വഞ്ചനയോ ആരോപിക്കാനാകില്ല. അന്നത്തെ ഇടപാടിന് പണം വാങ്ങിയെന്ന് ആരോപിക്കപ്പെടുന്ന ചിലരൊക്കെ ഇന്ന് സംസ്ഥാന നേതൃത്വത്തിലുണ്ട്. കാര്യസാദ്ധ്യം ഉറപ്പാക്കുക എന്നതില്‍ കവിഞ്ഞ് എന്ത് യോഗ്യതയാണ് ഉന്നത നേതൃതലങ്ങളിലേക്ക് സഞ്ചരിക്കാനുള്ള യോഗ്യത! അത് മനസ്സിലാക്കാത്തവരാണ് പഴങ്കഥകള്‍ പാടി, തെറ്റായ പ്രചാരണം നടത്തുന്നത്.


അങ്ങ് മുഖ്യമന്ത്രിയായിരിക്കെ ഗുജറാത്തില്‍ നടന്ന ഭൂമി ഇടപാടുകള്‍ ഈ ഘട്ടത്തില്‍ പ്രസക്തമാണ്. കണ്ണായ ഭൂമി തുച്ഛവിലക്ക് അദാനിക്കും ടാറ്റക്കുമൊക്കെ പാട്ടത്തിന് നല്‍കിയെന്നും ഖജനാവിന് വലിയ നഷ്ടമുണ്ടാക്കിയെന്നുമായിരുന്നു ആരോപണം. അദാനി തുറമുഖം പണിതു, ടാറ്റ കാര്‍ കമ്പനിയുണ്ടാക്കി... അങ്ങനെ കാര്യസാദ്ധ്യമുണ്ടായിരുന്നു. അതുകൊണ്ട് തന്നെ അതേക്കുറിച്ചൊന്നും അന്വേഷണം പോലുമുണ്ടായില്ല. വികസനത്തിലെ ഗുജറാത്ത് മാതൃക എന്ന് ശരിയായി പ്രചരിപ്പിക്കുകയും ചെയ്തു. അങ്ങയുടെ മാതൃക പിന്തുടര്‍ന്ന് തന്നെയാണ് കേരള ഘടകം പുതിയ ദര്‍ശനം അവതരിപ്പിച്ചിരിക്കുന്നത് എന്നത് കൂടുതല്‍ പുളകം സമ്മാനിക്കുന്നുണ്ടാകും. കേരളത്തില്‍ അധികാരത്തിലെത്തുക എന്നത് മോഹമായി സൂക്ഷിക്കാന്‍ പോലും ത്രാണിയില്ലാത്ത നേതൃനിര വികസനരംഗത്ത് ഇത്രയും സംഭാവനകള്‍ നല്‍കുന്നുണ്ടല്ലോ എന്നതിലും അങ്ങേക്ക് അഭിമാനിക്കാം.

2017-07-10

മാരീചന്‍ (ഐ പി എസ്)


നടിയെ തട്ടിക്കൊണ്ടുപോയി ആക്രമിച്ച കേസില്‍ നടന്‍ ദിലീപിനെയും സംവിധായകന്‍ നാദിര്‍ഷയെയും പൊലീസ് ചോദ്യംചെയ്തപ്പോള്‍ സംസ്ഥാന പോലീസ് സേനയുടെ മേധാവിയായിരുന്നു ടി പി സെന്‍കുമാര്‍. ഈ കേസില്‍ അന്വേഷണ സംഘത്തില്‍ വേണ്ടത്ര ഏകോപനമില്ലെന്നും അന്വേഷണത്തിന് നേതൃത്വം നല്‍കുന്ന ഐ ജി ദിനേന്ദ്ര കശ്യപിനെ മാറ്റി നിര്‍ത്തി അന്വേഷണത്തിന് മേല്‍നോട്ടം വഹിക്കുന്ന എ ഡി ജി പി, ബി സന്ധ്യ നടപടികള്‍ സ്വീകരിച്ചത് ശരിയായില്ലെന്നും പോലീസ് മേധാവി സ്ഥാനത്തിരിക്കെ സെന്‍കുമാര്‍ പറഞ്ഞിരുന്നു. അന്വേഷണ സംഘത്തിന് വേണ്ടത്ര ഏകോപനം വേണമെന്ന് കാണിച്ച് പ്രത്യേക സര്‍ക്കുലര്‍ ഇറക്കുകയും ചെയ്തു. പ്രമുഖ നടനെയും തോഴനായ സംവിധായകനെയും ചോദ്യംചെയ്തതോടെ വാര്‍ത്തകളുടെ വലുപ്പം വര്‍ധിച്ചു. വസ്തുതകളും നിറം ചേര്‍ത്ത ഭാവനകളും വേര്‍തിരിച്ചറിയാന്‍ പറ്റാത്ത വിധത്തില്‍ അതൊക്കെ മാധ്യമങ്ങളില്‍ നിറഞ്ഞു. ഇതിനിടെ പൊലീസ് മേധാവി നടത്തിയ പ്രസ്താവന ഫലത്തില്‍, അന്വേഷണ സംഘത്തിന്റെ വിശ്വാസ്യതയെ ഇല്ലാതാക്കുന്നതായിരുന്നു.


പൊലീസ് മേധാവി സ്ഥാനത്തു നിന്ന് വിരമിച്ചതിന് ശേഷം സെന്‍കുമാര്‍ തുടര്‍ച്ചയായി നല്‍കിയ അഭിമുഖങ്ങളിലെല്ലാം നേരത്തെ നടത്തിയ പരാമര്‍ശങ്ങളെ സാധൂകരിക്കും വിധത്തില്‍ സംസാരിച്ചു. നടനെയും സംവിധായകനെയും ചോദ്യംചെയ്യാന്‍ വിളിക്കുമ്പോള്‍, കേസ് കോടതിയില്‍ തെളിയിക്കാന്‍ പാകത്തിലുള്ള തെളിവുകള്‍ അന്വേഷണ സംഘത്തിന്റെ പക്കലുണ്ടായിരുന്നില്ലെന്നും അതാണ് താന്‍ ചൂണ്ടിക്കാട്ടിയതെന്നും പിന്നീട് വിശദീകരിക്കുകയും ചെയ്തു. നടിക്കു നേര്‍ക്കുണ്ടായ അതിക്രമത്തിന്റെ ഗൂഢാലോചനയില്‍ നടനും സംവിധായകനും പങ്കുണ്ടോ ഇല്ലയോ എന്നതൊക്കെ അന്വേഷണത്തിലൂടെയും കോടതി നടപടികളിലൂടെയും തിരിയേണ്ടതാണെന്നതിനാല്‍ അത് മാറ്റിവെക്കാം. അന്വേഷണം സത്യസന്ധമായി നടക്കുമോ എന്ന സംശയവും നിലനിര്‍ത്താം. പക്ഷേ, അന്വേഷണത്തിന്റെ ഒരു ഘട്ടത്തില്‍ അതിന് നേതൃത്വം നല്‍കുന്ന സംഘത്തിന്റെ വിശ്വാസ്യത പരസ്യമായി ചോദ്യംചെയ്യാന്‍ തയ്യാറാകുന്ന പൊലീസ് മേധാവിയുടെ ഉദ്ദേശ്യത്തെ എങ്ങനെ പരിഗണിക്കണമെന്നത് പ്രധാന ചോദ്യമാണ്.


എറണാകുളം ജില്ലയിലെ പുതുവൈപ്പില്‍ സ്ഥാപിക്കുന്ന ദ്രവീകൃത പെട്രോളിയം വാകത്തിന്റെ സംഭരണി ജീവനും സ്വത്തിനും ഭീഷണിയുയര്‍ത്തുന്നുവെന്ന് കാണിച്ച് സമരത്തിനിറങ്ങിയ നാട്ടുകാരെ പൊലീസ് തല്ലിച്ചതച്ചതിന്റെ ദൃശ്യങ്ങളും ചിത്രങ്ങളും ജനം മുഴുവന്‍ കണ്ടതാണ്. അതിന് നേതൃത്വം നല്‍കിയ അസിസ്റ്റന്റ് കമ്മീഷണര്‍ക്കെതിരെ നടപടി വേണമെന്ന് ഭരണ - പ്രതിപക്ഷ ഭേദമില്ലാതെ രാഷ്ട്രീയ പാര്‍ട്ടികള്‍ ആവശ്യപ്പെടുകയും ചെയ്തു. പൊലീസ് മേധാവി സ്ഥാനത്തിരിക്കെ, ആ ദൃശ്യങ്ങള്‍ പരിശോധിച്ച സെന്‍കുമാറിന് പക്ഷേ, പൊലീസ് എന്തെങ്കങ്കിലം അതിക്രമം കാട്ടിയതായി തോന്നിയതേയില്ല. പൊലീസ് ഉദ്യോഗസ്ഥര്‍ അതിക്രമം കാട്ടിയതിന്റെ ഒരു തെളിവ് കാട്ടിത്തരാനാണ് അദ്ദേഹം ആവശ്യപ്പെട്ടത്.


ഏതാനും വര്‍ഷം മുമ്പ് തിരുവനന്തപുരത്തെ എം ജി കോളജില്‍ വിദ്യാര്‍ഥി സംഘടനകളുടെ പ്രവര്‍ത്തകര്‍ തമ്മില്‍ സംഘര്‍ഷമുണ്ടാകുകയും പൊലീസ് ക്യാംപസിനകത്തു കടന്ന് വിദ്യാര്‍ഥികളെ നേരിടുകയും ചെയ്തപ്പോള്‍ കണ്ട സെന്‍കുമാര്‍ ഇതായിരുന്നില്ല. അഖില ഭാരതീയ വിദ്യാര്‍ഥി പരിഷത്തിന് (എ ബി വി പി) സ്വാധീനമുള്ള കോളജാണ് എം ജി. അവിടെ കയറി വിദ്യാര്‍ഥികളെ തല്ലിയ പൊലീസ് ഉദ്യോഗസ്ഥനെ കോളറിന് കുത്തിപ്പിടിച്ച് ശകാരിക്കുകയും സര്‍വീസില്‍ നിന്ന് സസ്‌പെന്‍ഡ് ചെയ്യുമെന്ന് ഭീഷണി മുഴക്കുകയും ചെയ്യുന്ന സെന്‍കുമാറിന്റെ ദൃശ്യം ഇപ്പോള്‍ സമൂഹ മാധ്യമങ്ങളില്‍ പ്രചരിക്കുന്നുണ്ട്.


അതില്‍ നിന്ന് വേണം പുതുവൈപ്പിലെ പൊലീസ് നടപടിയെ ന്യായീകരിക്കുന്ന സെന്‍കുമാറിനെ കാണാന്‍. പുതുവൈപ്പിലെ സമരത്തിന് പിന്നില്‍ തീവ്രവാദ സംഘടനകളുണ്ടെന്ന അദ്ദേഹത്തിന്റെ വിശദീകരണം വായിക്കാന്‍. മെട്രോ ഉദ്ഘാടനത്തിന് എത്തുന്ന പ്രധാനമന്ത്രിക്കു നേര്‍ക്ക് ഭീകരവാദ ഭീഷണിയുണ്ടായിരുന്നുവെന്നും ആക്രമണം സംഘടിപ്പിക്കാനുള്ള 'ടെറര്‍ മൊഡ്യൂള്‍' കൊച്ചിയിലുണ്ടായിരുന്നുവെന്നുമുള്ള അന്നത്തെ പൊലീസ് മേധാവിയുടെ വാക്കുകളെ കേള്‍ക്കാന്‍.  'നാഷനല്‍ സ്പിരിറ്റി'ന് (ദേശീയ വികാരം) എതിരായിട്ട് പോകുന്ന തീവ്രവാദത്തെയാണ് ഇല്ലായ്മ ചെയ്യേണ്ടത് എന്ന ഉറച്ച ബോധ്യം സെന്‍കുമാറിന് മുമ്പേയുണ്ട്. അതുകൊണ്ടാണ് എ ബി വി പിക്ക് സ്വാധീനമുള്ള കോളജില്‍ വിദ്യാര്‍ഥികളെ തല്ലിയ പൊലീസുകാരനെ കൈകാര്യം ചെയ്യാന്‍ മടിക്കാതിരുന്ന സെന്‍കുമാര്‍, പുതുവൈപ്പിലെ സമരക്കാരെ പൊലീസ് നേരിട്ടതിനെ ന്യായീകരിക്കുന്നത്. ജീവനും സ്വത്തിനുമുള്ള ഭീഷണി ചൂണ്ടിക്കാട്ടി സമരത്തിനിറങ്ങിയ നാട്ടുകാരുടെ വിശ്വാസ്യതയെ, തീവ്രവാദത്തിന്റെ പേരുപറഞ്ഞ് ഇല്ലാതാക്കുകയായിരുന്നു പൊലീസ് മേധാവി. നാടിന്റെ വികസനം ലാക്കാക്കി ഭരണകൂടം ആസൂത്രണം ചെയ്യുന്ന പദ്ധതികളെ എതിര്‍ക്കുക എന്നാല്‍ 'നാഷനല്‍ സ്പിരിറ്റി'ന് വിരുദ്ധം തന്നെ!


2015 മെയില്‍ സംസ്ഥാന പൊലീസ് മേധാവിയായി നിയമിതനായ സെന്‍കുമാറിനെ ആ സ്ഥാനത്ത് ഇരുത്തിക്കൊണ്ടുതന്നെ എല്‍ ഡി എഫിന്റെ നയങ്ങള്‍ക്കനുസരിച്ച് പൊലീസിനെ ചലിപ്പിക്കാനുള്ള കരുത്ത് മുഖ്യമന്ത്രി സ്ഥാനത്തേക്ക് എത്തിയ പിണറായി വിജയന്‍ കാണിക്കാതിരുന്നത് (പകരം നിയമിച്ച ലോക്‌നാഥ് ബഹ്‌റ എല്‍ ഡി എഫിന്റെ നയങ്ങള്‍ക്കനുസരിച്ചാണോ പൊലീസിനെ നയിച്ചത് എന്ന ചോദ്യം നിലനില്‍ക്കെത്തന്നെ) ചെറുതല്ലാത്ത അവസരം സെന്‍കുമാറിന് മുന്നില്‍ തുറന്നുനല്‍കി. സി പി എമ്മിന്റെ അജന്‍ഡകള്‍ നടപ്പാക്കാനുള്ള ശ്രമം എതിര്‍ക്കാന്‍ ഇടയുള്ള ഉദ്യോഗസ്ഥനെന്ന പ്രതിച്ഛായ. സെന്‍കുമാറിനെ മാറ്റിയത്, സര്‍ക്കാറിനെ അടിക്കാനുള്ള വടിയായി എതിര്‍ചേരി ഉപയോഗിക്കുക കൂടി ചെയ്തതോടെ ആ പ്രതിച്ഛായ ഉറച്ചു. സുപ്രീം കോടതിയില്‍ നിന്ന് അനുകൂല വിധി നേടി പൊലീസ് മേധാവി സ്ഥാനത്ത് സെന്‍കുമാര്‍ തിരിച്ചെത്തിയതോടെ ആ പ്രതിച്ഛായക്ക് വിശ്വാസ്യതയുടെ ആവരണം കൂടി കിട്ടി. മറുഭാഗത്ത് സര്‍ക്കാറിന്റെ വിശ്വാസ്യത ചോദ്യം ചെയ്യപ്പെടുകയും ചെയ്തു.


ദീര്‍ഘകാലം പൊലീസിലുണ്ടായിരുന്ന, അതിന്റെ മേധാവി സ്ഥാനം അലങ്കരിച്ച, കേസന്വേഷണത്തില്‍ കീഴുദ്യോഗസ്ഥരുടെ വീഴ്ച തുറന്നുപറയാന്‍ മടിക്കാത്ത, സമരവേദികളിലെ തീവ്രവാദ സാന്നിധ്യത്തെക്കുറിച്ച് ബോധ്യമുള്ള, പ്രധാനമന്ത്രിയെ അപായപ്പെടുത്താനെത്തിയ ഭീകരവാദ മൊഡ്യൂളിനെ തടയാന്‍ പാകത്തില്‍ സുരക്ഷയൊരുക്കിയ നായകന്‍. താനാണ് ശരിയെന്ന പ്രതീതി സൃഷ്ടിക്കപ്പെട്ടിരിക്കെ, പറയുന്ന കാര്യങ്ങള്‍ക്ക് വിശ്വാസ്യത ഏറുമെന്ന ഉറപ്പുണ്ട് അദ്ദേഹത്തിന്. ദേശീയതയെ കേന്ദ്രബിന്ദുവാക്കി തീവ്ര ഹിന്ദുത്വ വികാരമുണര്‍ത്തുമ്പോള്‍ വസ്തുതകള്‍ അപ്രസക്തമാകുന്ന കാഴ്ച രാജ്യം കണ്ടുകൊണ്ടിരിക്കെ പ്രത്യേകിച്ചും.


''മതതീവ്രവാദത്തെക്കുറിച്ച് പറയുമ്പോള്‍ മുസ്‌ലിം സമുദായം ചോദിക്കും ആര്‍ എസ് എസ് ഇല്ലേ എന്ന്. ഈ താരതമ്യമാണ് പ്രശ്‌നം. ആര്‍ എസ് എസ്സും ഐ എസ്സും തമ്മില്‍ താരതമ്യമില്ല. നാഷനല്‍ സ്പിരിറ്റിന് എതിരായിട്ടു പോകുന്ന മതതീവ്രവാദത്തെയാണ് ഞാന്‍ ഉദ്ദേശിക്കുന്നത്''  - സെന്‍കുമാറിന്റേതായി വന്ന അഭിപ്രായപ്രകടനങ്ങളിലൊന്ന് ഇതാണ്. ഐ എസ്, അല്‍ഖാഇദ എന്നു തുടങ്ങി പരദശം പേരുകളില്‍ അറിയപ്പെടുന്ന മതതീവ്രവാദ (ഭീകരവാദ) പ്രസ്ഥാനങ്ങള്‍ക്കെല്ലാം മുമ്പേയുണ്ട് രാഷ്ട്രീയ സ്വയം സേവക് സംഘ് (ആര്‍ എസ് എസ്). ഹിറ്റ്‌ലറുടെ ജര്‍മനിയില്‍ പോയി, നാസി പാര്‍ട്ടിയുടെ കാര്യങ്ങള്‍ നേരിട്ട് പഠിച്ച് സാംസ്‌കാരിക ദേശീയതയെ അടിസ്ഥാന ആശയമാക്കി പ്രവര്‍ത്തന പദ്ധതിയുണ്ടാക്കിയ സംഘടന. അന്നു മുതല്‍ മതതീവ്രവാദമായിരുന്നു പ്രചരിപ്പിച്ചിരുന്നത്. ഹിന്ദുരാഷ്ട്രവും അതിന്‍മേല്‍ സവര്‍ണര്‍ക്കുള്ള അധികാര സ്ഥാപനവുമായിരുന്നു ലക്ഷ്യം. വെറുപ്പും വിദ്വേഷവും വളര്‍ത്താനുള്ള ഒരവസരവും പാഴാക്കിയിട്ടില്ല ഇക്കാലം വരെ. രാഷ്ട്രപിതാവിന്റെ ഹത്യ മുതല്‍ പശുമാംസത്തിന്റെ പേരില്‍ ഇപ്പോള്‍ നടക്കുന്ന കൊലകളില്‍ വരെ ആരോപണവിധേയരായി നില്‍ക്കുന്നു. ഇതൊക്കെ 'നാഷനല്‍ സ്പിരിറ്റി'ന് യോജിച്ചതാണോ എന്ന് ആലോചിക്കാനുള്ള ബുദ്ധിയുണ്ടാകാതിരിക്കുമോ സംസ്ഥാന പൊലീസ് മേധാവിയായി വിരമിച്ച ഐ പി എസ്സുകാരന്? ബുദ്ധിയില്ലാത്തതല്ല, അടിസ്ഥാനം വര്‍ഗീയമായതാണ് പ്രശ്‌നം. ഇത്രയുംകാലം അതൊളിച്ചുവെക്കേണ്ടതുണ്ടായിരുന്നുവെന്ന് മാത്രം.


''പശുവിന് വേണ്ടി മനുഷ്യരെക്കൊല്ലുകയാണെന്ന റമസാന്‍ പ്രസംഗത്തിന്റെ ക്ലിപ്പിംഗ് കണ്ടു. അതിന്റെ പ്രത്യാഘാതം വലുതായിരിക്കും. ഇത്തരക്കാര്‍ക്കെതിരെ നടപടിയെടുക്കുകയും....'' - സെന്‍കുമാര്‍ തുടരുന്നു. പശുവിറച്ചി സൂക്ഷിച്ചെന്ന് ആരോപിച്ച്, കന്നുകാലികളെ കടത്താന്‍ ശ്രമിച്ചെന്ന് ആരോപിച്ച്, പശുവിറച്ചി കഴിക്കുന്നവരെന്ന് ആരോപിച്ച് ഒക്കെ രാജ്യത്ത് ആളുകളെ കൊല്ലുമ്പോള്‍ അങ്ങനെ സംഭവിക്കുന്നുണ്ട് എന്ന് പറയുന്നതും അത് ശരിയല്ല എന്ന് പറയുന്നതും തെറ്റാണെന്ന് കരുതുന്നയാള്‍ ഇത്രനാള്‍ നിയമപാലകനായിരുന്നു! നിയമപാലകരുടെ മേധാവിയായിരുന്നു!


ലൗ ജിഹാദ് നടക്കുന്നുവെന്ന ആരോപണമുയര്‍ന്നത് കേരളത്തില്‍ മാത്രമയിരുന്നില്ല. കര്‍ണാടകത്തില്‍, മഹാരാഷ്ട്രയില്‍, ഉത്തര്‍ പ്രദേശില്‍ ഒക്കെയുണ്ടായിരുന്നു. ഈ ആരോപണത്തില്‍ കഴമ്പുണ്ടെന്ന് ഏതെങ്കിലും ഒരിടത്ത് തെളിയിക്കപ്പെട്ടതായി ഇതുവരെ റിപ്പോര്‍ട്ടുകളില്ല. കേരളത്തിലെ എല്ലാ ജില്ലകളിലെയും പോലീസ് മേധാവിമാരോട് ഇക്കാര്യത്തില്‍ റിപ്പോര്‍ട്ട് തേടിയിരുന്നു കേരള ഹൈക്കോടതി. ലൗ ജിഹാദെന്ന ആരോപണം അടിസ്ഥാനമില്ലാത്തതാണെന്നാണ് എല്ലാവരും നല്‍കിയ റിപ്പോര്‍ട്ട്. അന്ന് കേരളത്തിലെ പൊലീസ് സേനയില്‍ ചെറുതല്ലാത്ത പദവിയിലുണ്ടായിരുന്നു ടി പി സെന്‍കുമാര്‍. തെളിവുള്ള ഏതെങ്കിലുമൊരു കേസ് ചൂണ്ടിക്കാട്ടാന്‍ ശ്രമിക്കാമായിരുന്നു. 2015 മെയ് മുതല്‍ 2016 മെയ് വരെ ക്രമസമാധാന പാലനത്തിന്റെയും കുറ്റാന്വേഷണത്തിന്റെയും ചുമതലയുള്ള പൊലീസ് മേധാവിയായിരുന്നുവല്ലോ? ലൗ ജിഹാദിന്റെ ഒരു കേസെങ്കിലും തെളിയിച്ചെടുക്കാമായിരുന്നുവല്ലോ? (നടിയുടെ കേസില്‍ സ്വന്തം സഹപ്രവര്‍ത്തകരുടെ വിശ്വാസ്യത തകര്‍ക്കാന്‍ ഉപയോഗിച്ച ന്യായം, കോടതിയില്‍ തെളിയിക്കാന്‍ പാകത്തിലുള്ള തെളിവുകളൊന്നും കിട്ടിയില്ലെന്ന് വേണമെങ്കില്‍ പറയാം)


1971ല്‍ തലശ്ശേരിയിലുണ്ടായ വര്‍ഗീയ സംഘര്‍ഷത്തെക്കുറിച്ച് അന്വേഷിച്ച ജസ്റ്റിസ് വിതയത്തില്‍ കമ്മീഷന്‍ അന്നത്തെ പൊലീസിന്റെ നടപടികളെ വിലയിരുത്തുന്നുണ്ട്. ''അക്രമികള്‍ അഴിഞ്ഞാടിയപ്പോള്‍ പൊലീസ് കാഴ്ചക്കാരായി നിന്നു. പൊലീസ് സേനാംഗങ്ങളില്‍ വര്‍ഗീയതയുടെ അണുബാധയുണ്ട്'' എന്നാണ് അന്ന് കമ്മീഷന്‍ പറഞ്ഞുവെച്ചത്. വര്‍ഗീയതയുടെ അണുബാധയില്‍ നിന്ന് പൊലീസിനെ മുക്തമാക്കണമെന്നും കമ്മീഷന്‍ നിര്‍ദേശിച്ചു. ഈ നിര്‍ദേശമുള്ള ഒരു ഡസന്‍ ജുഡീഷ്യല്‍ അന്വേഷണ റിപ്പോര്‍ട്ടുകളെങ്കിലും രാജ്യത്തുണ്ട്. ആ അന്വേഷണങ്ങള്‍ക്ക് ആധാരമായ വര്‍ഗീയ കലാപങ്ങളില്‍ ആര്‍ എസ് എസ്സിന്റെ പങ്ക് കമ്മീഷനുകള്‍ കണ്ടെത്തുന്നുമുണ്ട്. സെന്‍കുമാറിന് വേണമെങ്കില്‍ പരിശോധിച്ച് ബോധ്യപ്പെടാം. ഇത്രയും അന്വേഷണങ്ങള്‍ക്കും റിപ്പോര്‍ട്ടുകള്‍ക്കും ശേഷവും പൊലീസ് സേനയില്‍ വര്‍ഗീയതയുടെ അണുബാധ നിലനില്‍ക്കുകയും വര്‍ധിക്കുകയും ചെയ്തിട്ടുണ്ടെങ്കില്‍ അതില്‍ സെന്‍കുമാറിനെപ്പോലുള്ള മേലുദ്യോഗസ്ഥര്‍ക്കുള്ള പങ്ക് ചെറുതാകാന്‍ ഇടയില്ല.

2017-07-03

ജി എസ് ടിയില്‍ അപകടമുണ്ട്, കെട്ടകാലത്ത് പ്രത്യേകിച്ചും


ചരക്ക് സേവന നികുതി (ഗുഡ്‌സ് ആന്‍ഡ് സര്‍വീസ് ടാക്‌സ് - ജി എസ് ടി) പ്രാബല്യത്തിലായിരിക്കുന്നു. വേണ്ട തയ്യാറെടുപ്പുകളൊന്നും കൂടാതെ. പുതിയ രീതിയനുസരിച്ച് വാണിജ്യ ഇടപാടുകള്‍ നടത്തണമെങ്കില്‍ ജി എസ് ടി നെറ്റ്‌വര്‍ക്ക് എന്ന രാജ്യമാകെ ബന്ധിപ്പിക്കുന്ന ശൃംഖലയില്‍ രജിസ്റ്റര്‍ ചെയ്ത് നമ്പറെടുക്കണം. രാജ്യത്തെ മുപ്പത് ശതമാനത്തോളം വ്യാപാര- വാണിജ്യ- സേവന ദാതാക്കള്‍ക്കും ഈ നമ്പര്‍ കിട്ടിയിട്ടില്ല. ഇതില്ലാതെ എങ്ങനെ ഇടപാടുകള്‍ നടത്തുമെന്ന തിട്ടം ഈ സ്ഥാപനങ്ങള്‍ക്കില്ല. രജിസ്‌ട്രേഷന്‍ നടപടികള്‍ എത്ര  നാള്‍ കൊണ്ട് പൂര്‍ത്തിയാകുമെന്നും അറിയില്ല. പുതിയ നികുതി സമ്പ്രദായം നടപ്പാകുമ്പോള്‍ സര്‍ക്കാര്‍ നടപടികള്‍ ഏത് വിധത്തിലാകണമെന്നതിലും വ്യക്തതയില്ല.

നികുതിയാകെ ഓണ്‍ലൈന്‍ സമ്പ്രദായത്തിലേക്ക് മാറുന്നതോടെ എക്‌സൈസ്, വില്‍പ്പന നികുതി വിഭാഗങ്ങളില്‍ സേവനമനുഷ്ഠിക്കുന്നവരുടെ ജോലിയെന്താണ് എന്നതിലും പൂര്‍ണ തീര്‍പ്പായിട്ടില്ല. പൊതു വില്‍പ്പന നികുതി സമ്പ്രദായത്തില്‍ നിന്ന് മൂല്യ വര്‍ധിത സമ്പ്രദായത്തിലേക്ക് രാജ്യം മാറിയത് രണ്ട് ദശകം മുമ്പാണ്. അന്നും ഇതുപോലുള്ള ആശയക്കുഴപ്പമുണ്ടായിരുന്നുവെന്നും സമയമെടുത്താണ് കാര്യങ്ങള്‍ വ്യവസ്ഥാപിതമായതെന്നുമാണ് ജി എസ് ടിയെ നേരത്തെ മുതല്‍ സ്വാഗതം ചെയ്യുകയും അതു നടപ്പാക്കുന്നത് കേരളത്തിന്റെ സമ്പദ് വ്യവസ്ഥക്ക് ഗുണം ചെയ്യുമെന്നും അവകാശപ്പെടുന്ന ധനമന്ത്രി തോമസ് ഐസക്ക് പറയുന്നത്. സമയമെടുത്താലും കാര്യങ്ങള്‍ വ്യവസ്ഥാപിതമാകുമെന്ന് പ്രതീക്ഷിക്കുക.


തയ്യാറെടുപ്പുകള്‍ പൂര്‍ണമായിട്ടില്ല, അതിനാല്‍ ജി എസ് ടി നടപ്പാക്കുന്നത് മാറ്റിവെക്കണമെന്ന് വിവിധ കോണുകളില്‍ നിന്ന് ആവശ്യമുയര്‍ന്നിരുന്നു. കേന്ദ്ര വ്യോമയാന മന്ത്രാലയം ഔദ്യോഗികമായി തന്നെ ഈ ആവശ്യം ഉന്നയിച്ചു. എന്നിട്ടും ജൂലൈ ഒന്നിന് തന്നെ ഇത് പ്രാബല്യത്തിലാക്കണമെന്ന നിര്‍ബന്ധം കേന്ദ്ര സര്‍ക്കാര്‍ കാണിച്ചു. മുമ്പ് പലകുറി തീയതി നിശ്ചയിക്കുകയും മാറ്റിവെക്കുകയും ചെയ്തതാണ്. പുതിയ സമ്പ്രദായത്തിലേക്ക് മാറുന്നതില്‍ കേന്ദ്രവും സംസ്ഥാനങ്ങളും തമ്മില്‍ തര്‍ക്കം തുടരുന്നതു കൊണ്ടാണ് അന്നൊക്കെ മാറ്റിവെക്കോണ്ടി വന്നത്. ആ തര്‍ക്കമൊക്കെ പരിഹരിച്ചു, ഉത്പന്നങ്ങളുടെയും സേവനങ്ങളുടെയും നികുതി നിരക്കുകളും നിശ്ചയിച്ചു. അതുകൊണ്ട് നടപടി ക്രമങ്ങളൊക്കെ പൂര്‍ത്തിയാക്കി പുതിയ നികുതി സമ്പ്രദായം പ്രാബല്യത്തിലാക്കുന്നിതിന് പ്രയാസമുണ്ടായിരുന്നില്ല. അതിനായി കാത്തുനില്‍ക്കാന്‍ കേന്ദ്രം തയ്യാറായിരുന്നില്ല.


നിലവിലെ സമ്പ്രദായം അനുസരിച്ച് നികുതിക്കു മേല്‍ നികുതി നല്‍കുകയാണ് ജനങ്ങളെന്നും ആ ബാധ്യതയില്‍ നിന്ന് അവരെ എത്രയും വേഗം മോചിപ്പിക്കണമെന്നുമുള്ള സദുദ്ദേശ്യം വേണമെങ്കില്‍ ഇവിടെ കാണാം. അതോ തീരുമാനമെടുത്താല്‍ എന്തൊക്കെ ബുദ്ധിമുട്ടുണ്ടായാലും കൃത്യസമയത്ത് നടപ്പാക്കാനുള്ള ഇച്ഛാശക്തി തങ്ങള്‍ക്കുണ്ടെന്ന് കാണിച്ചുകൊടുക്കാനുള്ള ശ്രമമോ? നരേന്ദ്ര മോദി സര്‍ക്കാറിന്റെ മൂന്ന് വര്‍ഷത്തെ പ്രവര്‍ത്തനം വിലയിരുത്തിയാല്‍ കരുത്ത് പ്രകടിപ്പിക്കാനുള്ള അവസരമായി ജി എസ് ടി നടപ്പാക്കലിനെ മാറ്റിയെന്ന് കരുതണം. വന്‍കിട കമ്പനികള്‍ക്കും സ്ഥാപനങ്ങള്‍ക്കും കൂടുതല്‍ അവസരമൊരുക്കുക എന്ന ഉദ്ദേശ്യം കൂടി ഈ തിടുക്കത്തിന് കാരണമാണ്.


2016 നവംബര്‍ എട്ടിന് അഞ്ഞൂറിന്റെയും ആയിരത്തിന്റെയും നോട്ടുകള്‍ പിന്‍വലിച്ചതിലൂടെ കേന്ദ്ര സര്‍ക്കാര്‍ വലിയ പ്രഹരം ഏല്‍പ്പിച്ചത്  രാജ്യത്തെ ചെറുകിട ഇടത്തരം വ്യാപാര - വ്യവസായ - നിര്‍മാണ സ്ഥാപനങ്ങള്‍ക്കു മേലായിരുന്നു. ഉത്പന്നങ്ങള്‍ക്ക് വിപണി കണ്ടെത്താന്‍ സാധിക്കാതെ ഉത്പാദനം നിര്‍ത്തിവെക്കാന്‍ സ്ഥാപനങ്ങള്‍ നിര്‍ബന്ധിതമായി. ക്രയവിക്രയം കുറഞ്ഞത് വ്യാപാര സ്ഥാപനങ്ങളെയും പ്രതിസന്ധിയിലാക്കി. പിന്‍വലിച്ചതിന് പകരം ഏര്‍പ്പെടുത്തിയ അഞ്ഞൂറിന്റെയും രണ്ടായിരത്തിന്റെയും നോട്ടുകള്‍ പിന്‍വലിച്ച മൂല്യത്തിന് തുല്യമായി ഇതുവരെ വിപണിയില്‍ എത്തിയിട്ടില്ല. ക്രയവിക്രയം പഴയ നിലയിലേക്ക് എത്തിക്കൊണ്ടിരിക്കുന്നതേയുള്ളൂ.


ആ സമയത്ത് ജി എസ് ടി പ്രാബല്യത്തില്‍ വരുത്തി, വിപണിയെ വീണ്ടും സ്തംഭനാവസ്ഥയിലേക്ക് എത്തിക്കുമ്പോള്‍ ചെറുകിട ഇടത്തരം സ്ഥാപനങ്ങള്‍ വീണ്ടും പ്രതിസന്ധിയിലാകും. തുടര്‍ച്ചയായുണ്ടാകുന്ന വിപണി മാന്ദ്യത്തെ അതിജീവിച്ച് പിടിച്ചുനില്‍ക്കാന്‍ എത്ര പേര്‍ക്ക് സാധിക്കുമെന്നത് കണ്ടറിയണം. ഈ അവസ്ഥയുടെ ഗുണമുണ്ടാകുക, ഇതിനകം ജി എസ് ടി രജിസ്‌ട്രേഷന്‍ പൂര്‍ത്തിയാക്കി തടസ്സം കൂടാതെ ക്രയവിക്രയം മുന്നോട്ടുകൊണ്ടുപോകാന്‍ സാധിക്കുന്ന വന്‍കിട സ്ഥാപനങ്ങള്‍ക്കാണ്. പ്രത്യേകിച്ച് ഏതാണ്ടെല്ലാ സാമഗ്രികളുടെയും ചില്ലറ വില്‍പ്പനയിലേക്ക് തിരിഞ്ഞിരിക്കുന്ന റിലയന്‍സ് മുതല്‍ ടാറ്റ വരെയുള്ളവക്കും ബഹു ബ്രാന്‍ഡുകളുടെ ചില്ലറ വില്‍പ്പനയില്‍ 51 ശതമാനം നേരിട്ടുള്ള വിദേശ നിക്ഷേപം അനുവദിച്ചതിന്റെ (യു പി എ സര്‍ക്കാറിന്റെ കാലത്ത് നല്‍കിയ അനുമതിയെ അന്ന് ബി ജെ പി എതിര്‍ത്തിരുന്നു. നരേന്ദ്ര മോദി സര്‍ക്കാര്‍ ഈ അനുമതി തുടരാനാണ് തീരുമാനിച്ചത്) ആനൂകുല്യത്തില്‍ ഇന്ത്യയിലേക്ക് പ്രവേശിച്ച ബഹു രാഷ്ട്ര കമ്പനികള്‍ക്കുമാണ്.


ഇത്തരം കമ്പനികള്‍ക്ക് മുന്നില്‍ ജി എസ് ടി തുറന്നിടുന്ന അവസരം ഇത് മാത്രമല്ല. ഉത്പന്നങ്ങള്‍ കര്‍ഷകരില്‍ നിന്ന് വാങ്ങി സംഭരിച്ച് ഒരു കേന്ദ്രത്തില്‍ നിന്ന് വിപണന ശൃംഖലകളിലേക്ക് എത്തിക്കാന്‍ കൂടുതല്‍ സൗകര്യം ഈ കമ്പനികള്‍ക്ക് പുതിയ സമ്പ്രദായം തുറന്നിടും.  മുമ്പ് ഓരോ സംസ്ഥാനത്തെയും നികുതിക്കനുസരിച്ച് വില രേഖപ്പെടുത്തി പ്രത്യേകം പ്രത്യേകം പാക്കറ്റുകളിലാക്കി വിപണനത്തിന് എത്തിക്കേണ്ടതുണ്ടായിരുന്നുവെങ്കില്‍ അത് ഒഴിവാകുകയാണ്. കാര്‍ഷിക ഉത്പന്നങ്ങള്‍ക്ക് കേന്ദ്ര- സംസ്ഥാന സര്‍ക്കാറുകള്‍ പ്രഖ്യാപിക്കുന്ന താങ്ങുവില അടിസ്ഥാനത്തിലുള്ള സംഭരണം എക്കാലത്തും പാളുന്നതാകയാല്‍ കര്‍ഷകരില്‍ നിന്ന് കുറഞ്ഞ വിലക്ക് ഉത്പന്നങ്ങള്‍ വാങ്ങിയെടുക്കാന്‍ ഈ കമ്പനികള്‍ക്ക് സാധിക്കും. ചില്ലറ വില്‍പ്പന ശാലകളിലേക്കുള്ള വിതരണം മൊത്തത്തില്‍ നടത്തുകയുമാകാം.


അസംഘടിത മേഖലയിലെ ചില്ലറ വില്‍പ്പന ശാലകളിലേക്ക് ഉത്പന്നങ്ങളെത്തുക പല കൈമറിഞ്ഞാണ്. ഓരോ കൈമറിയലിലും വില വര്‍ധിക്കുകയും ചെയ്യും. ഇതൊഴിവാകുന്നുവെന്നത് കൊണ്ട് ഉത്പന്നങ്ങള്‍ വിലകുറച്ച് വില്‍ക്കാന്‍ കുത്തക കമ്പനികള്‍ക്ക് സാധിക്കും. അവരതിന് മെനക്കെടുക കൂടി ചെയ്താല്‍ വിപണിയൊന്നാകെ അവരുടെ കൈകളില്‍ എത്തുന്നകാലം അകലെയല്ല. ഭാവിയില്‍ ഉത്പന്ന വില നിര്‍ണയിക്കാനുള്ള അധികാരം പൂര്‍ണമായി ഈ കമ്പനികളുടെ കൈകളിലേക്ക് നല്‍കുക കൂടിയാണ് ജി എസ് ടിയിലൂടെ കേന്ദ്രം ചെയ്യുന്നത്. സംസ്ഥാനങ്ങള്‍ക്ക് ഒരിടപെടലും സാധ്യമാകുകയുമില്ല.  പല നികുതികള്‍ ഒഴിവാകുകയും നികുതിക്ക് മേലുള്ള നികുതി ഇല്ലാതാകുകയും ചെയ്യുന്നതിലൂടെ ഉത്പന്ന വില കുറയുമെന്ന് ജനം വിശ്വസിക്കുമ്പോള്‍, വില നിശ്ചയിക്കാനുള്ള അധികാരം കുത്തകകള്‍ക്ക് തീറെഴുന്നത് ഭാവിയില്‍ ഉണ്ടാക്കാനിടയുള്ള അപകടത്തെക്കുറിച്ച് ആരും തത്കാലം ചിന്തിക്കില്ല. അതുകൊണ്ടാണ് പുതിയ സമ്പ്രദായം കേരളത്തിന് വരുമാനം കൂട്ടാനിടയുണ്ടെന്ന് ഇടതുനയത്തില്‍ വ്യതിചലനമില്ലാത്ത തോമസ് ഐസക്ക് ആവര്‍ത്തിക്കുന്നത്.


നികുതിക്കുമേല്‍ നികുതിയില്‍ നിന്ന് ജനത്തെ സംരക്ഷിക്കാന്‍ കച്ചകെട്ടിയ കേന്ദ്ര സര്‍ക്കാര്‍ പെട്രോളിയം ഉത്പന്നങ്ങളെ ജി എസ് ടിയില്‍ നിന്ന് നീക്കി നിര്‍ത്തി. പെട്രോള്‍ ലിറ്ററൊന്നിന് 20 രൂപയിലധികം എക്‌സൈസ് നികുതിയായി കേന്ദ്രം പിരിക്കുന്നു. ഇതുകൂടി ചേര്‍ത്തുള്ള വിലയിന്‍മേല്‍ സംസ്ഥാനങ്ങള്‍ വില്‍പ്പന നികുതി ചുമത്തുമ്പോള്‍ 14 രൂപയോളം ലിറ്ററിന് വീണ്ടും കൂടും. അന്താരാഷ്ട്ര വിപണിയില്‍ എണ്ണ വില കുറഞ്ഞപ്പോള്‍ അതിന്റെ ആനുകൂല്യം ജനങ്ങള്‍ക്ക് നല്‍കാതെ എക്‌സൈസ് നികുതി പലതവണ കൂട്ടിയിരുന്നു നരേന്ദ്ര മോദി സര്‍ക്കാര്‍.  അതുകൊണ്ടാണ് പെട്രോളിന്റെയും ഡീസലിന്റെയും നികുതികള്‍ ഇത്രയും ഉയര്‍ന്നത്. ഇന്ധന വില കൂടുന്നത് അനുസരിച്ച് ട്രാന്‍സ്‌പോട്ടേഷന്‍ ചെലവ് കൂടും അതിനനുസരിച്ച് ഉത്പന്നവിലയും കൂടും. ഉത്പന്നവില കുറയണമെന്ന ആഗ്രഹമാണ് ഏകീകൃതനികുതിയിലേക്ക് മാറുന്നതിന് യഥാര്‍ത്ഥ കാരണമെങ്കില്‍ ഈ പട്ടികയില്‍ ആദ്യം ഉള്‍പ്പെടുത്തേണ്ടത് പെട്രോളിയം ഉത്പന്നങ്ങളെയായിരുന്നു. അതിന് തയ്യാറാകാതിരിക്കുകയും ഉത്പന്നങ്ങളുടെ വിലയിന്‍മേല്‍ സര്‍ക്കാറിന് യാതൊരു നിയന്ത്രണവുമില്ലാതിരിക്കുകയും ചെയ്യുമ്പോള്‍ കൊള്ളലാഭത്തിന് അവസരമുറപ്പാക്കുകയാണ് സര്‍ക്കാര്‍ ചെയ്യുന്നത്.


ഈ ലാഭമുറപ്പാക്കലില്‍ വിപണിയുടെ അധികാരം കമ്പനികളില്‍ കേന്ദ്രീകരിക്കുമ്പോള്‍ സാമ്പത്തിക അധികാരം പൂര്‍ണമായും കേന്ദ്ര സര്‍ക്കാറില്‍ നിക്ഷിപ്തമാകുകയാണ്. സംസ്ഥാനങ്ങള്‍ക്ക് തനത് വരുമാന സ്രോതസ്സുകള്‍ ഇനി തീര്‍ത്തും പരിമിതമാണ്. അതായത് കേന്ദ്രത്തില്‍ നിന്നുള്ള ജി എസ് ടി വിഹിതത്തെ ആശ്രയിച്ച് മാത്രം പദ്ധതികള്‍ ആസൂത്രണം ചെയ്യേണ്ട അവസ്ഥയിലേക്ക് സംസ്ഥാനങ്ങളുടെ അധികാരം ചുരുങ്ങും. കേരളത്തിലെ കോഴിക്കച്ചവടക്കാരെ സംരക്ഷിക്കുന്നതിനാണ് ഇതര സംസ്ഥാനങ്ങളില്‍ നിന്ന് കൊണ്ടുവരുന്ന കോഴികള്‍ക്ക് കേരളം പ്രവേശന നികുതി ഏര്‍പ്പെടുത്തിയത്. ഇത്തരത്തില്‍ നികുതി ഏര്‍പ്പെടുത്താന്‍ സംസ്ഥാനങ്ങള്‍ക്ക് അധികാരമുണ്ടെന്ന് പിന്നീട് സുപ്രീം കോടതി വിധിക്കുകയും ചെയ്തു. ഇനി മേല്‍, ഓരോ സംസ്ഥാനത്തിന്റെയും പ്രത്യേക സാഹചര്യങ്ങള്‍ പരിഗണിച്ച് ഇത്തരം സംരക്ഷണങ്ങള്‍ ഏര്‍പ്പെടുത്താന്‍ ആര്‍ക്കും സാധിക്കാതെ വരും.


ഇന്ത്യന്‍ യൂണിയന്‍ കോണ്‍ഗ്രസ് നേതൃത്വത്തിലുള്ള സര്‍ക്കാറുകള്‍ ഭരിച്ചിരുന്ന കാലത്ത് കേന്ദ്ര അവഗണനക്കെതിരായ സമരങ്ങള്‍ ഇവിടെ സജീവമായിരുന്നു. കോണ്‍ഗ്രസ് സര്‍ക്കാറുകള്‍ പുലര്‍ത്തിയിരുന്ന ജനാധിപത്യ മര്യാദ പ്രതീക്ഷിക്കാന്‍ സാധിക്കാത്ത സര്‍ക്കാറാണ് നരേന്ദ്ര മോദിയുടെ നേതൃത്വത്തിലുള്ളത് എന്നതിന് ഡല്‍ഹിയിലെ ആം ആദ്മി സര്‍ക്കാറിനോട് അവര്‍ സ്വീകരിക്കുന്ന നിലപാട് തന്നെ ഉദാഹരണം.  അത്തരം നിലപാടുകള്‍ കേരളം പോലെ ബി ജെ പിക്ക് ഇനിയും ചുവടുറപ്പിക്കാന്‍ ഇടം കിട്ടാത്ത സംസ്ഥാനങ്ങളോട് സ്വീകരിക്കാനുള്ള സാധ്യത ഏറെയാണ്. അതിന് സാമ്പത്തിക അധികാരത്തെ ഉപയോഗപ്പെടുത്താനുള്ള സാധ്യത ഏറെയുമാണ്.


സ്റ്റേറ്റ് ബേങ്കുകളെ ലയിപ്പിച്ചതിന് പിറകെ മറ്റ് ചില ബേങ്കുകളെ കൂടി ലയിപ്പിക്കാന്‍ കേന്ദ്രം ശ്രമം തുടങ്ങിയിട്ടുണ്ട്. ഈ പ്രക്രിയ എളുപ്പത്തിലാക്കുന്നതിന് പുതിയ കോര്‍പ്പറേഷന്‍ രൂപവത്കരിക്കുന്നതിനുള്ള ബില്ലിന് കേന്ദ്ര മന്ത്രിസഭ അംഗീകാരം നല്‍കിയിട്ടുമുണ്ട്. അധികാരത്തിന്റെയും സമ്പത്തിന്റെയും കേന്ദ്രീകരണം കൂടുതല്‍ ശക്തമാക്കുകയാണ് സര്‍ക്കാറിന്റെ ലക്ഷ്യം. അത്തരമൊരു സാഹചര്യത്തില്‍ ജി എസ് ടിയിലൂടെ സംസ്ഥാനങ്ങളുടെ സാമ്പത്തിക സ്വാതന്ത്ര്യം ഇല്ലാതാക്കപ്പെടുന്നതിന് വലിയ പ്രാധാന്യമുണ്ട്. വര്‍ഗീയ ഫാസിസത്തിന്റെ അടിത്തറയുള്ള ഏകാധിപത്യ പ്രവണതക്ക്  ആക്കം കൂട്ടുകയാണ് ഏകീകൃത നികുതി സമ്പ്രദായം. വിലകുറയുമെന്ന പ്രചാരണങ്ങള്‍ അതിന് തത്ക്കാലം മറയിടുന്നുവെന്ന് മാത്രം.

2017-06-29

ട്രംപിന് മോദി കൂട്ട്


ആഘോഷമായ കൂടിക്കാഴ്ച. വെള്ളക്കൊട്ടാരത്തില്‍ വിഭവ സമൃദ്ധമായ വിരുന്ന്. എന്റെ പുറം നീ ചൊറിഞ്ഞാല്‍ നിന്റെ പുറം ഞാന്‍ ചൊറിയാമെന്ന ചൊല്ലിനെ നാണിപ്പിക്കും വിധത്തിലുള്ള പുകഴ്ത്തലുകള്‍. യുണൈറ്റഡ് സ്റ്റേറ്റ്‌സ് ഓഫ് അമേരിക്കയുടെ പ്രസിഡന്റ് ഡൊണാള്‍ഡ് ട്രംപും ഇന്ത്യയുടെ പ്രധാനമന്ത്രി നരേന്ദ്ര മോദിയും നിറഞ്ഞു നില്‍ക്കുകയാണ് ആഗോള മാധ്യമങ്ങളില്‍. പ്രസിഡന്റായി ട്രംപ് ചുമതലയേറ്റ ശേഷം വൈറ്റ് ഹൗസിലെ തീന്‍മേശയിലേക്ക് ആനയിക്കപ്പെട്ട ആദ്യത്തെ രാഷ്ട്ര നേതാവ് എന്നത് ചില്ലറ ഖ്യാതിയല്ല. അതില്‍ പുളകം കൊണ്ട് നില്‍ക്കുന്നു ഇന്ത്യന്‍ യൂണിയനും അതിലെ 130 കോടിയിലേറെ വരുന്ന ജനങ്ങളും. ആ പുളകം രാജ്യാതിര്‍ത്തി കടന്ന് ഒഴുകുന്നതിന്റെ ലക്ഷണങ്ങളുമുണ്ട്. ലോകത്തെ പ്രമുഖരായ രാഷ്ട്രത്തലവന്‍മാരില്‍ മുന്‍നിരയിലാണ് നരേന്ദ്ര മോദിയുടെ സ്ഥാനമെന്ന് ഇസ്‌റാഈല്‍ വിശേഷിപ്പിച്ചു കഴിഞ്ഞു.


ആ വിരുന്നിന്റെ സമയത്തിനുമുണ്ടായിരുന്നു പ്രത്യേകത. 1805ല്‍ ഐക്യനാടുകളുടെ പ്രസിഡന്റായിരുന്ന തോമസ് ജെഫേഴ്‌സണാണ് വൈറ്റ് ഹൗസില്‍ ആദ്യമായൊരു ഇഫ്താര്‍ നടത്തിയത്. ഉച്ചക്ക് ശേഷം നടത്തിയിരുന്ന വിരുന്ന് ഇഫ്താറാക്കി മാറ്റാന്‍ തോമസ് ജെഫേഴ്‌സണ്‍ തീരുമാനിച്ചത് റമസാന്‍ വ്രതം അനുഷ്ഠിക്കുന്ന തുണീസ്യയുടെ പ്രതിനിധി സിദി സുലൈമാന്‍ മെല്ലിമെല്ലിയുടെ സൗകര്യം കൂടി പരിഗണിച്ചാണ്. 1996ല്‍ ബില്‍ ക്ലിന്റണ്‍ പ്രസിഡന്റായിരിക്കെ വൈറ്റ് ഹൗസിലെ ആദ്യത്തെ പെരുന്നാള്‍ സല്‍ക്കാരം നടന്നു. പിന്നീടിങ്ങോട്ടുള്ള 20 വര്‍ഷവും ഇഫ്താറോ പെരുന്നാള്‍ സല്‍ക്കാരമോ മുടങ്ങാതെ നടന്നിരുന്നു വൈറ്റ് ഹൗസില്‍. ജോര്‍ജ് ബുഷ് പ്രസിഡന്റായിരുന്ന എട്ട് വര്‍ഷവും ഇത് മുടങ്ങിയില്ല. 2001ല്‍ വേള്‍ഡ് ട്രേഡ് സെന്ററിനു നേര്‍ക്കുണ്ടായ ആക്രമണത്തിന് ശേഷം മുസ്‌ലിം വിരുദ്ധത അതിന്റെ ഉച്ചസ്ഥായിയില്‍ നില്‍ക്കുമ്പോഴും ഈ പതിവ് മുടങ്ങിയില്ല. 20 വര്‍ഷമായി തുടരുന്ന ആ പതിവ് ഡൊണാള്‍ഡ് ട്രംപ് അവസാനിപ്പിച്ച് ദിവസങ്ങള്‍ക്കകമാണ് മോദിക്ക് വൈറ്റ് ഹൗസിലേക്ക് ചുവന്ന പരവതാനി വിരിച്ചത്.


മുസ്‌ലിംകളെല്ലാം ഭീകരരല്ല പക്ഷേ, ഭീകരരെല്ലാം മുസ്‌ലിംകളാണ് എന്ന് സിദ്ധാന്തിച്ച, പട്ടിക്കുഞ്ഞ് കാറിനടിയില്‍പ്പെട്ടാല്‍ യാത്രക്കാരന്‍ എങ്ങനെ ഉത്തരവാദിയാകുമെന്ന് ഗുജറാത്ത് വംശഹത്യാ ശ്രമത്തില്‍ നിന്ന് കൈകഴുകിയ നേതാവിനെ ആദ്യത്തെ വിരുന്നിന് തിരഞ്ഞെടുക്കുമ്പോള്‍ അതിലൊരു ഏകാശയ സാഹോദര്യമുണ്ട്. അതുകൊണ്ടാണ് ട്രംപിനൊപ്പം മുന്‍നിരയിലുണ്ട് നരേന്ദ്ര മോദിയെന്ന് ഇസ്‌റാഈല്‍ പ്രതികരിച്ചതും.


ആ രാഷ്ട്രീയത്തിനൊപ്പം പ്രധാനമാണ് കൂടിക്കാഴ്ച ഇന്ത്യന്‍ യൂണിയന് എന്ത് സമ്മാനിക്കുമെന്നത്. ഏറ്റവും പ്രധാന ഗുണഫലമായി ചിത്രീകരിക്കപ്പെടുന്നത് പാക്കിസ്ഥാനെതിരെ യോജിച്ച നിലപാടെടുത്തതാണ്. ഭീകര സംഘടനകള്‍ക്ക് പ്രവര്‍ത്തിക്കാന്‍ അവസരമൊരുക്കുന്ന രീതി പാക്കിസ്ഥാന്‍ അവസാനിപ്പിക്കണമെന്ന താക്കീത് അമേരിക്ക പരസ്യമായി നല്‍കുമ്പോള്‍ അത് നരേന്ദ്ര മോദിയുടെ നയതന്ത്ര വിജയമായി വിലയിരുത്തപ്പെടുന്നു. മുമ്പൊരിക്കലും ഇത്ര കഠിനമായ താക്കീത് അമേരിക്ക നല്‍കിയിട്ടില്ലത്രെ. ഇതോടെ അന്താരാഷ്ട്ര വേദികളില്‍ പാക്കിസ്ഥാന്‍ കൂടുതലായി ഒറ്റപ്പെടുമെന്നും ഇന്ത്യയെ ലക്ഷ്യമിടുന്ന ഭീകരപ്രവര്‍ത്തനത്തിന് അവര്‍ നല്‍കുന്ന പിന്തുണ കൂടുതല്‍ രാഷ്ട്രങ്ങള്‍ അംഗീകരിക്കുന്ന അവസ്ഥയുണ്ടാകുമെന്നുമൊക്കെ പ്രതീക്ഷിക്കാം.


അതുവഴി ഇന്ത്യ നേരിടുന്ന ഭീകരഭീഷണി കുറയുമെന്നും. അതേസമയം വാക്കുകൊണ്ട് പാക്കിസ്ഥാനെ തള്ളിപ്പറയുകയും പ്രവൃത്തി കൊണ്ട് അവരെ സഹായിക്കുകയും ചെയ്യുന്ന രീതി അമേരിക്ക തുടരുമോ എന്നത് കണ്ടറിയണം. ട്രംപിനെ സംബന്ധിച്ച് ഇന്ത്യയെപ്പോലെ തന്നെ മോശമല്ലാത്ത കമ്പോളമാണ് പാക്കിസ്ഥാനും. വിറ്റഴിക്കല്‍ വില്‍പ്പനക്കായി അവരുടെ പക്കലുള്ള പ്രധാന ഇനം ആയുധങ്ങളാണ്. ആ വില്‍പ്പന പാക്കിസ്ഥാനിലേക്ക് ഉണ്ടാകില്ലെന്ന ഉറപ്പ് ട്രംപില്‍ നിന്ന് നേടിയെടുക്കാന്‍ നരേന്ദ്ര മോദിക്ക് ആകാത്തിടത്തോളം കാലം നയതന്ത്ര വിജയമെന്നത് പേരില്‍ ഒതുങ്ങുന്നത് മാത്രമാണ്.


പാക്കിസ്ഥാനെതിരെ ഇന്ത്യക്കൊപ്പം നില്‍ക്കുന്നുവെന്ന പ്രതീതി ജനിപ്പിച്ചാല്‍ പിന്നെ കച്ചവടം എളുപ്പമാണെന്ന് ഐക്യനാടുകളുടെ ഭരണ സംവിധാനം മനസ്സിലാക്കിയിരിക്കുന്നുവെന്നതാണ് പ്രധാനം. വൈറ്റ് ഹൗസിലെ വിരുന്നിന് മുമ്പ് തന്നെ അതിനുള്ള കളമൊരുക്കിയിരുന്നു ട്രംപ്. ഹിസ്ബുള്‍ മുജാഹിദീന്‍ നേതാവ് സയ്യിദ് സ്വലാഹുദ്ദീനെ ആഗോള ഭീകരവാദിയായി പ്രഖ്യാപിച്ചത് അതിനാണ്. ഇന്ത്യയെ പ്രീതിപ്പെടുത്താന്‍ സ്വീകരിക്കുന്ന നടപടികളെ ഐക്യരാഷ്ട്ര വേദികളില്‍ ചൈന എതിര്‍ത്തു തോല്‍പ്പിച്ചുകൊള്ളുമെന്ന ഉറപ്പ് ഐക്യനാടുകള്‍ക്കും അതിന്റെ പ്രസിഡന്റിനുമുണ്ട്. കച്ചവടത്തിന് മുട്ടുണ്ടാകുകയുമില്ല. പാക്‌വിരുദ്ധത വലിയ വായില്‍ പ്രകടിപ്പിച്ച ട്രംപ് മോദിയോട് ചിലത് ആവശ്യപ്പെട്ടിട്ടുണ്ട്. അമേരിക്കയില്‍ നിന്ന് ഇന്ത്യയിലേക്ക് ഉത്പന്നങ്ങള്‍ കയറ്റി അയക്കുന്നതിന് നിലവിലുള്ള തടസ്സങ്ങള്‍ നീക്കണമെന്നതാണ് ഒന്ന്. വ്യാപാരാധിഷ്ഠിത ബൗദ്ധിക സ്വത്തവകാശം ഇന്ത്യ നടപ്പാക്കുന്നത് അമേരിക്കയുടെ കച്ചവടങ്ങള്‍ക്ക് തടയിടുന്നത് ആകാതിരിക്കുകയും വേണം.


സ്വിറ്റ്‌സര്‍ലാന്‍ഡ് ആസ്ഥാനമായ നൊവാര്‍ട്ടിസ്, അമേരിക്കയിലെയും വലിയ ഔഷധ നിര്‍മാതാക്കളാണ്. നൊവാര്‍ട്ടിസിന്റെ അമേരിക്കയിലെ പ്ലാന്റില്‍ നിന്നാണ് അര്‍ബുദത്തിനുള്ള വിശിഷ്ട ഔഷധമെന്ന് വിശേഷിപ്പിക്കപ്പെടുന്ന ഗ്ലീവെക് ഉത്പാദിപ്പിക്കുന്നത്. ആഗോള വിപണിയില്‍ ഇതിന് വില 2,500 ഡോളറോളം വരും (ഇന്ത്യന്‍ രൂപയില്‍ ഒന്നര ലക്ഷത്തോളം) ഗ്ലീവെകിന്റെ ജനറിക് രൂപം ഇന്ത്യന്‍ വിപണിയിലുണ്ട്. അതിന് വില 250 ഡോളറോളം (ഇന്ത്യന്‍ രൂപയില്‍ 15,000). ഇത് തന്നെ സബ്‌സിഡി നിരക്കിലാണ് ഇന്ത്യയില്‍ പൊതുവെ വില്‍ക്കുന്നത്. ഇന്ത്യയില്‍ പേറ്റെന്റെടുത്ത് ഗ്ലീവെകിന്റെ ജനറിക് രൂപങ്ങളുടെ വില്‍പ്പന ഇല്ലാതാക്കാന്‍ നൊവാര്‍ട്ടിസ് ശ്രമിച്ചിരുന്നു.


വ്യാപാരാധിഷ്ഠിത ബൗദ്ധിക സ്വത്തവകാശ കരാറനുസരിച്ച് വികസ്വര - അവികസിത രാഷ്ട്രങ്ങള്‍ക്ക് ഇത്തരം ഔഷധങ്ങള്‍ സ്വന്തമായി ഉത്പാദിപ്പിച്ച് വില്‍ക്കാന്‍ അനുമതിയുണ്ട്. ആ അവകാശം സംരക്ഷിക്കണമെന്ന നിലപാട് സര്‍ക്കാര്‍ സ്വീകരിക്കുകയും നൊവാര്‍ട്ടിസിന്റെ പേറ്റന്റ് അപേക്ഷ സുപ്രീം കോടതി തള്ളുകയും ചെയ്തിരുന്നു. ജനറിക് മരുന്നുകളുടെ ഉത്പാദനത്തിന് അവസരം നല്‍കാത്ത വിധത്തില്‍ ബൗദ്ധിക സ്വത്തവകാശം അംഗീകരിക്കുകയും നൊവാര്‍ട്ടിസ് പോലുള്ള കമ്പനികള്‍ക്ക് ഇന്ത്യന്‍ വിപണിയെ കൈയടക്കാന്‍ അവസരമൊരുക്കുകയും ചെയ്യുക എന്നതാണ് പ്രധാന ആവശ്യം.


പേറ്റന്റ് കുത്തക മാത്രമല്ല, പേറ്റന്റില്ലാത്ത മരുന്നുകളുടെ കാര്യത്തിലും അമേരിക്കക്ക് താത്പര്യങ്ങളുണ്ട്. ഇത്തരം മരുന്നുകള്‍ ഇറക്കുമതി ചെയ്യുമ്പോള്‍ ഇന്ത്യ ചുമത്തുന്നത് 21 ശതമാനം നികുതിയാണ്. ഇത് പൂര്‍ണമായും എടുത്തുകളയണമെന്നതാണ് മറ്റൊരു ആവശ്യം.  ഇന്ത്യയിലെ ചികിത്സാച്ചെലവ് വലിയ തോതില്‍ കുറക്കാന്‍ ഇതിലൂടെ സാധിക്കുമെന്നാണ് അമേരിക്കയുടെ വാഗ്ദാനം. ഇത്തരം മരുന്നുകള്‍  ഇന്ത്യന്‍ കമ്പനികള്‍ ഉത്പാദിപ്പിക്കുന്നത് ആഭ്യന്തര ആവശ്യത്തിന് വേണ്ടി മാത്രമല്ല. ഇതര മൂന്നാം ലോക രാഷ്ട്രങ്ങളിലേക്ക് കയറ്റി അയക്കാന്‍ കൂടിയാണ്. ചെലവ് കുറഞ്ഞ ഇന്ത്യന്‍ മരുന്നുകളെ ഈ രാഷ്ട്രങ്ങള്‍ വലിയ തോതില്‍ ആശ്രയിക്കുന്നുമുണ്ട്. പേറ്റന്റില്ലാത്ത മരുന്നുകളുടെ ഇറക്കുമതിച്ചുങ്കം നീക്കുകയും അമേരിക്കയില്‍ നിന്ന് ഇവ ഇന്ത്യയിലേക്ക് കുത്തിയൊലിക്കുകയും ചെയ്താല്‍ ഇവിടുത്തെ കമ്പനികള്‍ പ്രതിസന്ധിയിലാകും. അതോടെ ഇന്ത്യയിലെ ഔഷധ വിപണി മാത്രമല്ല, ഇതര മൂന്നാം ലോക രാഷ്ട്രങ്ങളിലെ വിപണി കൂടിയാണ് അമേരിക്കന്‍ കമ്പനികളുടെ പിടിയിലേക്ക് വരിക.


വിവരസാങ്കേതിക വിദ്യാ മേഖലയുമായി ബന്ധപ്പെട്ട ഉത്പന്നങ്ങള്‍ക്ക് ഇറക്കുമതിച്ചുങ്കം കൂടുതലാണ് ഇന്ത്യയില്‍. അതില്‍ കുറവു വരുത്തി അമേരിക്കന്‍ കമ്പനികള്‍ക്ക് ഇന്ത്യന്‍ കമ്പോളത്തില്‍ സ്വാധീനം ഉറപ്പിക്കാന്‍ അവസരമൊരുക്കണമെന്നതും ആവശ്യമാണ്. 130 കോടിയിലേറെ വരുന്ന ജനസംഖ്യ, വിശാലമായ ഭൂപ്രദേശം, വിവര സാങ്കേതിക വിദ്യക്ക് നല്‍കപ്പെടുന്ന പ്രാമുഖ്യം - കച്ചവടം കൊഴുക്കാന്‍ ഇതിലപ്പുറമെന്ത് വേണമെന്ന് അമേരിക്കന്‍ കമ്പനികള്‍ ചിന്തിക്കുന്നുണ്ട്. സോളാര്‍ പാനലുകള്‍, പ്രകൃതി വാതകം തുടങ്ങിയവ മുതല്‍ ഉപയോഗിച്ച് ഉപേക്ഷിക്കുന്ന വസ്തുക്കള്‍ വരെ ഇന്ത്യന്‍ കമ്പോളത്തില്‍ വിറ്റഴിക്കാന്‍ പാകത്തിലുള്ള ഇളവുകള്‍ അമേരിക്ക ആവശ്യപ്പെടുന്നു.


ഇതൊക്കെ സാധ്യമാകുകയും കമ്പനികളുടെ കച്ചവടം കൂടുകയും ചെയ്താലേ അമേരിക്കയില്‍ തൊഴിലവസരം വര്‍ധിക്കൂ. അമേരിക്കക്കാര്‍ക്ക് തൊഴിലുറപ്പാക്കുമെന്നതായിരുന്നു പ്രസിഡന്റ് സ്ഥാനത്തേക്ക് മത്സരിക്കുമ്പോള്‍ ട്രംപിന്റെ പ്രധാന വാഗ്ദാനം. അതിലേക്കൊരു വഴി തുറക്കാന്‍, ആദ്യത്തെ വിരുന്ന് നരേന്ദ്ര മോദിക്ക് നല്‍കുകയും പാക് വിരുദ്ധത പറഞ്ഞ് ഇന്ത്യന്‍ വികാരം അനുകൂലമാക്കുകയും ചെയ്താല്‍ ട്രംപിന് നഷ്ടമൊന്നുമില്ല. തീവ്ര ദേശീയതയിലും വ്യാജ രാജ്യസ്‌നേഹത്തിലും അധിഷ്ഠിതമായ പ്രചാരണത്തിലൂടെ സൃഷ്ടിക്കപ്പെടുന്ന വികാരവും തീവ്ര വര്‍ഗീയ അജന്‍ഡ നടപ്പാക്കുന്നതിലൂടെയുള്ള ധ്രുവീകരണവും മതി അധികാരത്തിലുള്ള തുടര്‍ച്ചക്ക് എന്ന് നരേന്ദ്ര മോദിയും സംഘവും കരുതുന്നു. ആ വികാര സൃഷ്ടിക്ക് വളമേകി കച്ചവടത്തിന്റെ വഴി കൂടുതല്‍ തുറക്കാന്‍ ശ്രമിക്കുകയാണ് അമേരിക്ക. ആ തന്ത്രത്തില്‍ വീഴാനുള്ളതേയുള്ളൂ, പ്രകടനപരതക്കപ്പുറം ശൂന്യത മാത്രമുള്ള ഈ നേതാവ് എന്ന് മനസ്സിലാക്കാന്‍ വംശ വിദ്വേഷത്തിലും മുസ്‌ലിം വിരുദ്ധതയിലും മോദിയോട് മത്സരിക്കുന്ന ട്രംപ് എന്ന രാഷ്ട്രീയക്കാരന്‍ വേണ്ടതില്ല, പഴയ കച്ചവടക്കാരനായ ട്രംപ് ധാരാളം മതി.


പ്രതിരോധത്തില്‍ വാഗ്ദാനം ചെയ്ത സഹകരണവും കച്ചവടക്കണ്ണോടെയാണ്. മേഖലയില്‍ ചൈനയുടെ സ്വാധീനം വര്‍ധിച്ചുവരികയും ഇന്ത്യയുടെ അയല്‍ രാഷ്ട്രങ്ങളുമായെല്ലാം അവര്‍ വലിയ സൗഹൃദമുണ്ടാക്കുകയും ചെയ്യുന്നുണ്ട്. അതിനൊരു ചെക്ക് പോസ്റ്റായി ഇന്ത്യയുണ്ടാകണമെങ്കില്‍ പ്രതിരോധ സഹകരണം വര്‍ധിപ്പിച്ചേ മതിയാകൂ ഐക്യനാടുകള്‍ക്ക്. ആ സഹകരണം മേഖലയിലൊരു പ്രതിസന്ധി സൃഷ്ടിച്ചാല്‍ അവിടെയും കൊഴുക്കുക അമേരിക്കയുടെ കച്ചവടമാകുമല്ലോ.  


ഈ വിരുന്നിനിടെ എച്ച് 1 ബി വിസ അനുവദിക്കുന്നതിനുള്ള നിബന്ധനകള്‍ കര്‍ശനമാക്കി ഇന്ത്യക്കാരുടെ തൊഴിലവസരം കുറക്കാന്‍ ശ്രമിക്കുന്ന ട്രംപ് ഭരണകൂടത്തിന്റെ നടപടികള്‍ ഉന്നയിക്കാന്‍ പോലും നരേന്ദ്ര മോദിക്കായില്ല. പുറം തൊഴില്‍ കരാറുകള്‍ കുറക്കാന്‍ അമേരിക്കന്‍ കമ്പനികളെ ട്രംപ് ഭരണകൂടം നിര്‍ബന്ധിക്കുന്നത് ഇന്ത്യയിലെ ഐ ടി കമ്പനികളിലെ തൊഴിലവസരം ഇല്ലാതാക്കുന്നതിലെ ആശങ്ക അറിയിച്ചതുമില്ല. സിവില്‍ ആണവ സഹകരണ കരാര്‍ പ്രാബല്യത്തിലാക്കുന്നതിന്റെ ഭാഗമായി ജനറല്‍ ഇലക്ട്രിക്കല്‍സും വെസ്റ്റിംഗ് ഹൗസും എന്നാണ് ഇന്ത്യയില്‍ റിയാക്ടര്‍ നിര്‍മാണത്തിന് എത്തുക എന്ന് ചോദിച്ചതുമില്ല. ഇതൊന്നും ചോദിക്കാനുള്ള അവസരത്തിന് വേണ്ടിയല്ലല്ലോ വെള്ളക്കൊട്ടാരത്തില്‍ വിരുന്നൊരുക്കിയത്! വിരുന്നിന് വിളിച്ചപ്പോള്‍ വെച്ച അജന്‍ഡക്ക് അപ്പുറത്തെന്തെങ്കിലും ഉരിയാടാനോ സ്വന്തം പേര് തുന്നിച്ചേര്‍ത്ത കുപ്പായമിട്ട് മേനി നടിക്കാനോ അവസരമില്ല, ബറാക് ഒബാമയല്ലല്ലോ ഡൊണാള്‍ഡ് ട്രംപ്.

2017-06-21

ഐക്യം വരുന്നു, വഴിമാറിക്കോ....


പതിപക്ഷ ഐക്യം. രാജ്യം വര്‍ഗീയ ഫാസിസ്റ്റ് ശക്തികളുടെ കൈകളില്‍ അമരുന്നത് തടയാനുള്ള ഏക മാര്‍ഗം. ഐക്യത്തിന് മാര്‍ഗങ്ങള്‍ ആരായാന്‍ തുടങ്ങിയത് 2014 മെയില്‍ നരേന്ദ്ര മോദിയുടെ നേതൃത്വത്തില്‍ ബി ജെ പി ലോക് സഭയില്‍ ഒറ്റക്ക് അധികാരത്തിലെത്തിയ നാള്‍ മുതലാണ്. കൃത്യമായി പറഞ്ഞാല്‍ ലോക്‌സഭാ തിരഞ്ഞെടുപ്പിന്റെ ഫലം വന്ന ദിവസം കടലില്‍ മുങ്ങിയ സമയം മുതല്‍. കേവല ഭൂരിപക്ഷം നേടിയ ബി ജെ പിയും അവര്‍ക്കൊപ്പം അണിനിരന്ന കരിങ്കാലിപ്പാര്‍ട്ടികളും ചേര്‍ന്ന് ആകെ നേടിയത് 31 ശതമാനം വോട്ട് മാത്രം. ഇപ്പുറത്ത് ആകെയുള്ളത് 69 ശതമാനം വോട്ട്. ഈ വോട്ടുകള്‍ ഏകീകരിക്കപ്പെട്ടാല്‍ നരേന്ദ്ര മോദിയുടെയോ ബി ജെ പിയുടെയോ അവരെയാകെ നിയന്ത്രിക്കുന്ന രാഷ്ട്രീയ സ്വയം സേവക് സംഘിന്റെയോ പൊടി, അധികാരസോപാനത്തിലുണ്ടാകുകയേയില്ല!


പൂര്‍വസൂരികള്‍ ആനപ്പുറത്തിരുന്നതിന്റെ തഴമ്പ് തന്റെ പക്കലുമുണ്ടെന്ന ബലത്തില്‍ (കെ കരുണാകരനോട് കടപ്പാട്) കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി മുതല്‍ മതനിരപേക്ഷ സഖ്യത്തിന്റെ ആവശ്യകതയെക്കുറിച്ച് ദീര്‍ഘകാലമായി പ്രബന്ധങ്ങള്‍ അവതരിപ്പിക്കുന്ന പ്രകാശ് കാരാട്ട് (ഇപ്പോള്‍ സീതാറാം യെച്ചൂരി) വരെയും ഏകാധിപതിയുടെ ച്ഛായയില്‍ നില്‍ക്കുന്ന മമതാ ബാനര്‍ജി മുതല്‍ പ്രത്യയശാസ്ത്രത്തിന്റെ കെട്ടുപാടുകളില്ലാത്ത ജനാധിപത്യത്തിന്റെ കാവല്‍ മാലാഖയായ അരവിന്ദ് കെജ്‌രിവാള്‍ വരെയും പ്രതിപക്ഷ ഐക്യത്തെക്കുറിച്ച് പേര്‍ത്തും പേര്‍ത്തും പറഞ്ഞു. സംഘഗാനം മുഴങ്ങുന്നതിനിടെയാണ് ഡല്‍ഹി നിയമസഭാ തിരഞ്ഞെടുപ്പിന് ബെല്ലടിച്ചത്. ഭിന്നിച്ച് മത്സരിക്കുന്നതിന് ന്യായമുണ്ടായിരുന്നു കോണ്‍ഗ്രസിന്, ആം ആദ്മി പാര്‍ട്ടിക്ക്, ബി എസ് പിക്ക്, സമാജ്‌വാദി പാര്‍ട്ടിക്ക് എന്തിന് എല്ലാ മണ്ഡലത്തിലും പത്ത് വോട്ട് തികച്ചുകിട്ടുമെന്ന് പ്രതീക്ഷയില്ലാത്ത സി പി എമ്മിന്.


ബീഹാറില്‍ മണി മുഴങ്ങിയപ്പോള്‍ കഥയില്‍ കുറച്ച് മാറ്റം വന്നു. നിതീഷ് കുമാറും ലാലുവും കൈകോര്‍ത്തപ്പോള്‍ ഒപ്പം നിന്നു കോണ്‍ഗ്രസ്. അന്നുയര്‍ന്ന വലിയ ചര്‍ച്ച ജനതാദളങ്ങളുടെ ഏകീകരണമായിരുന്നു. ജനതാദള്‍ യുണൈറ്റഡ്, ജനതാദള്‍ എസ് (ദേവഗൗഡ ഫെയിം), സമാജ്‌വാദി പാര്‍ട്ടി, രാഷ്ട്രീയ ജനതാദള്‍, ബിജു ജനതാദള്‍ (നവീന്‍ പട്‌നായിക്ക് ഫെയിം), രാഷ്ട്രീയ ലോക്ദള്‍ (അജിത് സിംഗ് ഫെയിം) എന്നിങ്ങനെയുള്ളവയുടെ ഏകീകരണം. ബീഹാറില്‍ മതനിരപേക്ഷ മഹാസഖ്യത്തോടൊപ്പം നില്‍ക്കാന്‍ സമാജ്‌വാദിയോ ജനതാദളോ (എസ്) തയ്യാറാകാതിരുന്നതോടെ ഗണപതിക്കുവെച്ച ഏകീകരണം കാക്കകൊത്തിപ്പോയി. മഹാരാഷ്ട്രയില്‍ കോണ്‍ഗ്രസും എന്‍ സി പിയും മൂപ്പിളമത്തര്‍ക്കത്തിലേര്‍പ്പെട്ട്, പ്രതിപക്ഷ ഐക്യം ബലപ്പെടുത്തി. ശിവസേനയെ പിന്തള്ളി, ബി ജെ പി ഏറ്റവും വലിയ ഒറ്റക്കക്ഷിയാകുകയും വരുംകാലത്ത് ശിവസേനയില്ലാതെ അധികാരത്തിലെത്താന്‍ തങ്ങള്‍ക്കാകുമെന്ന് വെല്ലുവളി ഉയര്‍ത്തുകയും ചെയ്തു.


ഉത്തര്‍ പ്രദേശ് മുതല്‍ മണിപ്പൂര്‍ വരെ അഞ്ച് സംസ്ഥാനങ്ങളിലേക്ക് തിരഞ്ഞെടുപ്പ് പ്രഖ്യാപിച്ചപ്പോഴും പ്രതിപക്ഷ ഐക്യം വാചാലമായി. ഒന്നായ സമാജ്‌വാദി പാര്‍ട്ടിയെ രണ്ടായി കണ്ട് കോണ്‍ഗ്രസ് സഖ്യത്തിലായത് മാത്രം മിച്ചം. വര്‍ഗീയ ഫാസിസത്തെ ചെറുക്കാന്‍ മായാവതിയുടെ ബഹുജന്‍ സമാജ് പാര്‍ട്ടിയും രാഷ്ട്രീയ ലോക്ദളുമൊക്കെ ഒറ്റക്ക് കച്ചകെട്ടി. പ്രതിപക്ഷ പാളയത്തെ വോട്ടുകള്‍ ഭിന്നിച്ച് സംഘ്പരിവാര രഥം അധികാരത്തിലേറി. മറ്റ് നാലിടത്ത് കൂടി ബി ജെ പി അധികാരത്തിലെത്തിയപ്പോള്‍ വീണ്ടും ദീര്‍ഘനിശ്വാസം - പ്രതിപക്ഷ ഐക്യം. എല്ലായിടത്തും ഒറ്റക്ക് മത്സരിച്ച് 'കരുത്ത് തെളിയിക്കാനായതി'ല്‍ ആത്മസംതൃപ്തിയുള്ള ഇടതുപക്ഷവും ഈ ദീര്‍ഘ നിശ്വാസം പങ്കിട്ടു - പ്രതിപക്ഷ ഐക്യം കാലഘട്ടത്തിന്റെ ആവശ്യം.
തിരഞ്ഞെടുപ്പുകള്‍ക്കപ്പുറത്ത് രാജ്യത്തെ ഇളക്കിമറിച്ച പ്രശ്‌നങ്ങളുണ്ടായപ്പോഴുമുണ്ടായി ഐക്യാഹ്വാനങ്ങള്‍. മാട്ടിറച്ചി നിരോധം പ്രാബല്യത്തിലാക്കി മഹാരാഷ്ട്ര നിയമം കൊണ്ടുവന്നതിന് പിറകെ ഗോവധ നിരോധം രാജ്യത്ത് നടപ്പാക്കാന്‍ സംഘ്പരിവാര പിന്തുണയുള്ള അക്രമി സംഘങ്ങള്‍ രംഗത്തെത്തുകയും ദാദ്രിയില്‍ തുടങ്ങിയ കൊലകള്‍ മറ്റു ദേശങ്ങളിലേക്ക് വ്യാപിപ്പിക്കുകയും ചെയ്തപ്പോള്‍ യോജിച്ച് പ്രതിരോധിക്കണമെന്ന് ഉറക്കെച്ചിന്തിച്ചിരുന്നു പ്രതിപക്ഷ പാര്‍ട്ടികള്‍. സംഘ്്പരിവാര പിന്തുണയും ഭരണകൂടത്തിന്റെ മൗനാനുവാദവുമുള്ള അതിക്രമത്തെ അപലപിച്ചുള്ള പ്രസ്താവനകള്‍ കൊണ്ട് മാധ്യമ ഓഫീസുകള്‍ നിറച്ചു.


മദ്രാസ് ഐ ഐ ടിയില്‍ തുടങ്ങി, ഹൈദരാബാദ് സര്‍വകലാശാലയില്‍ രോഹിത് വെമുലയുടെ ജീവനെടുത്ത്, ജവഹര്‍ ലാല്‍ നെഹ്‌റു സര്‍വകലാശാലയില്‍ രാജ്യദ്രോഹികളുടെ പട്ടിക തീര്‍ത്ത്, കോടതി വളപ്പിലിട്ട് 'പ്രതികളെ' കൈയേറ്റം ചെയ്ത് സംഘ്പരിവാരം മുന്നേറിയപ്പോള്‍ ഒറ്റക്കും കൂട്ടായും സാന്നിധ്യമറിയിച്ചു നമ്മുടെ പ്രതിപക്ഷ നേതാക്കള്‍. കന്നുകാലിക്കടത്തെന്ന് ആരോപിച്ച് ദളിതുകള്‍ ആക്രമിക്കപ്പെട്ടപ്പോള്‍ ഉനയില്‍ രുപമെടുത്തെ പ്രതിഷേധവും സഹാരണ്‍പൂരില്‍ താക്കൂറുകളുടെ സംഘടിതാക്രമണത്തിനെതിരെ ഭീം ആര്‍മിയുടെ നേതൃത്വത്തിലുയര്‍ന്ന പ്രതിരോധവും സാന്നിധ്യം കൊണ്ട് ശക്തമാക്കാന്‍ പ്രതിപക്ഷക്കൂട്ടായ്മയുണ്ടായില്ല. ഏറ്റവുമൊടുവില്‍ മധ്യപ്രദേശിലും മഹാരാഷ്ട്രയിലും രാജസ്ഥാനിലുമൊക്കെ കര്‍ഷകര്‍ തെരുവിലിറങ്ങിയപ്പോഴും പ്രതിപക്ഷക്കൂട്ടായ്മയെ കണ്ടില്ല. ഈ പ്രശ്‌നങ്ങളൊക്കെ ആദ്യമറിഞ്ഞ് പ്രതിഷേധമുയര്‍ത്താനും ഇരകളാക്കപ്പെടുന്നവര്‍ക്ക് സംരക്ഷണമൊരുക്കാനും ബാധ്യതയുണ്ട് ഐക്യാഹ്വാനക്കാരായ പ്രതിപക്ഷപ്പാര്‍ട്ടികള്‍ക്ക്. അതിനവര്‍ ഉണ്ടാകുന്നില്ല. ഇരകള്‍ സ്വയം പ്രതിഷേധശബ്ദവുമായെത്തുമ്പോള്‍ അതിനോട് ചേര്‍ന്നുനില്‍ക്കാനുള്ള ത്രാണി, പ്രസ്താവനകളിലൊഴിച്ച്, ഇല്ലാതെ പോയി ഈ പാര്‍ട്ടികള്‍ക്ക്.


അഞ്ഞൂറിന്റെയും ആയിരത്തിന്റെയും നോട്ടുകള്‍ പിന്‍വലിച്ച്, ബേങ്കിനും എ ടി എമ്മിനും മുന്നില്‍ ജനത്തെ വരിനിര്‍ത്തി ശിക്ഷിച്ചപ്പോള്‍  ഐക്യാഹ്വാനക്കാര്‍ വീണ്ടും യോഗം ചേര്‍ന്നു. നേതൃത്വം മമതാ ബാനര്‍ജിക്കും അരവിന്ദ് കെജ്‌രിവാളിനും നല്‍കാനാകില്ലെന്ന് പറഞ്ഞ് പിരിഞ്ഞു. മമതയുടെയും കെജ്‌രിവാളിന്റെയും പാര്‍ട്ടികള്‍ ഡല്‍ഹിയില്‍ തെരുവിലിറങ്ങിയപ്പോള്‍ പാര്‍ട്ടി ഓഫീസുകളില്‍ അടയിരുന്ന്, പ്രതിപക്ഷ ഐക്യത്തിന്റെ കാലിക പ്രസക്തി ചര്‍ച്ചചെയ്തു. പ്രതിപക്ഷ ഐക്യമങ്ങനെ പൂത്തുലഞ്ഞുനില്‍ക്കുമ്പോഴാണ് രാഷ്ട്രപതി തിരഞ്ഞെടുപ്പു വരുന്നത്. ഒറ്റക്കെട്ടായി നേരിടുമെന്ന് വെവ്വേറെ പ്രസ്താവനയിറക്കി ആദ്യം. പിന്നെ ഒരുമിച്ചിരുന്ന് ആലോചിച്ചു. സ്വന്തം സ്ഥാനാര്‍ഥിയെ നിശ്ചയിച്ച്, നിലവില്‍ പ്രതിപക്ഷത്തും ഭരണപക്ഷത്തുമല്ലാത്ത പാര്‍ട്ടികളുടെ പിന്തുണ ഉറപ്പാക്കുക എന്നത് പഴഞ്ചന്‍ തന്ത്രമെന്ന് വിലയിരുത്തി. ഭരണപക്ഷം അവരുടെ സ്ഥാനാര്‍ഥിയെ തീരുമാനിച്ച് അറിയിക്കട്ടെ അതിന് ശേഷം മത്സരതന്ത്രം നിശ്ചയിക്കാമെന്ന് നിരൂപിച്ച് പിരിഞ്ഞു. ഏവര്‍ക്കും സ്വീകാര്യനായ സ്ഥാനാര്‍ഥിയെ നിശ്ചയിക്കുന്നത് ആലോചിക്കാമെന്ന നരേന്ദ്ര മോദി - അമിത് ഷാ സഖ്യത്തിന്റെ വാഗ്ദാനം അവിശ്വസിക്കേണ്ട സാഹചര്യമില്ലെന്ന് ഉറപ്പിച്ചു. കോണ്‍ഗ്രസ് അധ്യക്ഷ മുതല്‍ സി പി എം ജനറല്‍ സെക്രട്ടറി വരെയുള്ളവര്‍ കൈയടിച്ചു.  കാത്തിരുന്നു കാണുകയും എതിരാളിയുടെ കൈയറിഞ്ഞ് കളിക്കുകയും തന്ത്രമാണ്. പയറ്റില്‍ ജയിച്ചില്ലെങ്കിലും എതിരാളിയെ വിറപ്പിക്കാന്‍ അതുധാരാളമെന്ന് ഗണിച്ചു.


ആ കളത്തിലേക്കാണ് ബീഹാര്‍ ഗവര്‍ണറും ദളിത് നേതാവുമായ രാം നാഥ് കോവിന്ദിനെ നരേന്ദ്ര മോദി കൊണ്ടുവന്നു നിര്‍ത്തിയത്. എല്‍ കെ അഡ്വാനി, മോഹന്‍ ഭഗവത്, ദ്രൗപതി മുര്‍മു, സുഷമ സ്വരാജ്, തവര്‍ ചന്ദ് ഗെലോട്ട് എന്നിങ്ങനെ ജ്യോതിഷികള്‍ക്ക് പ്രവചിപ്പാന്‍ പല പേരുകള്‍ നല്‍കിക്കൊണ്ടൊരു പുഴിക്കടകന്‍. വിവാദമുക്തന്‍, വിനീതവിധേയന്‍, ദുര്‍ബലജനത്തിന്റെ പ്രതിനിധി എന്നിങ്ങനെ വാഴ്ത്തുവചനങ്ങള്‍  ഏറെയുണ്ട് രാം നാഥ് കോവിന്ദിന്. അവ കൊണ്ട് സംഘ്പരിവാര ബന്ധവും വര്‍ഗീയ അജന്‍ഡകളോടുള്ള പ്രതിബദ്ധതയും മറക്കപ്പെടുമ്പോള്‍  പ്രതിപക്ഷ സ്ഥാനാര്‍ഥി ദളിത് വിഭാഗക്കാരനല്ലെങ്കില്‍ പിന്തുണ എന്‍ ഡി എക്കെന്ന് ബി എസ് പി പ്രഖ്യാപിച്ചു. ബീഹാര്‍ ഗവര്‍ണര്‍ രാഷ്ട്രപതി ഭവനിലേക്ക് എത്തുന്നതിലെ സന്തോഷം മറച്ചുവെക്കാന്‍ പണിപ്പെട്ടു ജെ ഡി (യു) നേതാവ് നിതീഷ് കുമാര്‍.


ബീഹാറിലെ മഹാ വിജയത്തിന് ശേഷം നരേന്ദ്ര മോദിയോട് മൃദുമനസ്സുണ്ടാകുകയും നോട്ട് നിരോധത്തില്‍പ്പോലും പിന്തുണയര്‍പ്പിക്കുകയും പ്രതിപക്ഷ ചര്‍ച്ചകള്‍ക്ക് ഇല്ലാത്ത സമയം പ്രധാനമന്ത്രിയുടെ വിരുന്നിനുണ്ടാകുകയും ചെയ്യുന്ന നിതീഷ്, കോവിന്ദിനെ പിന്തുണക്കാന്‍ സാധ്യത ഏറെ. ഇതിന് പിറകെയാണ് തെലങ്കാന രാഷ്ട്ര സമിതിക്കും ജയലളിതക്കു ശേഷം പലതായി നില്‍ക്കുന്ന എ ഐ എ ഡി എം കെക്കും നവീന പടനായകന്റെ ബിജു ജനതാദളിനും കോവിന്ദിന്റെ സ്ഥാനാര്‍ഥിത്വത്തില്‍ ആനന്ദാതിരേകമുണ്ടായത്. അതോടെ തീര്‍ന്നു രാഷ്ട്രപതി തിരഞ്ഞെടുപ്പിലെ പ്രതിപക്ഷത്തിന്റെ പയറ്റു തന്ത്രവും എതിരാളിയെ വിറപ്പിക്കും വിധത്തിലുള്ള മത്സരവും.


ദളിത് വിഭാഗത്തില്‍ നിന്നുള്ള, വിവാദ മുക്ത സൗമ്യ മുഖത്തെ അവതരിപ്പിക്കുന്നതിലൂടെ പ്രതിപക്ഷ നിരയില്‍ വിള്ളലുണ്ടാക്കാനാകുമെന്ന മോദി - ഷാ തന്ത്രം വിജയിക്കുന്ന കാഴ്ചയാണ് കാണുന്നത്. യോജിച്ച് എതിര്‍ക്കുമെന്ന് പറയുന്നവര്‍ക്ക് ഒരിടത്തും യോജിക്കാനാകുന്നില്ലെന്ന് ജനത്തെ ബോധ്യപ്പെടുത്താന്‍ എളുപ്പത്തില്‍ സാധിച്ചു അവര്‍ക്ക്. പ്രതിപക്ഷ പാര്‍ട്ടികളുടെയും എന്‍ ഡി എ ഇതര പാര്‍ട്ടികളുടെയും  നേതാക്കളുമായി ആശയവിനിമയം നടത്തി എല്ലാവര്‍ക്കും സ്വീകാര്യനായ വ്യക്തിയെ മത്സരിപ്പിച്ച്, ഏകാധിപത്യമുഖം കൂടി പേറുന്ന വര്‍ഗീയ ഫാസിസത്തെ ചെറുക്കാന്‍ ഞങ്ങളുണ്ടാകുമെന്ന് ജനത്തോട് പറയാനുള്ള അവസരമാണ് മൂന്ന് വര്‍ഷമായി ആവര്‍ത്തിക്കപ്പെടുന്ന പ്രതിപക്ഷ ഐക്യം ഇല്ലാതാക്കിയത്.


തീവ്ര ഹിന്ദുത്വം സകലതിലും പിടിമുറുക്കുകയും അഭിപ്രായ സ്വാതന്ത്ര്യത്തെ രാജ്യദ്രോഹത്തിന്റെ കള്ളിയില്‍പ്പെടുത്തുകയും സവര്‍ണാധിപത്യം ഉറപ്പാക്കാന്‍ പാകത്തില്‍ സോഷ്യല്‍ എന്‍ജിനീയറിംഗ് നടപ്പാക്കപ്പെടുകയും ഭീതിയുടെ അന്തരീക്ഷത്തിന് കനമേറുകയും ചെയ്യുന്ന ഈ കാലത്ത് പഴയ തന്ത്രങ്ങള്‍ മതിയാകില്ലെന്ന് മനസ്സിലാക്കാത്തവരുടെ ഐക്യപ്പെടല്‍ പ്രയോജനരഹിതമാണ്. അവകാശങ്ങളും സ്വാതന്ത്ര്യവും ജനാധിപത്യവുമൊക്കെ ഇല്ലാതാകുന്നത്, കാത്തിരുന്ന് കാണാനേ അവര്‍ക്കാകൂ. എതിരാളിയുടെ കൈയറിയുമ്പോഴേക്കും കളി കൈവിട്ടിട്ടുണ്ടാകുമെന്ന് ഇനിയും ബോധ്യപ്പെടാത്തവര്‍ക്ക് പുതിയ രാഷ്ട്രപതിക്ക് ഭാവുകങ്ങള്‍ മുന്‍കൂറായി നല്‍കാം, 2019നായി കാത്തിരിക്കാം.

2017-06-19

അംബാനിമാറ്റ് രാജ്യസ്‌നേഹം


കൃഷ്ണ - ഗോദാവരി ബേസിനിലെ ഡി - 6 ബ്ലോക്ക് ഇനിയും ആഴത്തില്‍ കുഴിക്കാന്‍ പദ്ധതി തയ്യാറാക്കുകയാണ് റിലയന്‍സ് ഇന്‍ഡസ്ട്രീസും ബ്രിട്ടീഷ് പെട്രോളിയവും. രണ്ട് കമ്പനികളും ചേര്‍ന്ന് 40,000 കോടി രൂപ നിക്ഷേപിക്കാനാണ് ഉദ്ദേശിക്കുന്നത്. അതുവഴി 2020 മുതല്‍ 2022 വരെയുള്ള കാലത്ത് പ്രതിദിനം 30 മുതല്‍ 35 വരെ ദശലക്ഷം യൂണിറ്റ് പ്രകൃതി വാതകം ഉത്പാദിപ്പിക്കുമെന്നാണ് വാഗ്ദാനം.  ബേസിനിലെ ഡി - 55 ബ്ലോക്കില്‍ ഖനനം നടത്താനുള്ള പദ്ധതി കേന്ദ്ര സര്‍ക്കാറിന് മുന്നില്‍ സമര്‍പ്പിച്ചിട്ടുമുണ്ട്. 2017 അവസാനിക്കും മുമ്പ് പുതിയ പദ്ധതിയുടെ അനുമതി അവര്‍ പ്രതീക്ഷിക്കുകയും ചെയ്യുന്നു.

റോഡ്, റെയില്‍, ഊര്‍ജം എന്നീ മേഖലകള്‍ക്കാണ് കേന്ദ്ര സര്‍ക്കാര്‍ ഊന്നല്‍ നല്‍കുന്നതെന്ന് പ്രധാനമന്ത്രി നരേന്ദ്ര മോദി ആവര്‍ത്തിച്ച് പ്രഖ്യാപിച്ചിട്ടുണ്ട്. ആകയാല്‍ റിലയന്‍സ് - ബി പി സംയുക്ത സംരംഭത്തിന്റെ പദ്ധതിക്ക് അനുമതി നല്‍കുമെന്ന് തന്നെ പ്രതീക്ഷിക്കണം. രാജ്യത്തിന് ഗുണം വരുന്ന പദ്ധതിയാകയാല്‍, രാജ്യസ്‌നേഹം കുത്തകപ്പാട്ടത്തിനെടുത്തിരിക്കുന്ന പാര്‍ട്ടിയുടെയും പരിവാരത്തിന്റെയും പ്രതിനിധികള്‍ക്ക് അനുമതി നല്‍കാതിരിക്കാനാകില്ല. അതുകൊണ്ടാണ് റിലയന്‍സ് ഇന്‍ഡസ്ട്രീസ് ലിമിറ്റഡിന്റെ മേധാവി മുകേഷ് അംബാനിയും ബ്രിട്ടീഷ് പെട്രോളിയം കമ്പനിയുടെ ഗ്രൂപ്പ് ചീഫ് എക്‌സിക്യൂട്ടീവ് ബോബ് ഡഡ്‌ലിയും സന്ദര്‍ശനാനുമതി തേടിയപ്പോള്‍ ആയത് പ്രധാനമന്ത്രി ഉടന്‍ അനുവദിച്ചത്. മോദിയെ സന്ദര്‍ശിച്ച് പദ്ധതികളുടെ വിശദ വിവരങ്ങള്‍ ബോധ്യപ്പെടുത്തിയ അംബാനിയും ഡഡ്‌ലിയും പെട്രോളിയം മന്ത്രി ധര്‍മേന്ദ്ര പ്രധാനെയും കണ്ടു. സര്‍വാധികാര്യക്കാരെ കാര്യങ്ങളറിയിച്ച്, കൈകൊടുത്ത് പിരിഞ്ഞതാണ്. പെട്രോളിയം മന്ത്രിയെ കണ്ടത് ആചാരങ്ങള്‍ ലംഘിക്കേണ്ടെന്ന് കരുതിയാകണം.


പര്യവേക്ഷണം, ഉത്പാദനം, സംഭരണം, വിതരണം എന്നിങ്ങനെ പെട്രോളിയം ഉത്പന്നങ്ങളുടെയും പ്രകൃതി വാതകത്തിന്റെയും സകല മേഖലകളിലും ആധിപത്യമുറപ്പിക്കാനാണ് സംയുക്ത സംരംഭത്തിന്റെ പദ്ധതിയെന്ന് ബ്രിട്ടീഷ് പെട്രോളിയത്തിന്റെ മേധാവി അറിയിച്ചിട്ടുണ്ട്. പെട്രോളിന്റെ വിലക്കു മേലുണ്ടായിരുന്ന സര്‍ക്കാര്‍ നിയന്ത്രണം നീക്കി, റിലയന്‍സ് അടക്കമുള്ള കമ്പനികള്‍ക്ക് സൗകര്യമൊരുക്കിയിരുന്നു ഡോ. മന്‍മോഹന്‍ സിംഗിന്റെ നേതൃത്വത്തിലുണ്ടായിരുന്ന യു പി എ സര്‍ക്കാര്‍. നരേന്ദ്ര മോദിയുടെ നേതൃത്വത്തില്‍ ബി ജെ പി അധികാരത്തിലേറിയപ്പോള്‍ ഡീസലിന്റെ വിലയിലെ നിയന്ത്രണം കൂടി നീക്കി കൂടുതല്‍ സൗകര്യമൊരുക്കി. പാചക വാതകമടക്കം ഇതര പെട്രോളിയം ഉത്പന്നങ്ങളുടെ വിലയിന്‍മേലുള്ള നിയന്ത്രണം കൂടി ഇല്ലാതാക്കുന്ന രാജ്യസ്‌നേഹാധിഷ്ഠിത ലക്ഷ്യത്തിലേക്ക് ചരിക്കുകയാണ് സര്‍ക്കാര്‍.


അതുകൂടി മുന്നില്‍ക്കണ്ടാണ് സര്‍വതല പദ്ധതിയുമായി റിലയന്‍സ് - ബി പി സംയുക്തം എത്തിയിരിക്കുന്നത്. അതങ്ങനെ പ്രാബല്യത്തിലായാല്‍ വൈകാതെ പൊതുമേഖലയില്‍ എണ്ണക്കമ്പനികള്‍ ആവശ്യമില്ലാതെ വരും. ജിയോയുമായി ടെലികോം - ഇന്റര്‍നെറ്റ് മേഖലയില്‍ പിടിമുറുക്കിയ റിലയന്‍സ് ഗ്രൂപ്പിന്റെ പരസ്യത്തില്‍ മോഡലായി സകല സഹായവും നല്‍കിയ മോദി(ജി) റിലയന്‍സ് - ബി പി സംയുക്തത്തിന്റെ ബ്രാന്‍ഡ് അംബാസഡറാകാന്‍ സാധ്യത ഏറെയാണ്. രാജ്യത്തെ പുരോഗതിയിലേക്ക് നയിക്കുന്ന പദ്ധതികളെ പ്രോത്സാഹിപ്പിക്കേണ്ടത് രാജ്യസ്‌നേഹികളുടെ കടമ തന്നെ. അത്തരം സംഗതികള്‍ക്ക് ബ്രാന്‍ഡ് അംബാസഡറാകുക എന്നത് അതിരറ്റ രാജ്യസ്‌നേഹത്തിന്റെ പ്രകടനവുമാണ്.


എ ബി വാജ്‌പേയ് പ്രധാനമന്ത്രിയായിരിക്കെയാണ് സ്വകാര്യ കമ്പനികള്‍ക്ക് അസവരം തുറന്നുനല്‍കാന്‍ പാകത്തില്‍ പര്യവേക്ഷണ ലൈസന്‍സിംഗ് നയം പുതുക്കിയത്. ആ പുതുക്കലിന്റെ ഫലമായി കൃഷ്ണ ഗോദാവരി ബേസിനിലെ ഡി - 6 ബ്ലോക്കില്‍ പ്രകൃതി വാതക പര്യവേക്ഷണം നടത്താന്‍ റിലയന്‍സ് ഇന്‍ഡസ്ട്രീസ് - നികോ റിസോഴ്‌സസ് ലിമിറ്റഡ് സംയുക്തത്തിന് അനുവാദം കിട്ടി. 40 ദശലക്ഷം യൂണിറ്റ് പ്രതിദിനം ഉത്പാദിപ്പിക്കുമെന്നായിരുന്നു പ്രഖ്യാപനം. ആകെ മൂലധനച്ചെലവ് 247 കോടി ഡോളറും. അതിന് ശേഷം ഉത്പാദനം 80 ദശലക്ഷം യൂണിറ്റാക്കുമെന്ന് കേന്ദ്ര സര്‍ക്കാറിനെ അറിയിച്ച റിലയന്‍സ് - നികോ സംയുക്തം മൂലധനച്ചെലവ് 884 കോടി ഡോളറാക്കി ഉയര്‍ത്തി. ഉത്പാദനം ഇരട്ടിക്കുമ്പോള്‍ മൂലധനച്ചെലവ് നാലിരട്ടിയാകുന്ന മാന്ത്രിക വിദ്യ റിലയന്‍സ് സംയുക്തത്തിന് മാത്രമേ അറിയൂ. ഈ നിര്‍ദേശം 33 ദിവസം കൊണ്ട് അംഗീകരിച്ച് മന്‍മോഹന്‍ സിംഗ് സര്‍ക്കാര്‍ റിലയന്‍സിനോടുള്ള വിധേയത്വം (ഇന്നത്തെ കണക്കില്‍ രാജ്യസ്‌നേഹാധിഷ്ഠിത വിധേയത്വം) പ്രകടിപ്പിച്ചു.


എന്തായാലും കച്ചവടം മുന്നോട്ടുപോയി. 2009ല്‍ ഉത്പാദനം ആരംഭിച്ചു. തുടക്കത്തില്‍ പ്രതിദിനം 60 ദശലക്ഷം യൂണിറ്റ് ഉത്പാദനം. പിന്നെയതങ്ങ് കുറയാന്‍ തുടങ്ങി. 15 ദശലക്ഷം യൂണിറ്റിലേക്ക് താഴ്ന്നു. കരാറനുസരിച്ച് ഉത്പാദനം നടത്താത്തതിന് റിലയന്‍സിന് മേല്‍ 180 കോടി ഡോളര്‍ പിഴ ചുമത്താന്‍ യു പി എ സര്‍ക്കാര്‍ തീരുമാനിച്ചു. തര്‍ക്കമുണ്ടായിരുന്നു റിലയന്‍സ് സംയുക്തത്തിന്. അവര്‍ പരിഹാരഫോറത്തില്‍ അപ്പീല്‍ നല്‍കി.
അതങ്ങനെ നില്‍ക്കുമ്പോഴാണ് പ്രകൃതി വാതകം യൂണിറ്റൊന്നിന് 2.34 ഡോളര്‍ പോരെന്നും 4.2 ഡോളര്‍ വേണമെന്നും ആവശ്യപ്പെട്ട്  മുകേഷ് അംബാനിയുടെ റിലയന്‍സ് കേന്ദ്ര സര്‍ക്കാറിനെ സമീപിച്ചത്.


മന്‍മോഹന്‍ സിംഗ് സര്‍ക്കാര്‍ അതിന് തയ്യാറായിരുന്നുവെങ്കിലും അനില്‍ അംബാനിയുടെ റിലയന്‍സ് കോടതിയില്‍ പോയി. ബോംബെ ഹൈക്കോടതി പഴയ കരാറനുസരിച്ച് വില 2.34 ഡോളറായി തുടരണമെന്ന് വിധിച്ചു. മുകേഷ് അംബാനി സുപ്രീം കോടതിയില്‍ പോയി, ചീഫ് ജസ്റ്റിസായിരുന്ന കെ ജി ബാലകൃഷ്ണന്‍ വിരമിക്കുന്ന ദിവസം പ്രകൃതി വിഭവങ്ങളുടെ ഉടമസ്ഥത സര്‍ക്കാറിനാണെന്നും അവര്‍ക്ക് വില നിശ്ചയിക്കാമെന്നും വിധിച്ചു. അങ്ങനെ പ്രകൃതി വാതക വില യൂണിറ്റൊന്നിന് 4.2 ഡോളറായി. അനില്‍ അംബാനിക്കുണ്ടായ നഷ്ടത്തേക്കാള്‍ വലുതായിരുന്നു യുണിറ്റൊന്നിന് 2.34 ഡോളറിന് മുകേഷ് അംബാനിയില്‍ നിന്ന് പ്രകൃതി വാതകം വാങ്ങാന്‍ കരാറുണ്ടാക്കിയ പൊതുമേഖലാ കമ്പനിയായ നാഷണല്‍ തെര്‍മല്‍ പവര്‍ കോര്‍പ്പറേഷന്.


വില കൂട്ടിക്കിട്ടുന്നതിന് വേണ്ടിയാണ് റിലയന്‍സ് - നികോ സംയുക്തം ഉത്പാദനം കുറച്ചതെന്ന ആക്ഷേപം നിലനില്‍ക്കുന്നു. അതുമൂലം  സര്‍ക്കാര്‍ ഖജനാവിനുണ്ടായ നഷ്ടം കംപ്‌ട്രോളര്‍ ആന്‍ഡ് ഓഡിറ്റര്‍ ജനറല്‍ കണക്കാക്കി സര്‍ക്കാറിന് നല്‍കിയിട്ടുണ്ട്. ഉത്പാദനച്ചെലവ് പെരുപ്പിച്ച് കാട്ടി (247 കോടിയില്‍ നിന്ന് 884 കോടിയാക്കിയ മാന്ത്രിക വിദ്യ) കേന്ദ്ര സര്‍ക്കാറിന് നല്‍കേണ്ട ലാഭവിഹിതം നല്‍കാതിരുന്നതിലെ ക്രമക്കേടും സി എ ജി ചൂണ്ടിക്കാട്ടിയിരുന്നു. സി എ ജി റിപ്പോര്‍ട്ടിലെ പരാമര്‍ശങ്ങളുടെ അടിസ്ഥാനത്തില്‍ സുപ്രീം കോടതിയില്‍ കേസ് നടക്കുന്നു. രണ്ട് വര്‍ഷം മുമ്പ് റിലയന്‍സിന്റെ വിശദീകരണം തേടിയ പരമോന്ന കോടതി, പിന്നീട് ഇക്കാര്യം ഓര്‍ത്തിട്ടേയില്ല. രാജ്യസ്‌നേഹാധിഷ്ഠിത മറവിയാണോ എന്ന് സംശയിക്കണം. രാജസ്ഥാനിലെയും ഹൈദരാബാദിലെയും കോടതികള്‍ 'ഗോമാതാവി'ന്റെ കാര്യത്തില്‍ പ്രകടിപ്പിച്ച ഉത്കണ്ഠ കണക്കിലെടുത്താല്‍ സംശയം അസ്ഥാനത്തല്ല.


അംബാനി സംയുക്തത്തിന്റെ പ്രകൃത്യാലുള്ള തട്ടിപ്പ് വേറെയുമുണ്ടായി. കൃഷ്ണ ഗോദാവരി ബേസിനില്‍ പൊതുമേഖലാ സ്ഥാപനമായ ഓയില്‍ ആന്‍ഡ് നാച്വറല്‍ ഗ്യാസ് കോര്‍പ്പറേഷന് (ഒ എന്‍ ജി സി) അനുവദിച്ച ബ്ലോക്കില്‍ അവര്‍ കടന്നു കയറി. 2009 ഏപ്രില്‍ ഒന്നു മുതല്‍ റിലയന്‍സ് സംയുക്തം വാതകം കുഴിച്ചെടുത്തത് ഒ എന്‍ ജി സിക്ക് അനുവദിച്ച ബ്ലോക്കില്‍ നിന്നായിരുന്നു. ആരോപണം അന്വേഷിക്കാന്‍ റിട്ടയേഡ് ജസ്റ്റിസ് എ പി ഷായെ നിയോഗിച്ചു. സംഗതി ഉള്ളത് തന്നെയെന്ന് കമ്മീഷന്‍ കണ്ടെത്തി. 11,000 കോടി രൂപ പിഴയായി റിലയന്‍സില്‍ നിന്ന് ഈടാക്കണമെന്ന് നിര്‍ദേശിച്ചു. 155 കോടി ഡോളര്‍ (ഏതാണ്ട് 11,000 കോടി രൂപ) പിഴയായി നല്‍കാന്‍ പെട്രോളിയം മന്ത്രാലയം ആവശ്യപ്പെടുകയും ചെയ്തു. ഇതിലും തര്‍ക്കമുണ്ടായി മുകേഷ് അംബാനിക്ക്. അദ്ദേഹം തര്‍ക്ക പരിഹാര ഫോറത്തെ സമീപിച്ചു. അതങ്ങനെ തുടരുകയാണ്.


കെ ജി ബേസിനിലെ ഡി - 6ല്‍ പ്രകൃതി വാതക ഖനനം നടത്തിയതിലെ അഴിമതിയും തട്ടിപ്പും സംബന്ധിച്ച് സുപ്രീം കോടതിയിലും തര്‍ക്ക പരിഹാര ഫോറത്തിലും കേസ് നിലനില്‍ക്കുന്നുവെന്നത് വസ്തുത. അതങ്ങനെ നില്‍ക്കുമ്പോഴാണ് ബ്രിട്ടീഷ് പെട്രോളിയത്തെ കൂട്ടുപിടിച്ച് 40,000 കോടി രൂപയുടെ നിക്ഷേപ പദ്ധതിയുമായി മുകേഷ് അംബാനി വീണ്ടും വരുന്നത്. നിക്ഷേപം പെരുപ്പിച്ച് കാട്ടിയും വാഗ്ദാനം ചെയ്ത ഉത്പാദനം നടത്താതെയും പൊതുഖജനാവിന് വരുത്തിയ നഷ്ടം നികത്തുകയും ഒ എന്‍ ജി സിയുടെ പാടം ചോര്‍ത്തിയ വകയില്‍ നല്‍കേണ്ട പിഴ ഒടുക്കുകയും ചെയ്തതിന് ശേഷം പുതിയ പദ്ധതിയെക്കുറിച്ച് ആലോചിക്കാമെന്നതാണ് സാധാരണ നിലക്കുള്ള രാജ്യസ്‌നേഹം. ഇപ്പോള്‍ വ്യവഹരിക്കപ്പെടുന്നത് പോലുള്ള രാജ്യസ്‌നേഹമില്ലാതെ, കച്ചവടം നടത്താന്‍ തുനിയുന്നവര്‍ പോലും പഴയ കണക്കുകള്‍ തീര്‍ത്തിട്ട് പുതിയത് ആലോചിക്കാമെന്നേ പറയൂ. അങ്ങനെ ചിന്തിച്ച്, അംബാനിക്ക് ഗുണം ചെയ്യുന്ന ഒരു പദ്ധതിയും ഇല്ലാതാക്കുന്നതല്ല രാജ്യസ്‌നേഹം.


റിലയന്‍സ് - ബി പി സംയുക്തം പ്രകൃതി വാതകം കുഴിച്ചെടുത്താല്‍ ഊര്‍ജമേഖലയിലുണ്ടാകുന്ന കുതിപ്പ് ഗംഭീരമായിരിക്കും. അതുവഴി വ്യാവസായിക ഉത്പാദനം വര്‍ധിക്കും, തൊഴിലസവരം കൂടും, പ്രതിശീര്‍ഷ വരുമാനമുയരും അങ്ങനെ നേട്ടങ്ങള്‍ പലതുണ്ട്. അങ്ങനെയാകുമ്പോള്‍ അംബാനി - ബി പി സംയുക്തത്തിന് പരവതാനി വിരിക്കുകയാണ് രാജ്യസ്‌നേഹി ചെയ്യേണ്ടത്. പഴയ കണക്കുകള്‍ എഴുതിത്തള്ളി രാജ്യസ്‌നേഹം തീവ്രമാക്കുകയും ആകാം.


സര്‍ക്കാറിനെ വെട്ടിച്ചുണ്ടാക്കുന്ന പണം കള്ളപ്പണമാണെന്നാണ് വെപ്പ്. അതൊക്കെ തടയാനുദ്ദേശിച്ചാണ് അഞ്ഞൂറിന്റെയും ആയിരത്തിന്റെയും നോട്ട് പിന്‍വലിച്ച് ജനത്തെ മുഴുവന്‍ എ ടി എമ്മിനും ബാങ്കിനും മുന്നില്‍ വരി നിര്‍ത്തി അനുസരണം പഠിപ്പിച്ചത്. ആധാറിനെ പാന്‍ കാര്‍ഡുമായി ബന്ധിപ്പിച്ചതും ബാങ്ക് അക്കൗണ്ടുകള്‍ക്ക് മുഴുവന്‍ ആധാര്‍ നിര്‍ബന്ധമാക്കിയതുമൊക്കെ അതിനാണ്. അതൊന്നും പക്ഷേ അംബാനിമാര്‍ക്ക് ബാധകമല്ല. സര്‍ക്കാറിനെ വെട്ടിച്ച് അവരുണ്ടാക്കിയത് മുഴുവന്‍, പുതിയ നിക്ഷേപം നടത്തി രാജ്യത്തെ സമ്പല്‍ സമൃദ്ധിയിലേക്ക് നയിക്കാനുള്ള പണമാണ്. ആകയാല്‍ അത് വെള്ളപ്പണമാണെന്ന് രാജ്യസ്‌നേഹികള്‍ക്കൊക്കെ ബോധ്യപ്പെടും. ആര്‍ക്കെങ്കിലും ബോധ്യപ്പെടാതെയുണ്ടെങ്കില്‍ അവരുടെ രാജ്യക്കൂറ് സംശയാസ്പദം തന്നെ.


കൃഷ്ണ ഗോദാവരി ബേസിനിലെ വാതക നിക്ഷേപം കണ്ടെത്തിയെന്ന് അവകാശപ്പെട്ട് ഗുജറാത്ത് സ്റ്റേറ്റ് പെട്രോളിയം കോര്‍പ്പറേഷന്‍ (ജി എസ് പി സി) പൊതുപണം 20,000 കോടി രൂപ കടലില്‍ കലക്കിയപ്പോള്‍ അവിടുത്തെ മുഖ്യമന്ത്രി നരേന്ദ്ര മോദിയായിരുന്നു. 2,20,000 കോടി രൂപ മൂല്യം വരുന്ന വാതക നിക്ഷേപം ജി എസ് പി സി കണ്ടെത്തിയെന്ന വിടുവായത്തം അന്ന് വിളിച്ചുപറഞ്ഞതും മറ്റാരുമല്ല. കോടികള്‍ ഗ്യാസാക്കി, രാജ്യസ്‌നേഹം പ്രകടിപ്പിച്ച് മുന്‍പരിചയമുള്ള സ്ഥിതിക്ക് അംബാനി - ബി പി സംയുക്തം വരുമ്പോള്‍ അതൊട്ടും കുറക്കേണ്ടതില്ല.